كومپانيانىڭ قوعاممەن بايلانىس قىزمەتىنىڭ حابارلاۋىنشا, ماۋسىمعا دەيىن "ەمبىمۇنايگاز" اق-دا 3 جۇمىسشىدان قاۋىپتى ىندەت جۇمىسقا شىعار الدىنداعى مىندەتتى سكرينينگتەن ءوتۋ كەزىندە انىقتالىپتى, - دەپ جازادى Egemen.kz
"ماۋسىمنىڭ باسىنان بەرى جىلىوي اۋدانىنداعى تەرەڭ-وزەك, قيسىمباي, قىزىلقوعا اۋدانىنداعى كەنباي كەن ورىندارىندا "ەمبىمۇنايگازدىڭ" 62 جانە مەردىگەر كومپانيالاردىڭ 55 قىزمەتكەرىندە COVID-19 انىقتالدى. بۇعان قوسا, مىندەتتى سكرينينگ كەزىندە "ەمبىمۇنايگازدىڭ" 19 جۇمىسشىسىنان ۆيرۋس جۇقتىرۋ جاعدايى تىركەلدى. بارلىق جۇمىسشىلار قاجەتتى ەم الۋ ءۇشىن قۇلسارى جانە اتىراۋ قالالارىنداعى جۇقپالى اۋرۋلار اۋرۋحانالارىنا جاتقىزىلدى. سيمپتومسىز اۋىرىپ جاتقان جۇمىسشىلار وتباسىنىڭ وزگە مۇشەلەرىنەن وقشاۋلانىپ, ءۇي كارانتينىنە ورنالاستىرىلدى. ال, ۇيدە وقشاۋلاۋ تالاپتارىن ساقتاۋعا مۇمكىندىگى جوق ادامدار اتىراۋ قالاسىنىڭ بەرەكە ىقشام اۋدانىنداعى ارنايى جابدىقتالعان ۇيلەرگە كارانتينگە جاتقىزىلدى. پتر تەستتەرى تەرىس ناتيجە كورسەتكەن جۇمىسشىلار جۇمىس ورىندارىندا باقىلاۋعا الىندى"-دەپ حابارلادى كومپانيانىڭ قوعاممەن بايلانىس قىزمەتى.
قازىر "جىلىويمۇنايگاز", "قاينارمۇنايگاز" باسقارمالارىنىڭ, سونداي-اق, اتالعان وندىرىستىك بولىمشەلەردە جۇمىس ىستەيتىن "ەمبىمۇنايەنەرگو" باسقارماسىنىڭ قىزمەتكەرلەرى ءۇشىن جۇمىس ۆاحتاسىنىڭ مەرزىمى 14-تەن 28 كۇنگە دەيىن ۇزارتىلىپ وتىر. ۆاحتالىق جۇمىسقا جىبەرىلەتىن "ەمبىمۇنايگازدىڭ" جانە مەردىگەر مەكەمەلەردىڭ بارلىق جۇمىسشىسى پتر-تەستتەن كەيىن ۆيرۋس جۇقتىرۋدى بولدىرماۋ ماقساتىندا 5 كۇندىك كارانتينگە جاتقىزىلادى. قاۋىپسىزدىكتى قامتاماسىز ەتۋ ماقساتىندا ورتالىق اپپاراتتىڭ ءبىر بولىگى قاشىقتان جۇمىس ىستەۋ رەجيمىنە كوشىرىلدى. ال, قىزمەتكەرلەردىڭ باس كەڭسە عيماراتىندا بولۋ ۋاقىتى تۇسكى ءۇزىلىسسىز ساعات 15.00-گە دەيىن قىسقارتىلدى.