ەلىمىزدە ونلاين-فورماتتا Astana Finance Days كونفەرەنتسياسى وتۋدە. وندا تالقىلاۋدىڭ باستى تاقىرىبى — وزگەرمەلى الەمدەگى نارىقتاردى دامىتۋ جانە پاندەميانىڭ جاھاندىق ەكونوميكاعا اسەرى. قازاقستاندىق جانە شەتەلدىك ساراپشىلار ەكونوميكالىق جاعدايدىڭ قالاي وزگەرەتىنىن, ومىرىمىزگە قالاي اسەر ەتەتىنىن جانە قانداي تەحنولوگيالار كوپ ۇزاماي الەمنىڭ اجىراماس بولىگى بولا الاتىنىن تالقىلاۋدا. اتاپ ايتقاندا, جاھاندىق ەكونوميكا, قارجى تەحنولوگيالارى, كاپيتال نارىعى, احقو قۇقىعى, يسلام قارجىسى, سونداي-اق ادامي كاپيتالدى دامىتۋ سەكىلدى باعىتتارعا نازار اۋدارىلىپ جاتىر, دەپ حابارلايدى Egemen.kz
ساراپشىلاردىڭ پىكىرىنشە, كوروناۆيرۋس بۇكىل الەمدەگى كومپانيالاردىڭ جوسپارلارىنا ەلەۋلى تۇزەتۋلەر ەنگىزدى. ەلدەر ۇكىمەتتەرىنىڭ ەنگىزگەن شارالارى كومپانيالاردىڭ جۇمىسىن ءىشىنارا نەمەسە تولىق توقتاتۋعا الىپ كەلدى. وسى تۇرعىدا قارجى تەحنولوگياسى سەكتورىنىڭ كومپانيالارىندا جاڭا مۇمكىندىكتەر پايدا بولدى.
وسىلايشا, Tech Nation amd Dealroom ەسەبىنە سايكەس, فينتەح كوروناۆيرۋستىق داعدارىس كەزىندە تۇراقتىلىق كورسەتتى, ال 2020 جىلى لوندوننىڭ تەحنولوگيالىق كومپانيالارى بارلىق ۆەنچۋرلىك ينۆەستيتسيانىڭ 39%-ىن قۇرادى. deVere Group كونسالتينگتىك كومپانياسى جۇرگىزگەن باسقا زەرتتەۋ پاندەميا اياسىندا ەۋروپا تۇرعىندارى فينتەح-قوسىمشالاردى 72%-عا ءجيى پايدالانا باستاعانىن حابارلايدى.
قازاقستان مەن ورتالىق ازياداعى جاعداي دا وسى شامالاس. وسىلايشا قازاقستاندا بانكتەر مەن باسقا دا كرەديتتىك ۇيىمداردىڭ ۋاقىتشا جابىلۋىنا بايلانىستى قارجى ينستيتۋتتارى وزدەرىنىڭ تسيفرلىق سەرۆيستەرىن دامىتا باستادى. مىسالى, كارانتين اياسىندا العاش رەت كارتوچكالىق شوتتاردى قاشىقتان اشۋ قىزمەتى پايدا بولدى. ءساۋىر ايىنىڭ سوڭىنا قاراي 1 ملن-نان استام ادام كارتوچكالىق شوتتاردى اشۋعا ونلاين ءوتىنىم بەرىپ, 700 مىڭعا جۋىق ادام ۇيگە جەتكىزۋمەن كارتا العان.
فينتەحتىڭ دامۋى جانە بانكتەرگە بارماي-اق الۋعا بولاتىن جاڭا قىزمەتتەر ترەندى ودان ءارى دامي بەرەدى, دەپ ەسەپتەيدى ساراپشىلار.