تەست كۇن سايىن وتكىزىلەتىن بولادى جانە تۇلەكتەردىڭ قاۋىپسىزدىگى تولىقتاي ساقتالعان, دەپ حابارلايدى ەلوردا اكىمدىگىنىڭ رەسمي سايتى.
نۇر-سۇلتانداعى ۇلتتىق بىرىڭعاي تەستىلەۋ (ۇبت) 21 ماۋسىم مەن 5 شىلدە ارالىعىندا ءۇش ۋنيۆەرسيتەتتە: ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە (2 589 وقۋشى, 13 اۋديتوريا), س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە (1818 وقۋشى, 7 اۋديتوريا) جانە قازاق ەكونوميكا, قارجى جانە حالىقارالىق ساۋدا ۋنيۆەرسيتەتىندە (1884 وقۋشى, 13 اۋديتوريا) وتەدى.
ۇبت وتكىزۋ ورىندارى بارلىق قاجەتتى قۇرال-جابدىقتارمەن قامتاماسىز ەتىلگەن. بيىل لەك سانى ەكى ەسە ارتىپ, بارلىعى 14 لەككە جەتتى. وسىلايشا تەست وتكەن وقۋ جىلىنداعىداي كۇنارا ەمەس, كۇن سايىن وتكىزىلەتىن بولادى. تەستىلەۋ كەزىندە پوليتسيا قىزمەتكەرلەرى قوعامدىق ءتارتىپتى قامتاماسىز ەتەدى.
تۇلەكتەردىڭ اتا-انالارى ۇيدە قالۋى ءتيىس. ولار ءۇشىن اۋديتوريالاردان ونلاين كورسەتىلىم ۇيىمداستىرىلادى. سىنىپتاردا ۇستەلدەر اراسىنداعى قاشىقتىق كەمىندە ەكى مەتر بولۋى كەرەك. نۇسقاۋلىقتا جازىلعانداي دەزينفەكتسيا قۇرالدارىمەن قامتاماسىز ەتۋ (رەسپيراتورلى ماسكالار, قولعاپتار, سانيتايزەرلەر); تەرمومەتريانىڭ ساقتالۋى, تەكسەرىلەتىن ادام مەن قىزمەتكەر اراسىنداعى قاشىقتىق كەمىندە ءبىر مەتر بولۋى; ۋنيۆەرسيتەتتەردىڭ اۋديتوريالارىندا سانيتارلىق-دەزينفەكتسيا رەجيمىن ساقتاۋ; جەلدەتۋ جۇيەلەرى مەن اۋا باپتاۋ جۇيەلەرىنىڭ جۇمىسىن قاداعالاۋ قاجەت. ۇبت كەزىندە قوعامدىق ءتارتىپتى 100 پوليتسيا قىزمەتكەرى مەن 10 ارنايى كولىك قامتاماسىز ەتەدى.
سونىمەن قاتار 9 مەديتسينا قىزمەتكەرى جانە ءۇش جەدەل جاردەم جۇمىلدىرىلدى. 24 قىزمەتكەر ءورت قاۋىپسىزدىگىن قاداعالايدى, 46 اۆتوبۋس قالا شەتىندە تۇراتىن 540 تۇلەكتى تاسىمالداۋدى قامتاماسىز ەتەدى. بيىل ۇبت-عا قاتىسۋ ءۇشىن 95% نەمەسە 6255 ادام, ونىڭ ىشىندە 3661-ءى قازاق, 2554-ءى ورىس, 40-ى اعىلشىن تىلىندە ءوتىنىش بەردى.