"جۇمىسپەن قامتۋدىڭ 2020-2021 جىلدارعا ارنالعان جول كارتاسى" باعدارلاماسى اياسىندا جالاعاش اۋدانىنا 2 ملرد تەڭگەدەن استام قارجى بولىنگەن, - دەپ حابارلادى قىزىلوردا وبلىسى اكىمدىگىنىڭ ءباسپاسوز قىزمەتى.
ماقسات - جۇمىسسىز ازاماتتاردى كاسىپپەن قامتۋ. اۋداننىڭ ەلدى مەكەندەرىندە 18 جوبانى ىسكە اسىرۋ جوسپارلانۋدا, ونىڭ 14-ءى اۋدان ورتالىعىندا جۇزەگە اسىرىلادى.
اۋدان بويىنشا 682 جۇمىس ورنى قۇرىلىپ, ونىڭ 343 جۇمىسسىز رەتىندە تىركەلگەن ازاماتتار قابىلدانادى.
"جۇمىسپەن قامتۋدىڭ 2020-2021 جىلدارعا ارنالعان جول كارتاسى" باعدارلاماسى اياسىندا بيىل اۋداندا اققىر اۋىلدىق وكرۋگىندەگى №188 ورتا مەكتەپ پەن ماقپالكول اۋىلدىق وكرۋگىندەگى ءا.وڭالبەكوۆ اتىنداعى №117 ءبىلىم ۇياسى كۇردەلى جوندەۋدەن وتەدى. ول ءۇشىن جۇمىسسىز رەتىندە تىركەلگەن 35-تەن اسا ازامات جۇمىسقا قابىلدانادى. سونداي-اق اۋداندىق سپورت جانە دەنە شىنىقتىرۋ بولىمىنە قاراستى ناركەسكەن سپورت كلۋبى مەن م.شامەنوۆ ەلدى مەكەنىندەگى سپورت الاڭى قايتا جوندەۋدەن وتەدى.
سونداي-اق اۋداندىق تۇرعىن ءۇي كوممۋنالدىق شارۋاشىلىعى, جولاۋشىلار كولىگى جانە اتوموبيل جولدارى بولىمىنە قاراستى بيىل اقسۋ ەلدى مەكەنىنە كىرەبەرىس اۋداندىق ماڭىزى بار اۆتوموبيل جولىن جارىقتاندىرىلادى. سونىمەن قاتار "سامارا-شىمكەنت-تاڭ" مەن "سامارا-شىمكەنت-جوسالى-جالاعاش-قاراكەتكەن" اۆتوجولدارى ورتاشا جوندەۋدەن وتەدى.