بيىل سىرداريا اۋدانىندا "جۇمىسپەن قامتۋ جول كارتاسى" مەملەكەتتىك باعدارلاماسى اياسىندا 18 جوبا ىسكە اسادى, - دەپ حابارلادى قىزىلوردا وبلىسى اكىمدىگىنىڭ ءباسپاسوز قىزمەتى.
اتاپ ايتقاندا, الەۋمەتتىك-مادەني, ءبىلىم,دەنساۋلىق, تۇرعىن ءۇي-كوممۋنالدىق شارۋاشىلىق جانە ينجەنەرلىك-كولىكتىك ينفراقۇرىلىم وبەكتىلەرى جاڭعىرتىلادى. اتالعان جوبالاردى جۇزەگە اسىرۋ ءۇشىن 1 860 322,5 مىڭ تەڭگە بولىنگەن.
الەۋمەتتىك-مادەني سالاداعى جوبالارعا 316 439,9 مىڭ تەڭگە قارجى قاراستىرىلسا, ءبىلىم سالاسى جوبالارىنا 145 480,0 مىڭ تەڭگە ءبولىندى. ماسەلەن, قالجان احۋن اۋىلىنداعى №126 ورتا مەكتەپتىڭ سۋ قۇبىرى مەن كاناليزاتسيانىڭ ىشكى جانە سىرتقى جەلىلەرى اۋىستىرىلىپ,بەسارىق اۋىلىنداعى №147 ورتا مەكتەبىنىڭ عيماراتىنا كۇردەلى جوندەۋ جۇرگىزىلۋدە.
دەنساۋلىق ساقتاۋ سالاسى بويىنشا جوسپارلانعان جوبالاردىڭ جالپى قۇنى 147 151,0 مىڭ تەڭگە قۇرايدى. بيىل تەرەڭوزەك كەنتىندەگى اۋداندىق ورتالىق اۋرۋحاناسىنىڭ ىشكى جىلىتۋ مەن سۋ قۇبىرى, سىرتقى سۋمەن جابدىقتاۋ جەلىلەرى جاڭعىرتىلادى دەپ جوسپارلانۋدا.
جالپى, اۋدان بويىنشا 427 تۇرعىن جۇمىسپەن قامتىلادى دەپ كۇتىلۋدە, ونىڭ ىشىندە 215 ازامات اۋداندىق جۇمىسپەن قامتۋ جانە الەۋمەتتىك باعدارلامالار ءبولىمى ارقىلى قابىلدانۋدا.