كەشە كەشكىسىن جوعالىپ كەتكەن بالانىڭ ءولى دەنەسى جايىق وزەنىنەن تابىلدى, - دەپ حابارلايدى Egemen.kz.
بۇل تۋرالى توتەنشە جاعدايلار دەپارتامەنتىنىڭ ءباسپاسوز قىزمەتى ءمالىم ەتتى. بۇگىن, 11 ماۋسىمدا تۇنگى ساعات 01:56-دە 11 جاسار بالانىڭ جوعالعانى تۋرالى حابار ءتۇسىپتى. جوعالعان بالا اتىراۋ قالاسىنىڭ ماڭىنداعى ەركىنقالا-2 كەنتىندە تۇرعان.
ول كەشە, 10 ماۋسىمدا كەشكى ساعات 18:00 شاماسىندا ءىز-ءتۇسسىز جوعالىپ كەتكەن.
"ىزدەستىرۋ كەزىندە بالا تۇرعان اۋداننىڭ بارلىق توڭىرەگى تەكسەرىلىپ, جەرگىلىكتى تۇرعىنداردان سۇراستىرىلدى. جايىق وزەنىنىڭ جاعالاۋىنان ۆەلوسيپەد پەن بالانىڭ زاتتارى تابىلدى. ال, ساعات 8:10-دا دەپارتامەنتتىڭ جەدەل-قۇتقارۋ جاساعىنىڭ 5 قىزمەتكەرى, 1 تەحنيكا, 1 كينولوگيالىق قۇرام, 1 ءجۇزۋ قۇرالىمەن جايىق وزەنى تەكسەرىلدى. وكىنىشكە وراي جوعالعان بالانىڭ دەنەسى وزەننىڭ سۋعا تۇسۋگە جابدىقتالماعان جەرىنەن شىعارىلدى", - دەپ حابارلادى دەپارتامەنتتىڭ ءباسپاسوز قىزمەتى.