«تاتە, سالەمەتسىز بە, اۋرۋ جوق دەپ ءجۇرىپ جۇقتىرىپ الىپپىن. قايدان جۇققانىن دا بىلمەيمىن. ءبىرىنشى قىزۋىم 39 گرادۋستان اسىپ كوتەرىلدى, ىستىق تۇسىرەتىن ءدارى ءىشىپ جاتىپ قالدىم, كەلەسى كۇنى جوتەل پايدا بولدى. تاماعىم قاتتى اۋىردى. ءۇشىنشى كۇنى تەمپەراتۋرا بولماعانىمەن السىرەپ, دەلسال بولىپ تۇرا المادىم. ءتورتىنشى كۇنى دارىگەرگە قارالىپ, اناليز الىپ, تەمىرجولشىلار اۋرۋحاناسىنا جاتقىزدى. ۆيرۋس بارلىعى تولىق انىقتالعان سوڭ جاڭادان سالعان مودۋلدىق اۋرۋحاناعا الىپ كەلدى, دەيدى بىزگە حابارلاسقان وقىرمان.
ايتايىن دەگەنى, تەمىرجولشىلار اۋرۋحاناسىنىڭ جايى. سول ءۇشىن حابارلاسىپ وتىرمىن, سەبەبى ونداعى جاعدايدى مينيسترلىك پەن جالپى قوعام ءبىلۋى ءتيىس دەگەن ويدا. اۋرۋحانانىڭ جاعدايى وتە ناشار ەكەن. توسەك ورىندارى ەسكى, اجەتحاناسى كوپشىلىككە ارنالعان, گيگيەنا ساقتاۋ مۇمكىن ەمەس, جاقىندا جوندەۋدەن وتكەن دەيدى, بىراق ول جاي اتى عانا بولعانعا ۇقسايدى. بۇل پروۆيزورلىق اۋرۋحانا, اۋرۋ انىقتالعانشا ۇستاپ, ايقىندالعاندا جاڭادان سالىنعانىنا جىبەرمەك. ەڭ ماسقاراسى, ۆيرۋسقا سىناماسى تەرىسى مەن وڭ بولعان ادامداردىڭ ءبىر پالاتاعا جاتقىزىلۋى.
ء«بىزدى جاڭادان سالىنعان ارنايى اۋرۋحاناعا اۋىستىراتىنى بەلگىلى بولعاندا, پالاتامىزعا بۇرىننان تانيتىن ءبىر كەلىنشەكتى الىپ كەلدى. مىنا كىسىلەر كەتكەن سوڭ ورنى بوسايدى دەدى. ال ول كەلىنشەكتە ءالى ۆيرۋستىڭ بارى راستالماعان دا. ءبىز شىققاندا, ەشقانداي زارارسىزداندىرۋ, دەزينفەكتسيا جۇرگىزبەستەن, جۋىلماعان بولمەگە اپارىپ جاتقىزىپ قويىپتى. تانىسىم, جىلاپ تەلەفونمەن سويلەستى. كوردىڭىز بە, ءبىزدىڭ ورنىمىزعا, COVID-19-بەن ناۋقاستانعان ءبىزدىڭ جاتقان جەرىمىزگە اۋرۋى راستالماعان, ۆيرۋستىڭ بار-جوعى بەلگىسىز ونى جاتقىزعان. وسىنى جاۋاپكەرشىلىكتىڭ جوقتىعىنا ما, اياۋشىلىقتىڭ جوقتىعىنا ما, قايسىسىنا جاتقىزارىمدى دا بىلمەيمىن.
ەلگە جەتكىزىڭىزشى, وسىنداي دا جايتتار بار. ال مىنا مودۋلدىق اۋرۋحانادا مۇلدە باسقاشا, ىشىندەگى جاعدايى دا, دارىگەرلەرى دە جاقسى ەكەن. مەنىڭ اتى-ءجونىمدى جازباي-اق قويىڭىز, ءبىر جەرگە جازىپ جاتساڭىز», دەيدى جەرلەس ءسىڭىلىم.
ۆيرۋسپەن وسىلاي ويناۋعا بولا ما؟!.