تارازدىڭ بىرقاتار نىساندارىندا سانيتارلىق تالاپ ورىندالماي تۇر

ەلىمىزدە كارانتين تالاپتارى ەنگىزىلگەلى بەرى تاراز قالاسىندا دا ءتيىستى نىساندار جۇمىسىن توقتاتقان بولاتىن. ءبىرىنشى كەزەكتە ادامداردىڭ دەنساۋلىعى مەن قاۋىپسىزدىگى باستى نازارعا الىنىپ, كوپتەگەن جەرلەر قاشىقتىقتان جۇمىس ىستەۋگە تارتىبىنە كوشكەن. كەيىننەن كارانتين تالاپتارى تولىق الىنباسا دا, ءبىرشاما جەڭىلدەتىلىپ, ءتيىستى نىساندارعا جۇمىسىن قايتا باستاۋعا رۇقسات بەرىلدى. دەگەنمەن, بۇگىنگى تاڭدا تاراز قالاسى بويىنشا جۇمىسىن قايتا باستاعان كەيبىر ساۋدا ورىندارى مەن قوعامدىق تاماقتانۋ نىساندارىندا سانيتارلىق تالاپتار تولىق ساقتالماي وتىر. بۇگىندە بىرىنە جان قايعى بولسا, بىرىنە مال قايعى بولىپ تۇر. ءبىرى قاۋىپتى ناۋقاستى جۇقتىرىپ, دەنساۋلىعىمەن الەك بوپ جۇرسە, ەندى ءبىرى تابىس تابۋدىڭ سوڭىنا ءتۇسىپ, تالاپتاردى ساقتاۋدى ۇمىت قالدىرعان.

سانيتارلىق تالاپتاردى مەيلىنشە ساقتاۋ كەرەكتىگىن ەسكەرتىپ كەلگەن ماماندار ەندى ءتيىستى نىساندارعا ايىپپۇل سالۋعا كىرىستى. كارانتين تالاپتارىنا بايلانىستى كونە شاھاردا رەيد جۇمىستارى جۇرگىزىلىپ, تالاپقا ساي بولماعان بىرقاتار نىساندارعا ارنايى حاتتامالار تولتىرىلدى. بۇل ورايدا تاراز قالاسى اكىمىنىڭ ورىنباسارى اسحات ەسەنعاليەۆ جانە پوليتسيا قىزمەتكەرلەرى مەن تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ باسقارماسىنىڭ ماماندارى قالاداعى ساۋدا ورىندارى مەن تاماقتانۋ نۇكتەلەرىن ارالادى. ناتيجەسىندە, كوپتەگەن كەمشىلىكتەر انىقتالعان. ءتىپتى شاھار تۇرعىندارىنىڭ ءوزى كوروناۆيرۋس دەيتىن قاۋىپتى ىندەتكە جاۋاپسىز قاراپ, تارازدا ىندەتتىڭ كوبەيۋىنە جول اشىپ وتىر ەكەن. ءبىر كەشتە عانا جۇرگىزىلگەن رەيد بارىسىندا تاراز قالاسى بويىنشا 8 زاڭبۇزۋشىلىق تىركەلگەن. "ماسەلەن, رەيد بارىسىندا وبلىس ورتالىعىنداعى "سالەم" كافەسى قىزمەتكەرلەرىنىڭ مەديتسينالىق قولعاپسىز قىزمەت كورسەتىپ جۇرگەندىگى, كەلۋشىلەردىڭ جاعدايى مەن مەديتسينالىق ماسكالارىنىڭ تەكسەرىلمەيتىندىگى انىقتالدى. جالپى, قالادا سانيتارلىق تالاپتاردىڭ تولىق ورىندالماي وتىرعاندىعىنا كوز جەتكىزدى", دەيدى قالا اكىمىنىڭ ورىنباسارى.

سونىمەن قاتار, تاراز قالاسىنا قاراستى "زا لينيەي" ايماعىنداعى ازىق-ت ۇلىك دۇكەندەرى مەن كولىك جۋ ورىندارىندا دا زاڭبۇزۋشىلىقتار ورىن العان. سونداي-اق, "Loto club" ويىن-ساۋىق مەكەمەسىنىڭ اكىمشىلىگى حاتتامانى راسىمدەۋدەن باس تارتقان. بۇل رەتتە تاراز قالاسىنىڭ اكىمى ايتقازى قارابالاەۆ كەزەكتى بريفينگ كەزىندە تۇرعىندارعا جانە كاسىپكەرلەرگە ازاماتتاردىڭ ءتارتىبى مەن قاۋىپسىزدىگىن قامتاماسىز ەتۋ قاجەتتىگىنە بايلانىستى شەكتەۋلەرگە تۇسىنىستىكپەن قاراۋدى سۇراعان بولاتىن. سەبەبى, بۇگىنگى تاڭدا كوروناۆيرۋس ىندەتىن جۇقتىرعاندار سانى جامبىل وبلىسىندا 600-گە جەتسە, ونىڭ باسىم بولىگىن تاراز قالاسى قۇراپ وتىر. كۇن ساناپ كوبەيىپ كەلە جاتقان ىندەتتىڭ بەتى قاۋىپتى. سوندىقتان دا ءاربىر جەكەلەگەن تۇرعىنداردان باستاپ, ءتۇرلى نىسانداردىڭ يەلەرى مەن قىزمەتكەرلەرىنىڭ دە سانيتارلىق تالاپتاردى قاتاڭ ساقتاعانى دۇرىس-اق. "اتاپ ايتقاندا, قوعامدىق تاماقتانۋ ورىندارىنا كەلۋشىلەر سانى 50 ادامعا دەيىن بولۋى كەرەك. مۇنداي نىسانداردىڭ جۇمىس ۋاقىتى تۇنگى ساعات 22:00-گە دەيىن شەكتەلگەن. ال, جۇمىس ىستەپ جاتقان بيزنەس سۋبەكتىلەرى قاتاڭ تالاپتاردى ساقتاۋى كەرەك", دەيدى اسحات ەسەنعاليەۆ.

"اۋرۋ باتپانداپ كىرىپ, مىسقالداپ شىعادى" دەگەن ءسوز بار. كوروناۆيرۋس ىندەتىنىڭ قاۋىپتى ەكەنىن سالا ماماندارى ايتىپ تا, جازىپ تا ءجۇر. سوندىقتان بۇگىنگىدەي جاعدايدا كارانتين تالاپتارىن ساقتاۋدىڭ ماڭىزى زور. بۇل جەردە ءبىرىنشى كەزەكتە تابىس ەمەس, تاعدىر تۇرعانى ابزال. بۇگىندە تاراز قالاسىنىڭ كوشەلەرىندە ينفەكتسيانىڭ تارالۋىن بولدىرماۋ ماقساتىندا كۇن سايىن جاپپاي دەزينفەكتسيالىق جۇمىستارى جۇرگىزىلۋدە. سوڭعى ەكى كۇننىڭ وزىندە ماماندار ارنايى 9 بىرلىك تەحنيكانى پايدالانا وتىرىپ, 2 ميلليون 175 مىڭ شارشى مەتر جەردى زالالسىزداندىرعان. ونىڭ ىشىندە 67 كوشە, ءتۇرلى الەۋمەتتىك نىسانداردىڭ اۋماقتارى, بالالار الاڭدارى, ساياباقتار سياقتى ورىندار بار. بىراق, كارانتين تالاپتارىن ساقتاۋدى ءاربىر ادام وزىنەن باستاماسا, جۇمىس ىستەپ تۇرعان نىساندار ادامداردىڭ دەنساۋلىعىنا بەي-جاي قارايتىن بولسا, كۇن سايىن جۇرگىزىلىپ جاتقان دەزينفەكتسيانىڭ دا, وبلىس دەڭگەيىندە قابىلدانىپ جاتقان شارالاردىڭ دا پايداسى شامالى.

جامبىل وبلىسى