وسىدان 24 جىل بۇرىن تۇڭعىش پرەزيدەنت - ەلباسى ن.نازارباەۆ اشقان ۇلتتىق ۇلاننىڭ اسكەري ينستيتۋتى بۇگىن 20-شى مەرەيتويلىق شىعارىلىمىن جاسادى. كارانتيدىك رەجىمنىڭ تالاپتارى ساقتالىپ, وعان العاش رەت جاس لەيتەنانتتاردىڭ اتا-انالارى قاتىستىرىلمادى. ديپلومداردى سالتاناتتى تۇردە تاپسىرۋ كەزىندە دە سانيتارلىق-ەپيدەميولوگيالىق نورمالار ساقتالىپ, قول الىسىلمادى, - دەپ حابارلايدى Egemen.kz.
قازاقستاندىق تۇلەكتەرمەن بىرگە قىرعىز رەسپۋبليكاسىنىڭ توعىز جانە تاجىكستان رەسپۋبليكاسىنىڭ ون وكىلى وفيتسەر اتاعىن الدى. جالپى, بيىل اسكەري ينستيتۋت ءوزىمىزدىڭ رەسپۋبليكامىز بەن كورشى ەلدەرگە 219 مامان شىعارىپ وتىر. ولاردىڭ التاۋى وقۋ ورنىن ۇزدىك ءبىتىردى, ال لەيتەنانت ارنات سىزدىقوۆقا "اسكەري وقۋ ورنىن ۇزدىك بىتىرگەنى ءۇشىن" توسبەلگىسى تابىس ەتىلىپ, ونىڭ ەسىمى ينستيتۋتتىڭ قۇرمەت تاقتاسىنا ەنگىزىلدى.
وقۋدى تابىستى اياقتاۋلارىمەن تۇلەكتەردى ۇلتتىق ۇلان باس قولباسشىسىنىڭ اتىنان ونىڭ ورىنباسارى, مەملەكەتتىك اتتەستاتتسيالىق كوميسسياسىنىڭ توراعاسى, گەنەرال-مايور البەرت ماتكاريموۆ قۇتتىقتادى. "مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ەلىمىزدىڭ وقۋ ورىندارىنىڭ قازاقستاندىقتاردىڭ بولاشاق ۇرپاعىن تاربيەلەۋدەگى, ازاماتتاردىڭ تەز وزگەرەتىن الەمدە بىلىمدىلىگى مەن باسەكەگە قابىلەتتىلىگىنىڭ جوعارى دەڭگەيىن قالىپتاستىرۋداعى ماڭىزدى ءرولىن اتاپ ءوتتى. پرەزيدەنت تالاپتارىن جۇزەگە اسىرۋ اياسىندا بۇگىن ءبىز وفيتسەرلەردىڭ كەزەكتى لەگىن شىعارىپ وتىرمىز. ىشكى ىستەر ءمينيسترىنىڭ بۇيرىعىمەن سىزدەرگە العاشقى وفيتسەرلىك شەن – لەيتەنانت بەرىلدى. مەن سىزدەردى وسى, كوپتەن كۇتكەن وقيعامەن قۇتتىقتايمىن", دەدى ول.
جاس لەيتەنانتتاردى سولتۇستىك قازاقستان وبلىسىنىڭ اكىمى اتىنان ونىڭ ورىنباسارى عاني نىعمەتوۆ قۇتتىقتادى. ء«وڭىر تۇرعىندارى ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن قۇرىلعان اسكەري ينستيتۋتقا ەرەكشە قۇرمەتپەن قارايدى جانە ول جاۋىنگەرلىك تۋدى ءوز قولىمەن تاپسىرعان جالعىز اسكەري جوعارى وقۋ ورنى ەكەنىن ماقتان ەتەدى. ينستيتۋتتىڭ كۋرسانتتارى مەن وفيتسەرلەرى ءوڭىردىڭ قوعامدىق, مادەني جانە سپورتتىق ومىرىنە بەلسەندى قاتىسادى. ءبىز اسكەري ينستيتۋتتىڭ جەكە قۇرامىنا وڭىردەگى توتەنشە جاعداي رەجىمىن قامتاماسىز ەتۋ كەزەڭىندە قوعامدىق ءتارتىپتى ساقتاۋعا قاتىسقانى ءۇشىن العىس بىلدىرەمىز», – دەدى عاني ساقتاعان ۇلى ءوزىنىڭ سوزىندە.
ءداستۇر بويىنشا تۇلەكتەرگە ينستيتۋتتىڭ جاۋىنگەرلىك تۋىمەن قوشتاسۋ ءراسىمى ءوتتى. مۇنداي قۇرمەت تۇلەكتەر اتىنان بيىلعى جىلى "التىن" مەدال يەگەرى لەيتەنانت ارنات سىزدىقوۆقا بۇيىردى. ءوز تاريحىندا ينستيتۋت 3527 جاس وفيتسەرلەردى شىعاردى, ونىڭ 252-ءى وقۋدى ۇزدىك اياقتاپ, 45-ءى "اسكەري وقۋ ورنىن ۇزدىك اياقتاعانى ءۇشىن" توسبەلگىسىمەن ماراپاتتالدى. بۇگىن ولار ۇلتتىق ۇلاننىڭ, ۇلتتىق قاۋىپسىزدىك كوميتەتى شەكارا قىزمەتىنىڭ, قورعانىس مينيسترلىگىنىڭ, مەملەكەتتىك كۇزەت قىزمەتىنىڭ جانە باسقا دا اسكەري قۇرىلىمداردىڭ بولىمشەلەرىندە قىزمەت اتقارادى.
قازىر ينستيتۋتتا جەتى ماماندىق بويىنشا وفيتسەرلەردى دايارلاۋ جۇزەگە اسىرىلادى. جوعارى وقۋ ورنىنىڭ العاشقى تۇلەكتەرى قۇرامالار مەن اسكەري بولىمدەردى باسقارادى, ال ولاردىڭ كەيبىرەۋلەرى باس قولباسشىلىقتا جانە وڭىرلىك اسكەرلەر قولباسشىلىقتارىنىڭ شتابتارىندا باسشىلىق لاۋازىمداردا قىزمەت ەتۋدە.
ۇلتتىق ۇلان اسكەري ينستيتۋتىنىڭ جەكە قۇرامى قالانىڭ جانە وبلىستىڭ قوعامدىق-ساياسي, سپورتتىق, مادەني ءىس-شارالارىنا, سونداي-اق وڭىردەگى قوعامدىق ءتارتىپتى قامتاماسىز ەتۋگە بەلسەندى قاتىسادى. ماسەلەن, ەلدەگى توتەنشە جاعدايدىڭ قۇقىقتىق رەجىمى كەزەڭىندە اسكەري وقۋ ورنىنىڭ جاساقتارى پەتروپاۆل قالاسىنىڭ كوشەلەرىندە قوعامدىق ءتارتىپتى ساقتاۋ بويىنشا مىندەتتەردى ورىندادى جانە وبلىس ورتالىعىندا كارانتيندىك شارالاردى قامتاماسىز ەتۋگە قوماقتى ۇلەس قوستى. قوعامدىق ءتارتىپتى ساقتاۋ بويىنشا قىزمەت اتقارۋ كەزىندە بارلىعى پەتروپاۆل قالاسىنىڭ 400-گە جۋىق ازاماتى ۇستالدى, ونىڭ 218-ءى اكىمشىلىك قۇقىق بۇزۋشىلىق ءۇشىن جانە 10-ى قىلمىس جاساۋ بەلگىلەرى بويىنشا جاۋاپكەرشىلىككە تارتىلدى. ماتەريالدىق-تۇرمىستىق بازانى جاقسارتۋ ماقساتىندا بيىلعى جىلى قازىرگى زاماناۋي وقۋ كورپۋسىنىڭ, كازارمانىڭ جانە سپورت كەشەنىنىڭ قۇرىلىسى, سونداي-اق اسكەري ينستيتۋتتىڭ عيماراتتارى مەن قۇرىلىستارىن كۇردەلى جوندەۋ باستالدى.
ءداستۇرلى تۇردە تۇلەكتەر كوك اسپانعا بيىل مەرەيتويلىق شىعارىلىم قۇرمەتىنە اسپانعا 20 كوگەرشىن مەن 20 شار ۇشىردى. وسىدان كەيىن تۇلەكتەر وزدەرىنىڭ العاشقى قىزمەت ورىندارىنا بۇگىننەن باستاپ اسكەري ۇشاقپەن اتتانىپ كەتەدى.
قىزىلجار