ماي اۋدانىنداعى مايتۇبەك اۋىلىنداعى مەكتەپ عيماراتى 1969 جىلى قولدانىسقا بەرىلگەندىكتەن توزىعى جەتىپ تۇر. جىل سايىن كۇردەلى جوندەۋدەن وتەدى. اۋداندىق اكىمدىك بيىل جازدا ۇلگەرسە مەكتەپ ىشىنە دارەتحانالار ورناتىلىپ, جىلۋ قازاندىقتارى اۋىستىرىلماق.
مەكتەپ ديرەكتورى ءلايلا ەلەۋكەەۆانىڭ ايتۋىنشا, 2001 جىلى مەكتەپ بىتىرگەن تۇلەكتەر دەمەۋشىلىك جاساپ «مەكتەبىمە تاعزىم» شاراسى بارىسىندا شاحمات كابينەتىن, 2002 جىلعى تۇلەكتەر دومبىرا سىنىبىن اشىپ بەرىپتى.
وڭتۇستىكتەن سولتۇستىككە قونىس اۋدارۋ باعدارلاماسىمەن تاراز قالاسىنان كوشىپ كەلگەن سامال مولداباەۆانىڭ يسلام, جەڭىس, يكرام, مەرەي ەسىمدى بالالارى وقۋشىلاردىڭ ورتاسىنا قوسىلدى.
بىلتىر «ديپلوممەن – اۋىلعا!» باعدارلاماسى بويىنشا ينفورماتيكا ءپانىنىڭ مۇعالىمى ريزا جۇماشەۆا, ەڭبەك ءپانىنىڭ مۇعالىمى ماحاببات ورالبەكقىزى اۋىلعا كەلىپ, مۇعالىمدەر سانى 22-گە جەتتى.
ءبارى جاقسى-اق دەلىك, بىراق تۇيتكىل نەدە دەگەنگە كەلەيىك. مايتۇبەك اۋىلىنداعى شاعىن جيناقتى مەكتەپ ارالاس, قازاق جانە ورىس تىلدەرىندە ءبىلىم بەرەدى. مەكتەپتە 77 وقۋشى وقيتىن بولسا, ولاردىڭ 57-ءى قازاق بالاسى ەكەن. ءبىرىنشى سىنىپتا 9 وقۋشى بار. 62 وقۋشى قازاق تىلىندە, 15 وقۋشى ورىس تىلىندە وقيدى. مەكتەپ جانىنداعى شاعىن ورتالىقتا 18 بالا تاربيەلەنۋدە. ال ەندى اۋىلدا تۇراتىن وزگە ەتنوس وكىلدەرىنىڭ بالالارى انتون, كريستينا بوككتار, ايلين ۆوروشيلوۆا, داريا ستەپانوۆا, يليا ۆولوشوك, فايزۋللا سۋلتانوۆ, ۆلاديمير بولشاكوۆ, ماليكا ۋمارحادجيەۆالار قازاق تىلىندە وقيدى.
– ورىس تىلىندە وقيتىن بالالارعا كىمدەر ساباق بەرەدى؟, – دەگەن سۇراعىمىزعا مەكتەپ ديرەكتورى «قازاق تىلىندە ساباق بەرەتىن مۇعالىمدەر ەكى جاققا بىردەي ۇلگەرەدى», دەپ جاۋاپ بەردى.
شالعاي اۋىلداعى ارالاس مەكتەپ ماسەلەسى ارينە, تاڭعالارلىق شەتىن جاعداي. شاعىن اۋىلعا شاعىن جيناقتى ارالاس مەكتەپ نە ءۇشىن قاجەت؟ اۋىل بالاسى قالاي ءبىلىمدى بولماق؟ جانە بۇل تۇيتكىل جالعىز مايتۇبەك اۋىلىندا عانا ەمەس ەكەنى بەلگىلى, وڭىردەگى باسقا دا اۋىلداردا ءالى دە ەشقانداي تيىمدىلىگى جوق وسىنداي ارالاس مەكتەپتەر قاتارى ازايار ەمەس.
پاۆلودار وبلىسى,
ماي اۋدانى