«رۋحاني جاڭعىرۋ» قازاقستاندىق قوعامدىق دامۋ ينستيتۋتى الەۋمەتتىك ماڭىزدى باعىتتار بويىنشا قولدانىستاعى زاڭنامانى تالقىلاۋ تسيكلىن جالعاستىرۋدا. جۋىردا ونلاين فورماتىندا «دەنساۋلىق ساقتاۋ سالاسىنداعى اشىقتىق: جاڭا ترەندتەر اقپارات قولجەتىمدىلىگىنە قالاي اسەر ەتەدى؟» اتتى ەكىنشى پىكىرتالاس الاڭى ءوتتى.
پىكىرتالاس الاڭى شەڭبەرىندە ساراپشىلار قولدانىستاعى دەنساۋلىق ساقتاۋ سالاسىنداعى زاڭناماداعى اقپاراتقا قول جەتكىزۋ ماسەلەسىن, اتاپ ايتقاندا, پاندەميا جاعدايىندا انىقتالعان وسال جاقتاردى تالقىلادى جانە مەملەكەت باسشىسى قاسىم-جومارت توقاەۆ جاريالاعان «حالىققا قۇلاق اساتىن مەملەكەت» تۇجىرىمداماسى شەڭبەرىندە جۇمىستى جەتىلدىرۋ بويىنشا ءوز ۇسىنىستارىن بەردى.
ديالوگتى اشا وتىرىپ, الاڭ مودەراتورى, ەۋروپالىق قۇقىق جانە ادام قۇقىقتارى ينستيتۋتىنىڭ ديرەكتورى مارات ءباشىموۆ تسيفرلاندىرۋ جانە پاندەميا اقپاراتقا قولجەتىمدىلىك رەگلامەنتىن وزگەرتۋ قاجەتتىلىگىنە يتەرمەلەگەنىن اتاپ ءوتتى.
«پرەزيدەنت اكىمشىلىگىنىڭ جانىنان قۇرىلعان وتىنىشتەردى قاراۋدى باقىلاۋ ءبولىمى ءوزىن وتە ءتيىمدى كورسەتتى. ەندى ادامدار مەملەكەت باسشىسىنا تىكەلەي جازادى. سوندىقتان دەنساۋلىق ساقتاۋ مينيسترلىگىنىڭ جانىنان ۇقساس قۇرىلىم قۇرۋ قاجەت دەپ سانايمىن», دەدى مارات ءباشىموۆ.
سونىمەن قاتار ۇەۇ «الەۋمەتتىك جانە قۇقىقتىق زەرتتەۋلەر ورتالىعىنىڭ» ديرەكتورى ايسانا سمان «اقپاراتقا قول جەتكىزۋ تۋرالى» زاڭ 5 جىل بۇرىن سول ۋاقىتتىڭ تەندەنتسيالارىن ەسكەرە وتىرىپ قابىلدانعانىن اتاپ ءوتتى. ال جاڭا جاعدايدا, ونىڭ پىكىرىنشە, وسى زاڭمەن نەمەسە «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسىمەن رەتتەۋىن قاجەت ەتەتىن ماسەلەلەر پايدا بولدى.
«بۇل سالا قاجەت, سەبەبى «اقپاراتقا قول جەتكىزۋ تۋرالى» زاڭنىڭ التىنشى بابىندا ازاماتتىڭ دەنساۋلىعىن ساقتاۋعا بايلانىستى اقپاراتقا قول جەتكىزۋ قۇقىعى شەكتەلمەيدى دەپ جازىلعان. ياعني زاڭ دەنساۋلىق ساقتاۋ سالاسىندا بولىپ جاتقان بارلىق نارسەلەردى زاڭنامامەن دە, باسقا دا نورماتيۆتىك اكتىلەرمەن دە شەكتەلمەيتىنىن تىكەلەي ايتادى», دەدى ايسانا سمان.
سونىمەن قاتار ساراپشىلار تسيفرلاندىرۋ جانە اقپاراتقا قول جەتكىزۋ حالىق اراسىنداعى الەۋمەتتىك شيەلەنىستى ازايتۋعا باعىتتالعان دەگەن پىكىر ءبىلدىردى.
تالقىلاۋعا «رۋحاني جاڭعىرۋ» قازاقستاندىق قوعامدىق دامۋ ينستيتۋتى» كەاق باسقارما توراعاسى كەمەلبەك ويشىباەۆ, پرەزيدەنت ءىس باسقارماسى اۋرۋحاناسىنىڭ سالاۋاتتى ءومىر سالتىن قالىپتاستىرۋ ورتالىعىنىڭ جەتەكشىسى مارات قۇرمانوۆ, دەنساۋلىق ساقتاۋ مينيسترلىگى, اقپارات جانە قوعامدىق دامۋ مينيسترلىگى, وڭىرلىك دەنساۋلىق ساقتاۋ باسقارمالارىنىڭ وكىلدەرى جانە ساراپشىلار قاتىستى.
ەستەرىڭىزگە سالا كەتەيىك, جاقىن ارادا قازاقستاندىق قوعامدىق دامۋ ينستيتۋتى جەر قاتىناستارى, ەكولوگيا, قارجى جانە حالىقتى الەۋمەتتىك قورعاۋ سالاسىنداعى «اقپاراتقا قول جەتكىزۋ تۋرالى» زاڭدى تالقىلاۋ بويىنشا پىكىرتالاس الاڭىن وتكىزۋدى جوسپارلاپ وتىر.