جامبىل وبلىسىندا ءدىني احۋال تۇراقتى

باسقارما باسشىسى ءدىني توپتار مەن قاۋىمداستىقتاردىڭ راديكالدىق يدەولوگياعا قارسى يممۋنيتەتىن قالىپتاستىرۋعا باعىتتالعان اقپاراتتىق-ءتۇسىندىرۋ جانە ناسيحات جۇمىستارىنىڭ 80 پايىزعا ورىندالعانىن جەتكىزدى. ال, دەسترۋكتيۆتى توپتاردىڭ 11 كوشباسشىسىمەن كەزدەسۋلەر وتكىزىلىپ, 3 ادام قوعامعا بەيىمدەلگەن. "تەولوگتارعا دەسترۋكتيۆتى اعىمداردىڭ جەتەكشىلەرىمەن جانە بەلسەندىلەرىمەن كەزدەسۋ كوبىنە قيىنعا سوعادى. بۇل ورايدا جالعان ءدىني بىرلەستىكتەردىڭ وكىلدەرىمەن الدىن الۋ شارالارىن وتكىزۋدە قۇقىق قورعاۋ ورگاندارىنان كومەك قاجەت", دەدى ول. بۇل رەتتە بەردىبەك ساپارباەۆ تەولوگتاردىڭ يمامدارمەن جانە قۇقىق قورعاۋ ورگاندارىمەن ءوزارا ءىس-قيمىلىنىڭ ماڭىزدىلىعىن اتاپ ءوتتى.

سونداي-اق, سوتتالعانداردىڭ راديكالدى يدەولوگيا مەن راديكاليزاتسياعا قارسى يممۋنيتەتىن نىعايتۋعا باعىتتالعان اقپاراتتىق-ءتۇسىندىرۋ جۇمىستارىمەن قامتۋدىڭ ماقساتتى ينديكاتوردىڭ ورىندالۋى 100 پايىزدى قۇراعان. 2018-2019 جىلدارى دا بۇل كورسەتكىش وسى دەڭگەيدە بولعان. ناتيجەسىندە 33 سوتتالۋشى راديكالدى كوزقاراسىنان قايتقان. اقپاراتتىق-ءتۇسىندىرۋ توپتارى تەولوگ-ماماندارمەن 80 پايىزعا قامتىلعان. توپ قۇرامىندا 26 ءدىنتانۋشى, 1 فيلوسوف جانە 1 فيلولوگ جۇمىس ىستەيدى. "وبلىسىمىزدىڭ 131 ستۋدەنتى ەلىمىزدىڭ جوعارى وقۋ ورىندارىندا ءدىني ءبىلىم الۋدا دەسەك, ونىڭ 27-ءسى بيىل بىتىرەدى. ستۋدەنتتەردىڭ باسىم بولىگى الماتىداعى نۇر-مۇباراك ۋنيۆەرسيتەتىندە, قالعانى ءال-فارابي اتىنداعى قازاق ۇلتتىق ۋنيۆەرسيتەتىندە, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە, شەت تىلدەر جانە ىسكەرلىك مانساپ ۋنيۆەرسيتەتىندە وقيدى", دەيدى جانگەلدى وماروۆ.

سونىمەن قاتار, 115 جامبىلدىق قازاقستان مۇسىلماندارى ءدىني باسقارماسىنىڭ جانىنداعى مەدرەسە مەن كوللەدجدەردە ءبىلىم الۋدا ەكەن. ولاردىڭ 41-ءى وقۋىن بيىل ءتامامدايدى. تاراز قالاسىنداعى وبلىستىق ورتالىق "ھيباتۋللا تارازي" مەشىتىندەگى مەدرەسەدە 37 شاكىرت ءبىلىمىن شىنداۋدا. ال, 6 ستۋدەنت مىسىرداعى ءال-ازحار ۋنيۆەرسيتەتىنە قازاقستان مۇسىلماندارى ءدىني باسقارماسىنىڭ باعىتى بويىنشا وقۋدا. ولاردىڭ ەكەۋى بيىل ءبىتىرىپ, ءدىني باسقارمادا قىزمەت ەتە باستايدى. جيىن سوڭىندا بەردىبەك ساپارباەۆ "كونفەرەنتسيالار مەن سەمينارلاردى اسىرەسە حالىقارالىق دەڭگەيدە وتكىزۋ كەرەك. دەر كەزىندە جانە ءتيىستى دەڭگەيدەگى شارالاردى قامتيتىن اۋقىمدى تاربيە جۇمىستارىن جۇزەگە اسىرۋ ارقىلى ەكسترەميزم مەن تەرروريزم كورىنىستەرىنىڭ الدىن الۋعا بولادى. بۇل تۇرعىدا بۇعان دەيىن اتاپ وتكەنىمدەي, بارلىق مۇددەلى قۇرىلىمداردىڭ بىرلەسكەن جۇمىسى وتە ماڭىزدى", دەدى ول.

جامبىل وبلىسى