جامبىل وبلىسىنىڭ اكىمى بەردىبەك ساپارباەۆ تاراز قالاسىنداعى بىرقاتار نىسانداردى ارالادى. ول اۋەلى "مارت" ساۋدا جانە ويىن-ساۋىق ورتالىعىنىڭ جانىندا ورنالاسقان "اربات" جاياۋ جۇرگىنشىلەر جولىنىڭ ءۇشىنشى كەزەڭىنىڭ قۇرىلىسىمەن تانىستى, - دەپ حابارلايدى Egemen.kz.
جوبالاۋشىلاردىڭ يدەياسى بويىنشا, "اربات" جاياۋ جۇرگىنشىلەر جولى "كونە تاراز" كەشەنى مەن قاراحان بابا كەسەنەسىن بايلانىستىرادى. مۇندا جالپى اۋدانى 2,5 گەكتاردى قۇرايتىن ۇزىندىعى 320 مەترلىك سازدى سۋبۇرقاق ىسكە قوسىلادى. سونداي-اق, سەگىز تۇرلى اعاشتىڭ 160-تان استام كوشەتى وتىرعىزىلىپ, جارىقتاندىرىلۋ جۇرگىزىلەدى. كونە شاھاردىڭ كەلبەتىن ارتتىرۋ ءۇشىن ورىندىقتار مەن بەسەدكالار ورناتىلادى. سونىمەن قاتار, 18 مىڭ شارشى مەترگە ورنەكتاستار توسەلەدى. مۇنداعى جۇمىسقا بارلىعى 50 ادام تارتىلعان جانە ولاردىڭ ورتاشا جالاقىسى 100 مىڭ تەڭگەنى قۇرايدى.
مەردىگەر ۇيىمنىڭ ديرەكتورى ەركەبۇلان ەگىزباەۆتىڭ ايتۋىنشا, نىساندى مەرزىمىنەن بۇرىن تاپسىرۋ كوزدەلۋدە ەكەن. ياعني, نىسان شىلدە ايىنىڭ سوڭىندا تاپسىرىلادى دەپ كۇتىلۋدە. بۇگىنگى تاڭدا جۇمىستىڭ 50 پايىزدان استامى اياقتالعان. جاياۋ جۇرگىنشىلەر اللەياسىنىڭ جانىنا ساۋدا پاۆيلوندارىن سالۋ جوسپارلانعان. تاراز قالاسىندا وتكەن عاسىردىڭ باسىندا سالىنعان "اۋليە-اتا" مەشىتىن قايتا قالپىنا كەلتىرۋ جۇمىستارى دا قولعا الىنۋدا. بۇل جۇمىستار بيۋدجەتتەن تىس قاراجاتتار ەسەبىنەن اتقارىلۋدا.
سونداي-اق, بەردىبەك ساپارباەۆ "ATHLETIC" كوپفۋنكتسيونالدى سپورت كەشەنىندە دە بولدى. كەشەننىڭ بارلىق بولمەلەرى اۆتونومدى جىلىتۋ, ىستىق جانە سالقىن سۋمەن قامتىلعان. كەلۋشىلەر ءۇشىن دۋش, كيىم اۋىستىراتىن جانە جۋىناتىن بولمەلەرى بار. مۇندا فۋتبول, ۆولەيبول, بوكس, كۇرەستىڭ بارلىق تۇرلەرى, دزيۋدو, تاەكۆوندو, اۋىر اتلەتيكا, ارمرەستلينگ جانە تاعى دا باسقا سپورت تۇرلەرى بويىنشا جاتتىعۋعا بولادى. سونىمەن قاتار, بەردىبەك ساپارباەۆ تاراز قالاسى, "سالتانات" ىقشاماۋدانىنداعى №19, 20, 22, 23 كوپپاتەرلى تۇرعىن ۇيلەردى جاڭعىرتۋ جۇمىستارىنىڭ ساپاسىن تەكسەردى. مۇندا اكىم جەرگىلىكتى تۇرعىندارمەن كەزدەستى. وبلىس اكىمى مەملەكەت تۇرعىنداردىڭ ءۇيىن جوندەۋگە قوماقتى قارجى ءبولىپ وتىرعانىن, ەندى تۇرعىندار تاراپىنان دا ورتاق جاۋاپكەرشىلىك بولۋى قاجەتتىگىن, تۇرعىن ءۇيدىڭ جاعدايىن وزدەرىنىڭ دە باقىلاۋدا ۇستاۋى كەرەكتىگىن ايتتى.
جالپى, تاراز قالاسىندا 797 كوپپاتەرلى تۇرعىن ءۇي جاڭعىرتۋ جۇمىستارىن قاجەت ەتەدى. اعىمداعى جىلى بيۋدجەت قاراجاتى ەسەبىنەن جالپى قۇنى 3,4 ميلليارد تەڭگەگە 80 تۇرعىن ءۇيدى جاڭعىرتۋ جوسپارلانعان. سونىمەن قاتار, 24 تۇرعىن ۇيدە 1,1 ميلليارد تەڭگەگە ءتيىستى جۇمىستار باستالادى. قاراجات بۇل ماقساتقا 7 جىلعا دەيىنگى مەرزىمگە 0,1 پايىزدىق مولشەرلەمەمەن قايتارىمدى نەگىزدە بولىنگەن.
جامبىل وبلىسى