قوستانايداعى بالالار مۋزىكا مەكتەبىنىڭ ونەرپازدارى جازعى دەمالىس كۇندەرى مەكتەپتەن تىس كونتسەرتتەر ۇيىمداستىرۋدى ءبىرتالاي جىلدان بەرى داستۇرگە اينالدىرعان. ادەتتە, مۇنداي شارالاردى تاماشالاۋعا نەگىزىنەن مەكتەپ جانىنان اشىلعان لاگەرلەر مەن بالالار كلۋبىنا قاتىساتىن بالعىندار باراتىن. ۇيىمداستىرۋشىلار بيىل ءداستۇرلى كونتسەرتتى ونلاين تۇردە وتكىزۋدى ءجون كورىپتى. باستى تاقىرىپ – اباي اندەرى, - دەپ حابارلايدى Egemen.kz.
"بيىل بۇكىل ەل كولەمىندە اتالىپ ءوتىپ جاتقان قازاقتىڭ دانىشپان ويشىلى, ۇلى اقىن اباي قۇنانباي ۇلىنىڭ 175 جىلدىعى قارساڭىندا ءبىز دە ءۇنسىز قالا المادىق. نەگىزى, اباي اندەرىنىڭ ءبىر ەرەكشەلىگى ەرەسەكتەرگە دە, ءجاسوسپىرىم بالالارعا دا بىردەي تۇسىنىكتى, سازدى-ىرعاقتى بولىپ كەلەدى. ابايدىڭ "ايتتىم سالەم, كالامقاس", "كوزىمنىڭ قاراسى" اندەرىن بالالار ءتىپتى ورتا سىنىپتاردا-اق جاتتاپ الىپ, ناقىشىنا كەلتىرىپ ورىندايدى. بيىل مەكتەپ شاكىرتتەرى ۇستازدارىنىڭ جەتەكشىلىگىمەن ۇلى اقىننىڭ اندەرىن ۇيدە ورىنداپ, ونى بەينەتاسپاعا ءتۇسىرىپ, مەكتەپتىڭ ەلەكتروندى مەكەنجايىنا سالىپ جىبەرگەن ەكەن. سولاردىڭ باسىن قوسىپ ەدىك, كولەمدى ءبىر كونتسەرتتىك باعدارلاما بولىپ شىقتى. ارينە, اباي اندەرىن كوپشىلىك الدىندا ورىنداپ, كورەرمەن ريزاشىلىعىنا بولەنگەنگە نە جەتسىن, بىراق ونلاين كونتسەرتكە دە ەتىمىز ۇيرەنىپ قالدى", - دەيدى مەكتەپ ديرەكتورى گۇلنار كۋچيكوۆا.
اباي شىعارماشىلىعىنا ارنالعان ونلاين-كونتسەرت قازاق مۋزىكالىق ادەبيەتى ءپانىنىڭ مۇعالىمى الماگۇل نۇرجانوۆانىڭ كىرىسپە سوزىمەن باستالادى. مۇعالىم ۇلى اقىننىڭ تۋىپ-وسكەن ورتاسى مەن ءحىح عاسىردىڭ ەكىنشى جارتىسىنداعى قازاقتىڭ ءداستۇرلى انشىلىك ونەرىنىڭ سىر-سيپاتىنا, دامۋ ەرەكشەلىگىن بايانداي كەلىپ, اباي اندەرىنىڭ تابيعاتىنا كەڭىرەك توقتالادى.
قوستاناي وبلىسى