بيىل وبلىستا "ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ "ەڭبەك" مەملەكەتتىك باعدارلاماسى ارقىلى جوبالاردى جۇزەگە اسىرۋعا التى جۇزدەن استام گرانتتى جۇزەگە اسىرۋ جوسپارلانۋدا, - دەپ حابارلايدى Egemen.kz.
1350 ادام كاسىپكەرلىك نەگىزدەرىن مەڭگەرسە, 600 اقمولالىق ونلاين رەجيمىندە وقىپ شىقتى. "باستاۋ بيزنەس" جوباسىنىڭ بيزنەس-جاتتىقتىرۋشىلارى اۋدانداردا ارنايى ماركەتينگتىك زەرتتەۋ جۇرگىزدى. بۇل تالداۋ نارىقتا ونشا يگەرىلە قويماعان كاسىپ تۇرلەرىن انىقتاۋعا مۇمكىندىك بەردى. ءىرى كاسىپورىندارمەن بايلانىسۋ ارقىلى كۋرس تىڭداۋشىلارى مەن كاسىپكەرلەر اراسىنداعى ارىپتەستىك قاتىناس ورناتىلدى.
"بيىل قابىلدانعان كارانتيندىك شارالارعا بايلانىستى, Atameken Academy جانە Openstud ونلاين پلاتفورماسى ارقىلى قاشىقتان وقىتۋ قاراستىرىلعان. وقىتۋ مەرزىمى 21 كۇن توڭىرەگىندە", – دەيدى وبلىستىق كاسىپكەرلەر پالاتاسى ديرەكتورىنىڭ ورىنباسارى ەرقانات مۇسىلمانبەك.
كاسىپكەر شىنار مۇقىشەۆا جەكە بيزنەسىن دامىتۋ ءۇشىن جەڭىلدەتىلگەن نەسيە العانداردىڭ ءبىرى. كۋرستا ۇيرەنگەن كاسىپكەرلىك داعدىلارىن قولدانا وتىرىپ, سۇيىكتى ءىسىن تابىس كوزىنە اينالدىردى.
"250 مىڭ تەڭگە كولەمىندەگى گرانتقا تىگىن ماشينالارىن ساتىپ الدىم. كارانتين كەزىندە دە كاسىبىمدى توقتاتپادىم. تەك ءۇي جاعدايىندا جۇمىس ىستەدىم. ماسكالار تىكتىم", – دەيدى كاسىپكەر.
اتالعان جوبا اۋىلدى جەرلەردە عانا ەمەس, قالا تۇرعىندارىنىڭ اراسىندا دا كەڭىنەن تانىمال ەكەندىگىن اتاپ ءوتۋ كەرەك. بۇگىنگى كۇنى اقمولا وبلىسى كاسىپكەرلەر پالاتاسىنا بيزنەس داعدىلارىن مەڭگەرۋگە نيەت ەتۋشىلەردەن 2 مىڭنان استام ءوتىنىم كەلىپ تۇسكەن.