22-23 ناۋرىز كۇندەرى استانا قالاسى اكىمدىگىنىڭ مۋزىكالىق جاس كورەرمەن تەاترى «ناۋرىز-دۋمان» دەپ اتالاتىن بالالارعا ارنالعان تانىمدىق سازدى ەرتەگى جانرىنداعى مەرەكەلىك قويىلىم ۇسىندى. ەكى كۇن قاتارىنان وتكەن قويىلىمىنىڭ پرەمەراسىن كورگەن كىشكەنتاي كورەرمەندەر كەرەمەت اسەرگە بولەندى, دەپ حابارلايدى Egemen.kz.
قويىلىمدى اۆتور م.احمانوۆتىڭ ءبارىمىز جاقسى بىلەتىن «جىل باسى كىم بولادى؟» ەرتەگىسى نەگىزىندە جازعان. دەگەنمەن ءسال وزگەشەلىك بار. قويىلىم قارا تۇنەكتىڭ جەر الەمدى قاراڭعىلىق قۇرساۋىندا ۇستاپ, ءوز بيلىگىن جۇرگىزۋىنەن باستالادى.
جەر بەتىن تۇنەك باسىپ, جان-جانۋارلار ابدەن ازاپ شەگەدى. وسى كەزدە كۇنشۋاق پەن ايباتىر قارا تۇنەكتىڭ جولىنا توسقاۋىل جاساپ, جەر بەتىنە شۋاعىن شاشادى. ولار جان-جانۋارلاردى جيناپ, جەردە قايتادان ءتارتىپ ورناتپاق بولادى. ءسويتىپ كۇنشۋاق پەن ايباتىردىڭ شاقىرۋى بويىنشا تۇيە, تىشقان, سيىر, بارىس, قويان, ۇلۋ, جىلان, جىلقى, قوي, مەشىن, تاۋىق, يت, دوڭىز جينالادى. الايدا ولاردى «جىل باسى كىم بولادى؟» دەگەن سۇراق مازالايدى. ارقايسىسى جىل باسى رەتىندە ءوزىن كورگىسى كەلەدى. وسى كەزدە تىشقان ۇتىمدى شەشىم تابادى. ول ورتاعا شىعىپ: ء«بارىمىز شارشادىق, ۇيىقتايىق. ەرتەڭ تاڭ اتادى, سول كەزدە كىم ءبىرىنشى بولىپ كۇننىڭ شاپاعىن كورسە, سول جىل باسى بولسىن!», دەيدى. بارلىق جان-جانۋار وسى بايلامعا كەلىسەدى. وسى كەزدە تۇيەنىڭ وركەشىنە ءمىنىپ العان تىشقان كۇندى ءبىرىنشى بولىپ كورەدى. وسىلايشا ول جىل باسى اتانادى. قالعان جانۋارلار مەن اڭدار دا وسى كەزەكپەن ون ەكى ايدىڭ يەسى بولادى. تەك ءوز بويىنا سەنگەن تۇيەگە عانا اي اتاۋى بۇيىرمايدى. قويىلىم سوڭىندا قىزىر اتا ساحناعا شىعىپ, جىلدىڭ باستالۋىمەن قۇتتىقتاپ, بارشاسىنا باق-بەرەكە تىلەيدى.
وسى ءبىر اسەرلى ەرتەگىنى مۋزىكالىق جاس كورەرمەن تەاترى ۇجىمى 50 مينۋتتىق سپەكتاكلگە سىيعىزعان. قويىلىمنىڭ قويۋشى-رەجيسسەرى ەرالحان مىرزاحمەت ەرتەگىنى جىمداستىرىپ, بالانىڭ قابىلداۋىنا ساي ساحنالاپ شىققان. سونداي-اق تىشقاننىڭ (ايدانا جەتەشوۆا) شيقىلداپ سويلەپ, دورباسىنداعى ءتاتتىسىن بالالارعا ۇلەستىرۋى, سيىردىڭ (اقەركە امانگەلدى) سابىرلى قالپىنان ءبىر ساتكە دە تايماي باستان-اياق كۇيسەگەن بولىپ سەندىرە سومداۋى, قوياننىڭ (ارۋجان تەمىرحانوۆا) بىرەسە ۇركەكتەپ, بىرەسە باتىلدانىپ كەتەتىن قىلىقتارى, ۇلۋدىڭ (مايرا مارعۇلانقىزى) وتە باياۋ ءارى كۇلكىلى قيمىل-ارەكەتى, جىلاننىڭ (ايدانا بولات) ىسىلداپ ايبات شەگۋى, قويدىڭ (ارۋجان باعزات) ەكى قوشقارمەن بىرگە ساحناعا كوتەرىلىپ, كۇلدىرە سويلەۋى, باسقا دا جانۋارلار مەن اڭداردى سومداعان تەاتر ارتيستەرىنىڭ ويىنى كىشكەنتاي كورەرمەندەردى بىرەسە كۇلدىرىپ, بىرەسە ويلانتىپ, شات-شادىمان كۇيگە بولەدى.
وسىلايشا ەلوردالىق بالدىرعاندار ناۋرىز مەرەكەسىندە ۋاقىت پەن تابيعات تۋرالى كونە تۇسىنىكتى قايتادان ەسكە ءتۇسىرىپ, مەرەكەنىڭ ءمانىن, ون ەكى جىلدىڭ پايدا تولۋ تاريحىن, ساحنا ونەرى مەن ونداعى ءان-بي ارقىلى تەرەڭ تارازىلادى.