قازىرگى تاڭدا قازاقستان ۇكىمەتى استاناداعى سۋ قورلارى پروبلەماسىن شەشۋ ماقساتىندا قۇنى 500 ملرد. تەڭگە تۇراتىن ەرتىستەن ەسىلگە دەيىن جاڭا كانال تارتۋ جونىندەگى جوبانىڭ ءمان-جايىن تالقىلاپ, قاراستىرۋ ۇستىندە. بۇل تۋرالى كەشە پارلامەنت ماجىلىسىندەگى «ۇكىمەت ساعاتى» بارىسىندا قورشاعان ورتانى قورعاۋ ءمينيسترى نۇرلان قاپپاروۆ مالىمدەدى.
قازىرگى تاڭدا قازاقستان ۇكىمەتى استاناداعى سۋ قورلارى پروبلەماسىن شەشۋ ماقساتىندا قۇنى 500 ملرد. تەڭگە تۇراتىن ەرتىستەن ەسىلگە دەيىن جاڭا كانال تارتۋ جونىندەگى جوبانىڭ ءمان-جايىن تالقىلاپ, قاراستىرۋ ۇستىندە. بۇل تۋرالى كەشە پارلامەنت ماجىلىسىندەگى «ۇكىمەت ساعاتى» بارىسىندا قورشاعان ورتانى قورعاۋ ءمينيسترى نۇرلان قاپپاروۆ مالىمدەدى.
«تاياۋدا ءبىز ۇكىمەتتە سوناۋ كەڭەس زامانىنىڭ وزىندە-اق جاسالىپ قويىلعان جاڭا جوبانى تالداي باستادىق. بۇل جوبا ەرتىستەن ەسىلگە دەيىن استانا ارقىلى جاڭا كانال قازۋدى قاراستىرادى. ەگەر ءبىز وسى ارنانى سالاتىن بولساق, جىلىنا 1 ملرد. تەكشە مەترگە دەيىن سۋ الىپ, مۇنداعى سۋدىڭ كولەمىن كۇرت ارتتىرار ەدىك», – دەپ اتاپ ءوتتى مينيستر.
ونىڭ سوزىنە قاراعاندا, جوبانىڭ ارقاسىندا كوپتەگەن ماسەلەلەردىڭ ءتۇيىنى بىردەن شەشىلگەلى تۇر.
«بىرىنشىدەن, جاڭا كانالدىڭ استاناعا دەيىنگى بويىندا 3 كول, ەلوردادان شىققاننان كەيىن تاعى 1 كول سالىنادى. استاناعا دەيىنگى 3 كولدى تەڭىز, اقجار جانە سوفى سۋ قويمالارى رەتىندە سالۋعا بولادى», – دەپ ءتۇسىندىردى مۇنى ۆەدومستۆو باسشىسى.
استانادان 30 شاقىرىم جەردە ورنالاساتىن سوفى سۋ قويماسىنىڭ سىيىمدىلىعى 2 ملرد. تەكشە مەتر سۋدى قۇراماقشى.
«2 ملرد. تەكشە مەتر سۋ دەگەنىمىز نە؟ مۇنىڭ, تۇپتەپ كەلگەندە, بارلىق 3 كولىندەگى سۋدىڭ سىيىمدىلىعى 300 ملن. تەكشە مەترگە جەتپەيتىن شورتاندى-بۋراباي كۋرورتتى ايماعىن ساقتاپ قالۋ ءۇشىن استانا ماڭىنان جاسالعان جاڭا رەكرەاكتسيالىق القاپ بولۋى ابدەن مۇمكىن», – دەپ انىقتاي ءتۇستى ن.قاپپاروۆ بۇدان ءارى.
ءمينيستردىڭ ايتۋىنشا, مۇنشا كولەمدەگى سۋ 30 ەلدى مەكەندى سۋمەن قامتاماسىز ەتۋگە مولىنان جەتەتىن بولادى. سونىمەن بىرگە, استانادان كەيىن, اقمولا وبلىسىنىڭ اۋماعىندا بۇزىلىق سۋ قويماسىن دا سالۋ جوسپارلانىپ وتىر. مۇنىڭ سىرتىندا بۇرىننان بار سەرگەەۆ جانە پەتروپاۆل سۋ قويمالارىنا تۇسەتىن سۋدىڭ كولەمىن ەكى ەسەگە ۇلعايتۋ كوزدەلۋدە.
«وسى كەزدە كانال بويىنداعى سۋارمالى ەگىستىك القاپتاردىڭ اۋقىمىن 100 مىڭ گەكتارعا دەيىن جەتكىزۋگە بولادى, – دەدى قاپپاروۆ. – ال بۇل جوبانىڭ قۇنى ونشالىقتى ارزانعا تۇسەيىن دەپ تۇرعان جوق. ونىڭ الدىن الا ەسەپ بويىنشا قۇنى 500 ملرد. تەڭگەنى قۇرايدى».
قازىرگى تاڭدا سونىمەن قاتار, استانا قالاسى اكىمدىگى دايىنداعان ساتباەۆ كانالىنان ەلورداعا دەيىن ەكى تارماق تارتاتىن تاعى ءبىر جوبا قارالىپ جاتىر. مينيسترلىكتىڭ مالىمەتى بويىنشا, كانال جىلىنا 170 ملن. تەكشە مەتر شاماسىندا سۋ بەرۋى ءتيىس.
سۇلتان بوزايعىر.