دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىردى

"دوستار, وزدەرىڭىزگە جاعىمسىز جاڭالىق جەتكىزۋىمە تۋرا كەلىپ وتىر. كوروناۆيرۋسكە تاپسىرعان سوڭعى تەستتىڭ ناتيجەسى ناشار شىقتى, مەنەن دە اۋرۋ انىقتالدى. وكىنىشكە قاراي, مەندەگى سيمپتومسىز فورما ەمەس, سوندىقتان جۇقپالى اۋرۋلار اۋرۋحاناسىندا جاتىرمىن.

سانيتارلىق شارالاردى قاتاڭ ساقتاعانىما قاراماستان, بۇل ىندەت مەنى دە اينالىپ وتپەدى.اسىرەسە, قاشىقتان, ۇيدە وتىرىپ جۇمىس ىستەي المايتىن قىزمەتكەرلەرگە قيىن. سوڭعى كۇندەرى بىرقاتار وڭىردە, ونىڭ ىشىندە كاسىپكەر, كاسىپورىن, مەديتسينا ماماندارى, مەملەكەتتىك, باق قىزمەتكەرلەرى اراسىنان ىندەت جۇقتىرعاندار قاتارى ارتۋدا. قازاقستانداعى جاھاندىق داعدارىس پەن پاندەميا سالدارىنان پايدا بولعان پروبلەمالاردى شەشۋ ءۇشىن قازىر كوپتەگەن ازامات قارقىندى جۇمىس ىستەۋدە. بىزگە ءجيى جەكە كەزدەسۋلەرگە بارۋعا, ايماقتارعا ىسساپارعا شىعۋعا تۋرا كەلەدى, مۇنداي جاعدايدا, ارينە, COVID-19 جۇقتىرۋ قاۋپى دە جوعارى.

سوندىقتان, بارشا قازاقستاندىقتان «جەكە كارانتين» ەرەجەلەرىن قاتاڭ ساقتاۋدى سۇرايمىن. دوستار, اۋرۋدىڭ الدىن الۋ شارالارىنا مۇقيات ءمان بەرىڭىزدەر.

❗تاعى دا قايتالايمىن: 1. جۇمىستا, كولىكتە, كوشەدە, دۇكەندە جانە ت.ب. جەرلەردە مۇمكىندىگىنشە اراقاشىقتىقتى ساقتاڭىز;2. ەگەر ءسىز وفيس قىزمەتكەرى بولساڭىز, مۇمكىندىگىنشە ۇيدەن جۇمىس ىستەۋگە تىرىسىڭىز. 3.تۋىس, دوستارمەن ونلاين, ۆيدەو-قوڭىراۋ جانە وزگە دە جاڭا تەحنولوگيالاردىڭ كومەگىمەن بايلانىس ورناتىڭىز;4. قوعامدىق ورىنداردا ماسكا كيىپ ءجۇرىڭىز;5. قولدى كەم دەگەندە 20 سەكۋن سابىنمەن ءجيى جۋىپ, سانيتايزەرمەن ءسۇرتىڭىز;6. ءوزىڭىزدىڭ جانە وتباسى مۇشەلەرىنىڭ تەمپەراتۋراسىن ءجيى ولشەپ تۇرىڭىز.

ەگەر بويىڭىزدان مىناداي سيمپتومداردى بايقاساڭىز: السىزدىك, باسىڭىز, تاماعىڭىز اۋىرسا, دەنە قىزۋىڭىز كوتەرىلسە - دەرەۋ دارىگەرگە حابارلاسىڭىز!

اباي بولىڭىزدار! بارشاڭىزعا زور دەنساۋلىق تىلەيمىن", - دەپ جازدى ول.