ماڭعىستاۋ وبلىسىندا "شەكتەۋسىز سپورت" جوباسى جۇزەگە اسىرىلادى, ونىڭ شەڭبەرىندە ەرەكشە قاجەتتىلىكتەرى بار ادامدارعا ارنالعان پاۋەرليفتينگ سەكتسياسى جۇمىس ىستەيدى.
زالعا 70-تەن استام سپورتشى مەن پاراسپورتشىلار, كاسىپقويلار مەن اۋەسقويلار كەلىپ سپورتپەن اينالىسادى. بارلىق دەرلىك سپورتشى قازاقستاندا جانە الەمدىك ارەنادا پاۋەرليفتينگ جانە ورىندىقتا جاتىپ كوتەرۋ بويىنشا جەتىستىكتەرگە قول جەتكىزگەن.
ولاردىڭ ىشىندە 59 جاستاعى باقىت قۇدايبەرگەنوۆا دا بار. ونى سپورتشىلار «باقىت اپا» دەپ اتايدى. ول اپتاسىنا ءۇش-ءتورت كۇندى جاتتىعۋلارعا ارنايدى.
باقىت بالالىق شاعىندا اياعىن سىندىرىپ العان. قاراپايىم, سىنىق مۇگەدەكتىككە اينالىپ, ونى ۇزاق ۋاقىت بويى ارباعا تاڭىپ قويدى. اتا-اناسى بالاسىن اياققا تۇرعىزۋعا تىرىستى, كوپتەگەن دارىگەرلەردىڭ قاراۋىندا بولدى, بىراق بارلىق ارەكەتتەر ءساتسىز اياقتالدى. مەكتەپ بىتىرگەننەن كەيىن باقىت ەمىن جالعاستىردى, اۋرۋحانالارعا بارىپ, ەليزاروۆا اپپاراتىن پايدالاندى. قىز بالا باياۋ جۇرە باستاماس بۇرىن بىرنەشە جىل ۋاقىت وتەدى.
ء«ار ءتۇرلى ەمدەۋ ادىستەرىن قولدانعاننان سوڭ, ۇلكەن قيىندىقتاردىڭ ناتيجەسىندە بالداقتاردىڭ كومەگىمەن جۇرە باستادىم. سول كەزدە مەن مۇگەدەكتىگى بار ادامدار سپورتپەن اينالىسا الاتىنىن ءبىلىپ, وعان قىزىعۋشىلىق تانىتا باستادىم. 1992 جىلى ماڭعىستاۋدا العاش رەت پاۋەرليفتينگ فەدەراتسياسى اشىلدى. مەن اۋىر اتلەتيكا سەكتسياسىنا جازىلدىم, بىراق سپورت تۇرىمەن ۇلىمدى دۇنيەگە الىپ كەلگەننەن كەيىن شىنداپ اينالىسا باستادىم», - دەيدى باقىت قۇدايبەرگەنوۆا.
ءبىزدىڭ كەيىپكەرىمىزدىڭ كاسىبي سپورتتاعى جولى وڭاي بولمادى. سپورتشى بولۋدان بۇرىن, وعان ومىرلىك سىناقتاردان وتۋگە تۋرا كەلدى. باقىت اپانىڭ مۇگەدەك بولىپ قالعانى ازداي, ونىڭ تاعدىرىنا وزگە دە قيىنشىلىقتار جازىلعان ەكەن.
ء«بىر ساتتە مەنىڭ ءومىرىم تۇبەگەيلى وزگەرىپ شىعا كەلدى. كۇيەۋىمنەن ايىرىلىپ كىشكەنتاي بالامەن قالدىم, اكەمدى جوعالتتىم, انام سال بولىپ قالدى. بۇل مەن ءۇشىن قيىن كەزەڭ بولدى. بىراق مەن سپورتتان جان تىنىشتىعىن تاپتىم, ول مەنىڭ ويىمدى ومىرلىك ماسەلەلەردەن الىپ شىقتى. الدىمەن قالالىق, سودان كەيىن رەسپۋبليكالىق جارىستاردا جەڭە باستاعانىمدى بايقاماي قالدىم. سول كەزدە مۇگەدەكتىگى بار سپورتشىلار سيرەك كەزدەسەتىن, اسىرەسە ايەلدەر, سوندىقتان باپكەرلەر ماعان ەرەكشە كوڭىل ءبولدى», - دەيدى باقىت اپا.
پاۋەرليفتينگتەن باسقا, ايەل ءۇشسايىس, ۇستەل تەننيسى, ءجۇزۋ جانە باسقا دا سپورت تۇرلەرىمەن اينالىستى. سوڭعى جىلدارى باقىت قۇدايبەرگەنوۆا بار كۇشىن اۋىر اتلەتيكاعا شوعىرلاندىردى, سونىمەن قاتار توعىزقۇمالاق ويىنىمەن شۇعىلدانادى.
«مۇگەدەكتىك - بۇل ۇكىم ەمەس. مەن مۇنى وزىمە دەگەن ءبىر سىن رەتىندە قابىلدايمىن. ۇزاق جولدان ءوتتىم, كوپتەگەن اتاقتار مەن ماراپاتتارىم بار. ونىڭ بارىندە ۇلىم ماعان قولداۋ كورسەتەدى, ءبىز بىرگە جاتتىعۋلارعا بارامىز. مەنىڭ جاسىم 60-قا تاياپ قالدى جانە اۋىر شتانگالاردى كوتەرىپ, جاتىققاننان راحاتتانامىن. مەنىڭ ويىمشا, ەشتەڭەگە قاراماستان سپورتپەن اينالىسۋ جانە سالاۋاتتى ءومىر سالتىن ۇستانۋ وتە ماڭىزدى», - دەيدى باقىت اپا.
ء«بىزدىڭ جوبامىزدىڭ باعىتى - دەنى ساۋ سپورتشىلار مەن پاراپورتشى-پاۋەرليفتەرلەردى قولداۋ, ولاردى حالىقارالىق جانە الەمدىك دەڭگەيدەگى ءتۇرلى چەمپيوناتتارعا دايىنداۋ, سونداي-اق ماڭعىستاۋ وبلىسىنىڭ تۇرعىندارى اراسىندا بۇقارالىق سپورت پەن سالاۋاتتى ءومىر سالتىن دامىتۋ», - دەيدى عاني يسەنتەمىروۆ.
عاني دا پاراپاۋەرليفتەر جانە سپورتتىڭ ەرەكشە قاجەتتىلىكتەرى بار ادامدار ءۇشىن قانشالىقتى ماڭىزدى ەكەنىن جاقسى تۇسىنەدى.
«مۇگەدەكتىگى بار ادامدارعا كومەكتەسۋ يدەياسى بۇرىننان پايدا بولدى, بىراق ونى جۇزەگە اسىرۋ ءۇشىن تۇراقتى قاراجات قاجەت, سەبەبى جاتتىقتىرۋشىلارعا اقى تولەپ, ارنايى قۇرال-جابدىقتار ساتىپ الۋ كەرەك. سوندىقتان ءبىز الەۋمەتتىك كاسىپكەرلىكپەن اينالىسۋ كەرەك دەگەن ويعا كەلدىك. 2019 جىلى «Samruk-Kazyna Trust» الەۋمەتتىك جوبالاردى دامىتۋ قورى جۇزەگە اسىراتىن «ارەكەت» جوباسىندا جەڭىسكە جەتتىك», - دەپ اتاپ ءوتتى عاني.
گرانت قاراجاتىنان باسقا فەدەراتسيا وكىلدەرى ءبىلىم الۋ مۇمكىندىگىنە يە بولدى. ولار ءۇشىن الەۋمەتتىك كاسىپكەرلىك بويىنشا وقىتۋ باعدارلاماسى ۇيىمداستىرىلدى. «ارەكەت» جوباسىندا وقۋ ۇدەرىسى ۇزدىكسىز, جوبانى جۇزەگە اسىرۋ ۋاقىتىندا ونىڭ قاتىسۋشىلارى ۆوركشوپتار مەن ۆەبينارلار ارقىلى جاڭا ءبىلىم مەن داعدىلاردى الادى.
«دەنى ساۋ سپورتشىلار ءبىزدىڭ زالعا اقىلى نەگىزدە بارادى. بۇل مۇگەدەكتىگى بار ادامدارعا تەگىن اينالىسۋعا مۇمكىندىك بەرەدى. ءبىز كوبىرەك مۇمكىندىگى شەكتەۋلى جاستاردى ءوز دەنساۋلىقتارىن تۇزەپ, قوعامعا بەيىمدەلۋگە كومەكتەسۋ ءۇشىن تارتامىز», - دەيدى عاني.
پاندەمياعا بايلانىستى زال ۋاقىتشا جۇمىسىن توقتاتتى, بىراق ونىڭ كەلۋشىلەرى ءوز جاتتىعۋلارىن جالعاستىرۋ ءۇشىن قايتا اشىلۋىن اسىعا كۇتەدى.