سپورت سارايىندا قاجەت بولعان جاعدايدا اۋرۋدىڭ جەڭىل ءتۇرى بار پاتسيەنتتەر ورنالاستىرىلماق, دەپ حابارلايدى pavlodarnews.kz ءتىلشىسى.
بۇل تۋرالى وڭىرلىك كوممۋنيكاتسيالار قىزمەتىندە ونلاين فورماتتا وتكەن ءباسپاسوز كونفەرەنتسياسىندا پاۆلودار وبلىسى اكىمىنىڭ ءبىرىنشى ورىنباسارى سۇڭعات ەسىمحانوۆ ءمالىم ەتتى.
"بايانتاۋدا ەرتەڭگى كۇنگە دەيىن ەكى جۇزگە جۋىق توسەك دايىندالادى", - دەيدى سۇڭعات ەسىمحانوۆ. – بۇل توسەك ورىنداردى پايدالانۋ جاعدايعا بايلانىستى بولادى. بىراق بۇل جەردە اۋرۋدىڭ جەڭىل ءتۇرى بار ناۋقاستار ءۇشىن بەلگىلى ءبىر پروتسەدۋرالاردى جۇرگىزۋگە جانە العاشقى كومەكتى عانا بولادى. كەيىن ناۋقاستىڭ جاعدايىنا بايلانىستى كاسىبي اۋرۋحانالارعا جەتكىزىلەدى.
اتالمىش ەكى ءجۇز توسەك ورىن سپورت سارايىنىڭ ءبىر ۇلكەن زالىندا اشىلادى.
"پروۆيزورلىق ستاتسيونارلار بارلىق قالالار مەن اۋدان ورتالىقتارىندا اشىلادى", - دەيدى وبلىس اكىمىنىڭ ءبىرىنشى ورىنباسارى. - اقسۋ قالاسىندا "ەۋرازيا" مەديتسينالىق ورتالىعى دايىندالۋدا. سپورتتىق عيمارات بازاسىندا ۇلكەن گوسپيتال اشۋ بويىنشا دايىندىق جۇمىستارىن جۇرگىزۋدەمىز.
ەستەرىڭىزگە سالا كەتەيىك, بۇگىنگى كۇنى پاۆلودار وبلىسىندا كوروناۆيرۋستىق ينفەكتسيانىڭ 1139 جاعدايى تىركەلگەن. سونىمەن قاتار, وڭىردە پنەۆمونيامەن اۋىراتىن ناۋقاستار سانىنىڭ بۇرىن-سوڭدى بولماعان ءوسۋى تىركەلۋدە.