الماتىدا ءدارى-دارمەك نارىعىنداعى جاعدايدى تۇراقتاندىرۋ بويىنشا شارالار قابىلداندى

بۇل رەتتە ءوزىنىڭ Facebook-تەگى جەكە پاراقشاسىندا ءدارىحانالاردا ورىن العان دۇرلىكپەگە قاتىستى جاعدايعا دا تۇسىنىكتەمە بەردى.

"سۇرانىسقا يە پرەپاراتتارعا دەگەن قاجەتتىلىكتى تۇراقتاندىرۋ ءۇشىن 1 شىلدەدەن باستاپ دارىحانالارعا 475 مىڭ دانا الەۋمەتتىك ماڭىزى بار پرەپاراتتار, سونىڭ ىشىندە 260 مىڭ پاراتسەتامول, 98 مىڭ اسپيرين, 35 مىڭ ينگاۆيرين, 22 مىڭ ازيتروميتسين, 15 مىڭ كارديوماگنيل جانە باسقا دا ءدارى-دارمەكتەر ءتۇستى. سونداي-اق دارىحانالارعا 30 مىڭ تەرمومەتر قويىلدى", – دەپ جازدى ب. ساعىنتاەۆ.

بەلگىلى بولعانداي, قويمالاردا الەۋمەتتىك ماڭىزى بار 645 مىڭ ءدارى-دارمەك, سونىڭ ىشىندە 301 مىڭ اسپيرين, 84 مىڭ كارديوماگنيل, 73 مىڭ پاراتسەتامول, 42 مىڭ يبۋپروفەن, 26 مىڭ اموكسيكلاۆ جانە باسقا دا ءدارى-دارمەكتەر بار.

"كۇن سايىن قالاداعى 105 دارىحاناعا ءدارى-دارمەكتەر جونەلتىلەدى. بىراق ولار تەز ساتىلىپ كەتۋدە. دەسە دە, ىركىلىس بولمايدى" – دەپ اتاپ ءوتتى ب. ساعىنتاەۆ.

قالا اكىمىنىڭ بەرگەن مالىمەتىنە سايكەس, شىلدە ايىنىڭ سوڭىنا دەيىن 1,2 ملن. اسپيرين, 930 مىڭ پاراتسەتامول, يبۋپروفەننىڭ 350 مىڭى, ينگاۆيريننىڭ 100 مىڭ قاپتاماسى, 80 مىڭ ازيتروميتسين, 40 مىڭ تاميفليۋ جانە باسقا دا الەۋمەتتىك ماڭىزى بار دارىلەر جەتكىزىلەدى.

"قالانىڭ ءدارى-دارمەك نارىعىندا دۇربەلەڭگە جول جوق. جاعداي باقىلاۋدا. قۇقىق قورعاۋ ورگاندارى جۇمىس ىستەپ جاتىر. الىپساتارلار جازالانادى", – دەپ جازدى ب. ساعىنتاەۆ.