بۇل ءار جىل سايىن ورىن الاتىن كورىنىس. بيىل دا قارىز باستان اسىپ جاتىر. بۇل جاي جاڭا جىلۋ بەرۋ ماۋسىمىنا دايىندىق جۇرگىزۋگە قولبايلاۋ بولادى, - دەپ حابارلايدى Egemen.kz.
جىل قورىتىندىسى بويىنشا اقاۋ انىقتالعان اگرەگاتتار كۇردەلى جوندەۋدەن ءوتىپ, قۇبىرلار اۋىستىرىلىپ جاتىر. ماسەلە از ەمەس, ءبىر بۇيىردە تۇتىنۋشىلاردان قارىزدى ءوندىرىپ الۋ ءىسى دە تۇر. قالا تۇرعىندارىنىڭ جىلۋعا قارىزى 192 ميلليون تەڭگەگە جەتكەن. جامان تۇماۋ جايلاعالى كاسىپورىن تۇتىنۋشىلارعا قارىزدارى ءۇشىن وسىماقى بەلگىلەمەگەن.
بيىل "كوكشەتاۋ جىلۋ" سەرىكتەستىگى ۇزىندىعى 4 شاقىرىمدى قۇرايتىن جىلۋ قۇبىرلارىن جاڭارتپاق. جىل سايىن 10 شاقىرىمنان اسا جىلۋ قۇبىرى اۋىستىرىلادى. سونىمەن قاتار, قازىردە اقاۋ انىقتالعان جىلۋ اگرەگاتتارىنا اعىمداعى جوندەۋ جۇمىستارى جۇرگىزىلۋدە.
"جىلۋ ماۋسىمى اياقتالعان كەزدە اقاۋ انىقتالعان اگرەگاتتار بەلگىلەنەدى. قازىردە سول جاسالعان اكتىلەر بويىنشا اعىمداعى جوندەۋ جۇمىستارى ءجۇرىپ جاتىر. قازاندىقتارعا جوندەۋ جۇرگىزىلۋدە", – دەيدى "كوكشەتاۋ جىلۋ" كاسىپورنىنىڭ باس ينجەنەرى دانيار اقىباەۆ.
ماۋسىمنىڭ سوڭىندا كوكشەتاۋلىقتاردىڭ قارىزى 296 ميلليون تەڭگەگە جەتكەن بولاتىن. ەكى ايدىڭ ىشىندە 167 ميلليون تەڭگە كولەمىندەگى قارىز وتەلىپ, 56 پروتسەنتكە ازايدى. قازىردە جەكە تۇلعالاردىڭ جىلۋعا بەرەشەگى 152 ميلليون بولسا, زاڭدى تۇلعالاردىڭ قارىزى 40 ميلليون تەڭگە.
"توتەنشە جاعداي كەزىندە قارىزدى ءوندىرىپ الۋ ءىسى دە توقتاتىلدى. 5 جىل بويى تولەمەي كەلە جاتقان تۇتىنۋشىلار بار. ولارمەن جۇمىس جۇرگىزىلەدى. قارىزدى وتەۋدىڭ كەستەسىن بەلگىلەپ, اي سايىن وتەۋگە مۇمكىندىك بەرەمىز", – دەيدى كاسىپورىن قىزمەتكەرى سۇلۋشاش قازدەنوۆا.
قارىزى قوردالانعان زاڭدى تۇلعالاردىڭ ءبىرىنىڭ جىلۋ ءۇشىن بەرەشەگى 12 ميلليون تەڭگەگە جەتىپ وتىر. نىسان يەسىنە سوتقا دەيىنگى ەسكەرتۋ جىبەرىلدى. باسقا دا بورىشكەرلەرمەن قارىزدى وتەۋگە بايلانىستى جۇمىستار مىقتاپ قولعا الىندى.