تۇركىستان وبلىسىنىڭ پوليتسەيلەرى تىركەلمەگەن قارۋدى ساتىپ الۋ اكتسياسى اياسىندا 150-گە جۋىق قارۋ تاركىلەندى, دەپ حابارلايدى Egemen.kz
كوروناۆيرۋستىق ينفەكتسيانىڭ تارالۋىنا بايلانىستى كوپتەگەن ءىس-شارا ونلاين-فورماتتا وتكىزىلەدى. ولاردىڭ ءبىرى − زاڭسىز اينالىمداعى قارۋدى ساتىپ الۋ اكتسياسى.
سوزاق اۋدانىنىڭ تۇرعىنى ماقۇلبەك سەرىك ۇلى 12 كاليبرلى تەگىس ۇڭعىلى اڭشى مىلتىعىن ءوز ەركىمەن تاپسىرعان. ال جەتىسۋ اۋدانىنىڭ تۇرعىنى ماعاۋيا ەرىكتى تۇردە ەكى تەگىس ۇڭعىلى اڭشى مىلتىعىن بەرگەن. قازىرگى ۋاقىتتا قارۋ ساراپتاماعا جىبەرىلدى, كەيىن ازاماتتارعا اقشالاي سىياقى تولەۋ تۋرالى شەشىم قابىلدانادى.
قارۋ-جاراق زاتتارىن ءوز ەركىمەن تاپسىرعان ازاماتتارعا سىياقى تولەۋ, ولار كورسەتكەن شوتتارعا اقشالاي قاراجاتتى ەسەپتەۋ جولىمەن جۇزەگە اسىرىلاتىن بولادى. بۇدان باسقا, تىركەلمەگەن اتىس قارۋىن, وق-دارىلەردى جانە جارىلعىش زاتتاردى ءوز ەركىمەن تاپسىرعان ازاماتتار قىلمىستىق جانە اكىمشىلىك جاۋاپكەرشىلىكتەن بوساتىلادى.
پوليتسيا قىزمەتكەرلەرى قارۋ-جاراق زاتتارىن ءوز ەركىمەن تاپسىرعانى ءۇشىن مەملەكەت قارۋدىڭ ءاربىر بىرلىگى ءۇشىن ءتيىستى تولەم قاراستىرعانىن ەسكە سالادى. سونداي-اق, تىركەلمەگەن قارۋدى ءوز ەركىمەن تاپسىرعىسى كەلگەن ازاماتتار پوليتسيا ۋچاسكەسىنە بارماي-اق, 8-778-991-66-66, 8-775-287-16-37 نەمەسە "102" تەلەفوندارى ارقىلى حابارلاسا الادى.