شىمكەنت قالاسىندا اداسىپ قالعان ءۇش جاسار قىزدى پوليتسەيلەر دەر كەزىندە جولدا جۇرگەنىن بايقاپ, اكەسىنە تاپسىردى, - دەپ حابارلادى Egemen.kz.
19 ماۋسىمدا پاترۋلدىك پوليتسيا پولكىنىڭ قىزمەتكەرلەرى ا.تاسقىنباەۆ پەن م.مۋسين تولە بي كوشەسى مەن ادىربەكوۆ كوشەلەرىنىڭ قيىلىسىندا قوعامدىق قاۋىپسىزدىكتى قامتاماسىز ەتىپ تۇرعان. سول ۋاقىتتا جاياۋ جۇرگىنشىلەر جولاعىنان شامامەن ءۇش جاسار قىزدىڭ جالعىز ءوتىپ بارا جاتقانىن بايقاعان.
پوليتسەيلەر تەز ارادا قىزدى توقتاتىپ, اتا-اناسىن سۇراستىرادى. پوليتسيانىڭ كەزەكشى بولىمدەرىنە حابار بەرەدى دە, سول ماڭدا ورنالاسقان بازاردىڭ اكىمشىلىگىنە بارىپ, داۋىس زورايتقىش ارقىلى جوعالعان قىز تۋرالى حابارلاما بەرۋىن وتىنەدى. ناتيجەسىندە, قىزدىڭ اپكەسى تابىلدى. كەيىن ولاردىڭ اكەسى كەلىپ, ءتارتىپ ساقشىلارىنا قىراعىلى مەن جەدەل ارەكەتتەرى ءۇشىن ريزاشىلىعىن ءبىلدىردى.