وقۋ-جاتتىعۋ جيىندارىن ۇيىمداستىرۋ جانە باقىلاۋ ءۇشىن قۇرىلعان قازاقستان ۇلتتىق وليمپيادالىق كوميتەتىنىڭ جەدەل شتابى ۇلتتىق قۇرامالاردىڭ وقۋ-جاتتىعۋ جيىندارىن وتكىزۋ مەن ۇيىمداستىرۋدىڭ ۋاقىتشا توقتاتىلاتىنى تۋرالى رەسمي تۇردە مالىمدەيدى, دەپ حابارلايدى Egemen.kz باسىلىمى Olympic.kz پورتالىنا سىلەمە جاساپ.
1 شىلدەدەن باستاپ بارلىق قۇراما كوماندالاردىڭ وقۋ-جاتتىعۋ جيىندارى بەلگىسىز مەرزىمگە توقتاتىلدى. مۇنداي شەشىم قازاقستاندا كوروناۆيرۋس ىندەتىنىڭ ورشۋىنە جانە كوپتەگەن ءىرى حالىقارالىق جارىستاردىڭ كەيىنگە شەگەرىلۋىنە بايلانىستى قابىلدانعان.
سونىمەن بىرگە, قازىرگى تاڭدا جاتتىعۋ جيىندارىن وتكىزىپ جاتقان كوماندانىڭ بارلىعى توقتاتىلىپ, بۇدان كەيىن جوسپارلانعان جيىندار وتپەيتىن بولادى.
"مۇنداي شەشىم قازىرگى تاڭدا جاعدايدىڭ ۋشىعۋىنا بايلانىستى قابىلداندى. وسىعان قاراماستان بىرنەشە قۇراما كوماندالار وزدەرىنىڭ جاتتىعۋ جيىندارىن ويداعىداي جاقسى وتكىزىپ ۇلگەردى. ال كەيبىر كوماندا بارلىق قاتاڭ تالاپتى ساقتانا وتىرىپ, سپورت نىساندارىندا جاتتىعۋدى جالعاستىرۋدا. سپورتشىلاردىڭ دەنساۋلىعى ءبىرىنشى ورىندا بولعاندىقتان, جاعدايدى ەسكەرىپ, جاتتىعۋ جيىندارىن توقتاتقاندى ءجون سانادىق. سونداي-اق, بۇدان كەيىنگى جوسپارلانعان جيىنداردى بەلگىسىز ۋاقىتقا كەيىنگە شەگەرىپ, سپورتشىلاردى وقۋشاۋلاعاندى دۇرىس تاپتىق", - دەيدى جەدەل شتابتىڭ جەتەكشىسى, سپورت ديرەكتسياسىنىڭ ديرەكتورى ەلسيار قاناعاتوۆ.
1-29 ماۋسىم ارالىعىندا 12 سپورتتىق نىساندا 26 وقۋ-جاتتىعۋ جيىندارى وتكىزىلدى. وعان 22 ۇلتتىق قۇراما كوماندالارى قاتىستى. وجج قاۋىپسىزدىك شاراسى قاتاڭ ساقتالعان سپورت نىساندارىندا كەزەڭ-كەزەڭىمەن ءوتتى. جيىننىڭ الدىندا سپورتشىلار COVID-19 ءۇشىن مىندەتتى تەستتى تاپسىردى.
ۇوك اككرەديتاتسياسىنان وتكەن مامانداندىرىلعان سپورتتىق بازالار قازاقستان رەسپۋبليكاسى مەملەكەتتىك باس سانيتار دارىگەرىنىڭ 10.05.2020 جىلى شىعارىلعان №36 سپورتتىق نىساندار, بازالار جانە زالداردىڭ جۇمىس ىستەۋ الگوريتمى, «قازاقستان رەسپۋبليكاسى تۇرعىندارى اراسىندا كوروناۆيرۋس ينفەكتسياسىنىڭ الدىن الۋعا بايلانىستى ءىس-شارالاردى ءارى قاراي قاتالداتۋ» تۋرالى قاۋلىسىنا ساي سانيتارلىق-دەزينفەكتسيالى رەجيمدى قاتاڭ ساقتاعاۋىمەن وقۋ-جاتتىعۋ جيىندارى ءوتتى.