ۇستىمىزدەگى جىلدىڭ مامىر ايىنان بەرى پەتروپاۆلدىڭ زارەچنىي جانە نوۆوپاۆلوۆكا كەنتتەرىندەگى 17 ساياجاي ماسسيۆىندە اتتى پوليتسيا ءتارتىپ قاداعالايدى. بۇل اۆتوموبيل مەن جاياۋلار جەتە المايتىن جولدارى قىساڭ ءارى كەدەرگىلەرى كوپ الاپتار. ال اتتى پوليتسيا ونداي جەرلەرگە جىلدام جەتە الادى. ساياجايشىلاردىڭ وسىرگەن ونىمدەرى مەن مۇلكىنە كوز الارتۋشىلار ءجيى كەزدەسەدى. ءتىپتى بۇزاقىلىق جاساپ, ولاردىڭ دۇنيەم ۇلىكتەرىن قيراتىپ كەتۋشىلەر دە كوپ. سالت اتتى پوليتسيا وسىندايلاردىڭ ەركىنسۋىنە جول بەرمەيدى.
پاترۋلدىك پوليتسيا باتالونى كاۆالەريستىك ءبولىمىنىڭ كومانديرى جاقسىلىق كوجەلداقوۆتىڭ ايتۋىنا قاراعاندا كارانتين كەزىندە سالتاتتى پوليتسيا تۇرعىندارعا ونىڭ ءتارتىبىن ساقتاۋدى دا ءتۇسىندىرىپ جۇرەدى. سونىڭ ىشىندە ادامداردىڭ توپتالماۋىن, الەۋمەتتىك قاشىقتىقتى ساقتاۋىن ەسكەرتىپ وتىرادى. اسىرەسە, دەمالىس جانە مەرەكەلىك كۇندەردە ساياجايعا كەلەتىن ادامدار كوبەيىپ, ىشىمدىك ءىشىلىپ, ءتارتىپ كوپ بۇزىلاتىن كورىنەدى. سوندايدا بايىرعى ساياجايشىلار سالتاتتى پوليتسيانىڭ كومەگىنە كوپ جۇگىنىپ, تىنىشتىق پەن ءتارتىپتىڭ ساقتالۋىن قامتاماسىز ەتۋدى وتىنەدى. ال جۋىردا "رانەت" ساياجايشىلار قوعامىنداعى ۇيلەردىڭ تەرەزەلەرىن شاعىپ, جۇرتتىڭ ءبارىن بوقتاپ, لاعاتتاپ, قولىنداعى قارۋىمەن جاسقاپ جۇرگەن ءبىر ءداۋ بۇزاقىعا ەشكىم قارسىلىق كورسەتە الماعان. ال شاۋىپ جەتكەن سالت اتتى پوليتسيا بۇزاقىنى بىردەن تاۋبەسىنە تۇسىرگەن. سوسىن قولىنا كىسەن سالىپ, اۆتوپاترۋلگە تابىس ەكەن.
اتتى پوليتسيانىڭ وسىنداي قىزمەتتەرىنە تۇرعىندار ءدان ريزا. "وسىنداي كۇزەتشىلەرىمىز بولعانىنا قۋانىشتىمىز. ءبىز ولارمەن كۇن سايىن كەزدەسىپ, امانداسىپ جۇرەمىز. ىستەرىنە ريزا ەكەنىمىزدى دە ايتىپ وتىرامىز. ولار جۇرگەندە ءبىز ءوزىمىزدى سەنىمدى سەزىنەمىز", دەيدى ساياجايشىلاردىڭ ءبىرى ليۋدميلا شادرينا.
پەتروپاۆل