جامبىل وبلىسىندا قۇرىلىس جۇمىستارى جۇيەلى جۇرگىزىلمەي وتىر

بۇل رەتتە جامبىل وبلىسىنىڭ اكىمى بەردىبەك ساپارباەۆ مونيتورينگتىك توپتار مەن مەردىگەرلىك ۇيىمداردىڭ وكىلدەرىمەن كەزدەسىپ, تاراز قالاسى بويىنشا "جۇمىسپەن قامتۋدىڭ جول كارتاسى – 2020" باعدارلاماسىنىڭ جۇزەگە اسىرىلۋ بارىسىن سىنعا الدى. سونىمەن قاتار, نىسانداردى ۋاقىتىلى تاپسىرۋدى جۇكتەدى.

بيىل تاراز قالاسىندا "جۇمىسپەن قامتۋدىڭ جول كارتاسى" بويىنشا جۇزەگە اسىرىلىپ جاتقان قۇرىلىس جۇمىستارىنىڭ باسىم بولىگىن جەرگىلىكتى كومپانيالار اتقارۋدا. دەگەنمەن, جۇمىس ءتيىستى قارقىندا ورىندالىپ وتىرعان جوق. تاراز قالاسىنىڭ اكىمى ايتقازى قارابالاەۆ قۇرىلىسشىلاردىڭ تاپ بولىپ وتىرعان كەدەرگىلەرى تۋرالى ايتىپ بەردى. "كەيبىر مەردىگەرلەر بىردەن بىرنەشە جوبالارعا جاۋاپتى بولعاندىقتان, جۇمىس كۇشى مەن تەحنيكالاردىڭ جەتىسپەۋشىلىگى تۋىنداۋدا. جالپى, تاراز قالاسىندا "جۇمىسپەن قامتۋدىڭ جول كارتاسى" بويىنشا جالپى قۇنى 15 ميللياردتان استام تەڭگەگە 389 جوبانى جۇزەگە اسىرۋ جوسپارلانعان. 361 جوبا بويىنشا جەڭىمپاز انىقتالعان. قالعان 28 جوبانىڭ 26-سى وڭتايلاندىرۋ ءۇشىن مەملەكەتتىك ۆەدومستۆوارالىق كوميسسيانىڭ قاراۋىنا ۇسىنىلدى", دەدى قالا اكىمى. بۇل رەتتە بەردىبەك ساپارباەۆ جوسپارلانعان بارلىق جوبالاردىڭ ىسكە اسىرىلۋى كەرەكتىگىن اتاپ ءوتتى. "جوبالاردىڭ سانىن ازايتۋ – جاعدايدان شىعۋدىڭ جولى ەمەس. ىسكە اسىرىلماعان جوبالاردى جاڭا جوبالارمەن اۋىستىرماڭىزدار. باستالعان ءىس اياعىنا دەيىن جەتۋى ءتيىس. سونداي-اق, باستى تالاپ – جۇمىس ساپاسى بولىپ قالاتىنىن ۇمىتپاڭىزدار", دەدى ول.

قالا اكىمى ايتقازى قارابالاەۆتىڭ ايتۋىنشا, 213 جوبا بويىنشا قۇرىلىس جۇمىستارى جۇرگىزىلۋدە. ال, 29 نىساننىڭ قۇرىلىسى اياقتالعان. مۇندا بارلىعى 2 مىڭنان استام ادام جۇمىس ىستەيدى. ولاردىڭ جارتىسى "جۇمىسپەن قامتۋ ورتالىعى" ارقىلى قامتىلعان. جوسپارلانعان 5,6 مىڭ جاڭا جۇمىس ورنى دا ۋاقىتىلى اشىلماعان. بۇل جۇمىستار 17 كومپانيانىڭ سىلبىرلىعىنان كەشىگىپ وتىر ەكەن. بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ مالىمدەدى. ماسەلەن, 19 كوشەنى جوندەۋ, 3 سۋ قۇبىرىن اۋىستىرۋ جۇمىستارىنىڭ مەرزىمى كەشىكتىرىلۋە. ال, 17 اۋلانى اباتتاندىرۋ جۇمىستارى ءالى كۇنگە اياقتالماعان. جيىن بارىسىندا بەردىبەك ساپارباەۆ "مەردىگەرلەردىڭ ۋادەسىنە تويدىق. سوزدەن ناقتى ىسكە كوشەتىن كەز كەلدى", دەدى. ال, جامبىل وبلىسىنداعى جوندەۋ-قۇرىلىس جۇمىستارىنىڭ, سانيتارلىق تازالىق پەن وبلىس ورتالىعىنىڭ اباتتاندىرىلۋىن باقىلاۋ جونىندەگى 11 ءموبيلدى توپ جەتەكشىلەرى دە ىسكە اسىرىلماعان جوبالارعا توقتالدى. "قازفوسفات" جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى, قازاقستاننىڭ ەڭبەك ەرى مۇقاش ەسكەندىروۆتىڭ ايتۋىنشا, ت.رىسقۇلوۆ كوشەسىندە قۇرىلىس جۇمىستارى باياۋ جۇرۋدە. سونداي-اق, "مىڭبۇلاق" ىقشاماۋدانىندا شاعىن فۋتبول الاڭىن سالۋ جۇمسىسى ءالى باستالماعان. جيىندا بەردىبەك ساپارباەۆ ينجەنەرلىك ينفراقۇرىلىمدى جۇيەلى تۇردە دامىتۋدى, بارلىق جۇمىستاردى قاتار جۇرگىزۋدى تاپسىردى.

جامبىل وبلىسى