بۇگىن, ياعني 21 ماۋسىمنان ەلىمىزدە ۇلتتىق بىرىڭعاي تەستىلەۋ باستالدى. بيىل تەستىلەۋدى تاپسىرۋعا 131 755 تالاپكەر ءوتىنىش بىلدىرگەن. ال ۇبت-نىڭ العاشقى كۇنى 6,5 مىڭ ادام تەست تاپسىرادى.
تالاپكەر تەستىلەۋگە كىرۋ الدىندا دەزينفەكتسيالاۋدىڭ 5 كەزەڭىنەن (توننەل, اياق كيىمىن تازارتاتىن كىلەمشە, قولىن انتيسەپتيكپەن ءسۇرتۋ, دەنە قىزۋىن ولشەۋ) وتەدى. وسىدان سوڭ تەست تاپسىرۋشى ءوزىنىڭ بەت الپەتىن ارنايى باعدارلاما ارقىلى سايكەستەندىرىپ, ءوزى تاعىپ كەلگەن مەديتسينالىق ماسكاسىن كىرەبەرىستە بەرىلەتىن جاڭاسىمەن الماستىرادى. ءارى قاراي جىلداعىداي تەكسەرىسپەن (ۇبت-عا رۇقسات ەتىلمەيتىن زاتتاردىڭ بار-جوعىن باقىلاۋ) تەستىلەۋگە كىرىپ, اۋديتورياداعى اراقاشىقتىعى ساقتالعان ورىنعا وتىرادى. ال تەستىلەۋ وتكىزىلەتىن اۋديتوريا ۋاقتىلى جەلدەتىلىپ, تەستىلەنۋشىلەردىڭ ءار لەگىنەن سوڭ تازارتىلۋى ءتيىس.
پاندەميا كەزىندەگى ۇبت-دا بۇرىنعىداي اتا-انالارعا جانە باسقا دا ادامدارعا ۇبت وتكىزۋ پۋنكتەرىنە كەلۋگە جانە عيمارات اۋماعىندا بولۋعا تىيىم سالىنادى. ءاربىر اۋديتوريادا بەينەباقىلاۋ كامەراسى ورناتىلعان, اتا-انالار ءۇشىن ونلاين-ترانسلياتسيا قولجەتىمدى بولادى.
ۇلتتىق بىرىڭعاي تەستىلەۋدى وتكىزۋ بارىسىن قۇرامىنا سىبايلاس جەمقورلىققا قارسى قىزمەت وكىلدەرى مەن قوعام قايراتكەرلەرى كىرەتىن ارنايى مونيتورينگ توپتارى باقىلايدى.
ەستەرىڭىزگە سالا كەتەيىك, كارانتين تالاپتارىنىڭ كۇشەيتىلۋىنە بايلانىستى ءىرى قالالارداعى تالاپكەرلەر ۇبت وتكىزۋ پۋنكتتەرىنە ارنايى جەتكىزىلەتىنىن جازعانبىز.