مۇنى حالىق «ءبىر جاعادان باس, ءبىر جەڭنەن قول شىعارۋ» دەسە كەرەك, ءسىرا. «كوۆوركينگ» دەپ, اعىلشىن تىلىنەن اۋدارعاندا «بىرىگىپ جۇمىس جاساۋ», ياعني, كاسىپكەرلەردىڭ ءبىر عيماراتتا وتىرىپ ءوز ىستەرىن ءساتتى جۇرگىزۋىن ايتادى. بۇل تەرميندى 2005 جىلى امەريكالىق جاس باعدارلاماشى مامان برەد نيۋبەرگ ويلاپ تاپقان ەكەن. كوپ قاباتتى ۇيدەن اۋقىمدى كەڭسەنى جالعا العان برەد ءوزى سياقتى مامانداردى بىرلەسىپ جۇمىس ىستەۋگە شاقىرىپتى.
مۇنى حالىق «ءبىر جاعادان باس, ءبىر جەڭنەن قول شىعارۋ» دەسە كەرەك, ءسىرا. «كوۆوركينگ» دەپ, اعىلشىن تىلىنەن اۋدارعاندا «بىرىگىپ جۇمىس جاساۋ», ياعني, كاسىپكەرلەردىڭ ءبىر عيماراتتا وتىرىپ ءوز ىستەرىن ءساتتى جۇرگىزۋىن ايتادى. بۇل تەرميندى 2005 جىلى امەريكالىق جاس باعدارلاماشى مامان برەد نيۋبەرگ ويلاپ تاپقان ەكەن. كوپ قاباتتى ۇيدەن اۋقىمدى كەڭسەنى جالعا العان برەد ءوزى سياقتى مامانداردى بىرلەسىپ جۇمىس ىستەۋگە شاقىرىپتى.
جاقىندا شىمكەنتتە كاسىپكەرلەرگە قىزمەت كورسەتۋ ورتالىعىنىڭ باستاماسىمەن تۇڭعىش رەت ەكى كوۆوركينگ ورتالىعى اشىلدى. «ەلباسى ن.نازارباەۆ حالىققا ارناعان جولداۋىندا «2030 جىلعا دەيىن كىشى جانە ورتا بيزنەستىڭ ەل ەكونوميكاسىنا قوسار ۇلەسى ەڭ كەم دەگەندە ەكى ەسەگە دەيىن ارتۋى قاجەت دەپ ناقتىلاعان بولاتىن, – دەيدى وبلىس اكىمىنىڭ ورىنباسارى ساپاربەك تۇياقباەۆ. – بۇگىنگى كۇنى وبلىسىمىزدا 14 پەن 29 جاس اراسىنداعى 770 مىڭ جاس بار. بۇل – بولاشاق كاسىپكەرلەر, بيزنەسمەندەر مەن «جاڭا جوبالاردىڭ» ىسكە اسىرۋىنا تۇرتكى بولاتىن كوشباسشىلار. سول جاس ماماندار مەن كاسىپكەرلەردى قولداۋ ماقساتىندا ءبىز كوۆوركينگ ورتالىقتارىن اشىپ جاتىرمىز».
– كوۆوركينگ كەڭسەلەرى ءىسىن جاڭادان باستاپ جاتقان كاسىپكەرلەرگە ۇلكەن كەڭسەلەردى جالعا الۋعا شاماسى جەتپەگەن جاعدايدا وتە ىڭعايلى. بۇل ءاربىر قاتىسۋشى تاۋەلسىز بولا وتىرىپ, ءوز ىسىنە قاجەتتى ورتاق الاڭدى پايدالاناتىن جۇمىس مودەلى. ورتالىق – جاستاردىڭ اراسىندا كاسىپكەرلىك مادەنيەتىن كەڭىنەن ناسيحاتتاۋعا سەرپىن بەرىپ, اعا بۋىن كاسىپكەرلەر مەن جاس كاسىپكەرلەر اراسىنداعى ساباقتاستىق پەن اقپارات الماسۋدى قاراستىرادى, – دەيدى وقو كاسىپكەرلەرگە قىزمەت كورسەتۋ ورتالىعىنىڭ ديرەكتورى نۇرجان التاەۆ. – اتالعان ورتالىقتى قۇرۋ بارىسىندا ءبىز بىرقاتار تەجەۋلەرگە تاپ بولدىق. ايتسە دە وسىنداي ورتالىقتارى بار جانە وڭ جۇمىس ناتيجەلەرىن كورسەتىپ جاتقان ەلدەردىڭ تاجىريبەسىن ەسكەرە وتىرىپ ءوزىمىزدىڭ وڭىردە ءدال سونداي بيزنەس-ينكۋباتورلاردى قۇرۋدى شەشتىك.
اتالمىش بيزنەس-ينكۋباتوردى قۇرۋ كەزىندە ءوزىنىڭ بيزنەس-جوباسى مەن يننوۆاتسيالىق جوبالارى بار جاستار تارتىلىپتى. وسى ورتالىقتاعى بارلىق جوبالارعا, جاڭادان باستاپ جاتقان جوبا نەمەسە جۇزەگە اسىرىلىپ جاتقان جوبا بولسىن كقكو-دان قولداۋ تولىققاندى كورسەتىلەتىن بولادى. مىسالى, ەگەر جاس مامان ءوز بيزنەسىن باستايمىن دەپ نيەت بىلدىرسە, وعان يدەيانى قالاي جۇزەگە اسىرۋعا, ناقتى تاقىرىپتاردا بيزنەس وقىتۋ جۇرگىزىلىپ, قۇقىقتىق, سالىق, قارجى, بۋحگالتەرلىك ەسەپ, ت.ب. سۇراقتارىنا سالالىق اقپاراتتاردى ۇسىنادى.
راس, تىرلىگىن جاڭادان باستاپ جاتقان كاسىپكەرلەرگە ۇلكەن كەڭسەلەردى جالعا الۋ بىرقاتار قيىندىقتار تۋعىزادى. ولار جالعا الۋ قۇنىمەن قاتار, كومپيۋتەر, پرينتەر, فاكس, تەلەفون ورناتۋ, ينتەرنەت, ت.ب. شىعىنداردى تولەۋىنە تۋرا كەلەدى. ال بۇل ەكى ورتالىقتا كاسىپكەرلەرگە بارلىق جاعداي جاسالعان. وسىدان بولار, بۇگىندە وڭتۇستىكتە جاستار اراسىندا ءوز ءىسىن باستاپ, ورگە دومالاتۋ جاعى العا باسىپ كەلەدى. بولاشاقتا ءدال وسىنداي ورتالىقتاردى اۋدانداردان دا اشۋ جوسپاردا بار.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
–––––––––––––––––––––
سۋرەتتى تۇسىرگەن
ارمان ابدىراش ۇلى.