ورمان شارۋاشىلىعى جانە جانۋارلار دۇنيەسى كوميتەتى جابايى تابيعاتقا 4160 جەك-دۋاداقتى جىبەردى. بۇل تۋرالى كوميتەتتىڭ ءباسپاسوز حاتشىسى ساكەن دىلداحمەت Facebook پاراقشاسىندا جازدى, - دەپ حابارلايدى Egemen.kz
جۇمىستار جەك-دۋاداقتى قورعاۋ حالىقارالىق قورىمەن بىرلەسىپ اتقارىلعان. جەك-دۋاداقتىڭ 3236-ى بىرىككەن اراب امىرلىكتەرىنىڭ, ال 924-ءى قازاقستاننىڭ تالىمباقتارىندا (تۇركىستان وبلىسى) وسىرىلگەن.
قۇستار الماتى, ماڭعىستاۋ, تۇركىستان مەن قىزىلوردا وبلىسىنىڭ اۋماعىنا جىبەرىلدى. جالپى 2009-2019 جىلدار ارالىعىندا قازاقستاننىڭ تابيعاتىنا 20 489 جەك-دۋاداق جىبەرىلگەن. پراكتيكالىق باقىلاۋعا قاراعاندا ولاردىڭ 50 پايىزى تىرشىلىككە بەيىمدەلىپ كەتە الادى.
جالپى جەك-دۋاداقتار 2009 جىلدان بەرى قازاق دالاسىنا جىبەرىلىپ كەلەدى. ازيا پوپۋلياتسياسىنىڭ قۇستارى وسىنداعى جاعدايعا بەيىمدەلىپ, كۇزدىگۇنى قىستى وتكىزۋ ءۇشىن ۇشىپ كەتەدى. جىلى جاقتان ورالعاننان كەيىن كوكتەمدە قايتىپ كەلىپ, وسىندا بالاپاندايدى. قۇستىڭ بۇل ءتۇرى قازاقستاننىڭ قىزىل كىتابىنا ەنگىزىلگەن. ولاردىڭ جويىلىپ كەتۋ قاۋپى بار.