كەنشىلەر استاناسىندا بۇقارالىق اقپارات قۇرالدارى كۇنى مەرەكەسىندە قوعام بەلسەندىلەرى تاعىلىمدى ءىس تىندىردى, دەپ حابارلايدى Egemen.kz
بۇگىن قاراعاندى قالاسىندا جۋرناليست, ساتيريك, ۇستاز مارتبەك توقمىرزا تۇرعان قۇرىلىسشىلار داڭعىلىنداعى №13 ءۇيدىڭ قابىرعاسىنا ەسكەرتكىش تاقتا ورناتىلدى. تاربيەلىك ءمانى زور ونەگەلى ءىستىڭ باسى-قاسىندا مارقۇمنىڭ شاكىرتتەرى ءجۇردى.
مارتبەك توقمىرزا 1968 جىلدىڭ 7 ناۋرىزىندا قاراعاندى وبلىسىنىڭ قارقارالى اۋدانىندا دۇنيەگە كەلگەن. جۋرناليستيكاداعى ەڭبەك جولىن 1992 جىلى ءال-فارابي اتىنداعى قازمۋ-دىڭ جۋرناليستيكا فاكۋلتەتىن تامامداعاننان كەيىن, «قازاقستان-قاراعاندى» تەلەارناسىندا باستاعان.
ودان كەيىن حالىقارالىق «ازاتتىق» راديوسىندا ەڭبەك ەتتى. ءومىرىنىڭ سوڭعى جىلدارى ە.بوكەتوۆ اتىنداعى قارمۋ-دىڭ جۋرناليستيكا كافەدراسىندا وقىتۋشىسى بولىپ, ۇستازدىق قىزمەتپەن اينالىستى.
مارتبەك توقمىرزا 1999 جىلى حالىقارالىق «شابىت» فەستيۆالىنىڭ «جۋرناليستيكا» اتالىمى بويىنشا لاۋرەاتى بولعان. «ماسەلەنىڭ ءمانى», «جىمياسىڭ سەن نەگە؟» اتتى كىتاپتاردىڭ اۆتورى.
تالانتتى جۋرناليست, ۇلاعاتتى ۇستاز 2010 جىلى دۇنيەدەن ءوتتى.