بيىل – ءوز زامانىنىڭ زاڭعار اقىنى, مەملەكەتتىك سىيلىقتىڭ لاۋرەاتى, حالىق جازۋشىسى عافۋ قايىربەكوۆتىڭ تۋعانىنا 85 جىل. سوعان وراي ءتۇرلى دەڭگەيدەگى شارالار ءوتىپ جاتقانى بەلگىلى. سونداي اتاۋلى شارانىڭ ءبىرى استانا قالاسىنداعى عافۋ قايىربەكوۆ اتىنداعى №2 مەكتەپ-گيمنازيادا ۇيىمداستىرىلدى.
بيىل – ءوز زامانىنىڭ زاڭعار اقىنى, مەملەكەتتىك سىيلىقتىڭ لاۋرەاتى, حالىق جازۋشىسى عافۋ قايىربەكوۆتىڭ تۋعانىنا 85 جىل. سوعان وراي ءتۇرلى دەڭگەيدەگى شارالار ءوتىپ جاتقانى بەلگىلى. سونداي اتاۋلى شارانىڭ ءبىرى استانا قالاسىنداعى عافۋ قايىربەكوۆ اتىنداعى №2 مەكتەپ-گيمنازيادا ۇيىمداستىرىلدى.
كەشكە اقىننىڭ جارى بادەش حامزينا, كوز كورگەن ىنىلەرى – اقىن سەرىك تۇرعىنبەك ۇلى مەن وسپان سۇلەيمەن ۇلى جانە مۇعالىمدەر مەن وقۋشىلار قاۋىمى قاتىستى. ەسكە الۋ كەشى مەكتەپ-گيمنازياداعى عافۋ قايىربەكوۆ اتىنداعى مۇراجايدا سەمينار جۇمىسىمەن باستالدى. ونى تۇڭعىش پرەزيدەنت مۇراجايىنىڭ ءبولىم مەڭگەرۋشىسى روزا قازبەكوۆا اشىپ بەردى. سودان كەيىن جينالعان قاۋىم اقىن اتىنداعى مۇراجايدىڭ جۇمىسىمەن تانىستى. سەمينار بارىسىندا وسى مەكتەپتىڭ جوعارى سىنىپ وقۋشىلارى داناگۇل عالىمجانوۆا مەن رۇستەم قوجاباەۆتىڭ «وتاننىڭ ابزال ۇلدارى» تاقىرىبىنداعى عىلىمي جۇمىستارى تىڭدالدى.
ەسكە الۋ كەشىنىڭ سوڭىنا قاراي ديرەكتوردىڭ تاربيە ءىسى جونىندەگى ورىنباسارى سالتانات كامپيتوۆا مەن پەداگوگ ايگۇل زالەتاەۆانىڭ ۇيىمداستىرۋىمەن ادەبي-مۋزىكالىق كەش وتكىزىلدى. وسى جەردە اقىننىڭ تۋعانىنا سەكسەن بەس جىل تولۋىنا ارنالعان اپتالىقتىڭ قورىتىندىسى شىعارىلدى. ءبىلىم ورداسىندا اپتا بويى وتكىزىلگەن اقىن شىعارمالارىن مانەرلەپ وقۋ, جاس اقىندار سايىسى, شىعارمالار بايقاۋى, سپورتتىق جارىس جانە سۋرەت بايقاۋى جەڭىمپازدارى ماراپاتتالدى.
كەشتى مەكتەپ-گيمنازيانىڭ ديرەكتورى گاميل شايمەردەنوۆ قورىتىندىلادى. «اقىننىڭ شىعارماشىلىق مۇراسى ءبىزدىڭ جۇرەگىمىزدە. قازاق پوەزياسى جاساپ تۇرعاندا, قازاقتىڭ رۋحاني بايلىعى بار كەزدە ونىڭ ەسىمى ەش ۋاقىتتا ۇمىتىلمايدى. ءبىز عافۋ سەكىلدى اقىندى ارقاشان ماقتان ەتەمىز», دەدى ول.
ايگۇل سەيىلوۆا,
«ەگەمەن قازاقستان».