اتىراۋداعى كوپقاباتتى تۇرعىن ءۇي قابىرعاسىنا ەرەكشە كارتا سالىندى. ونى قولعا العان ن.تىلەنديەۆ اتىنداعى كىشى ونەر اكادەمياسىنىڭ سۋرەتشىسى ميراس جانعوجيەۆتىڭ ايتۋىنشا, كارتا سىبايلاس جەمقورلىققا قارسى قىزمەتتىڭ پاراساتتىلىق, ادىلدىك جانە سەنىم سياقتى قۇندىلىقتارىن قامتيدى.
ويتكەنى, پاراساتتىلىق يدەولوگياسى سىبايلاس جەمقورلىققا قارسى كۇرەستى كۇشەيتۋدىڭ تۇجىرىمدامالىق نەگىزى رەتىندە ايقىندالعان. بۇل كەشەندى ۇعىمعا ادالدىق, ادەپتىلىك, زاڭدىلىق, ساتىلماۋشىلىق, سەنىمدىلىك, ادامگەرشىلىك, تۇراقتىلىق جاتادى.
– ءبىزدىڭ اكادەمياداعى بەينەلەۋ ونەرى جانە ديزاين كافەدراسىنىڭ وقىتۋشىلارى سىبايلاس جەمقورلىققا قارسى كۇرەسكە ءوز ۇلەسىن قوسىپ, الەۋمەتتىك ز ۇلىمدىقپەن كۇرەسۋدى ماقسات ەتىپ وتىر. مۇنداي جوبالار وتە كۇردەلى بولعانىمەن, ءبىز ءوز جۇمىسىمىزدىڭ ناتيجەسىن قالا تۇرعىندارىنىڭ وڭ پىكىر بىلدىرۋىنەن بايقايمىز, – دەيدى سۋرەتشى ميراس جانعوجيەۆ.
ونىڭ ايتۋىنشا, ءبىر سۋرەت ءبىر اپتادان 10 كۇنگە دەيىنگى مەرزىمدە سالىندى. سۋرەتشىلەر وعان ارنايى بوياۋ قۇيىلعان 100-دەن استام بالوندى پايدالانادى.
– بالوندارداعى بوياۋ ساپاسى سۋعا ءتوزىمدى. سول سەبەپتەن ءۇيدىڭ قابىرعاسى ساپالى ءارى سەنىمدى بولسا, سۋرەتتەر ۇزاق ۋاقىت بويى ساقتالىپ تۇرادى. مۇنداي سۋرەتتەردى الدا دا سالۋدى ويلاستىرۋدامىز, – دەيدى ول.
اتىراۋ