قازاقستاندىق دزيۋدوشى قىز گۇلجان يسانوۆا (سۋرەتتە) تاشكەنتتە ءوتىپ جاتقان دزيۋدودان الەمدىك گران-پري جارىسىنىڭ كەلەسى كەزەڭىندە التىن مەدال جەڭىپ الدى. بۇل تۋرالى Vesti.kz ءتىلشىسى حابارلادى.
بۇدان ءبىر اپتا بۇرىن الەمدىك گران-ءپريدىڭ الماتىدا وتكەن كەزەڭىندە دە التىننان القا تاققان گۇلجان 78 كيلودان اۋىر سالماق دارەجەسىندە تاعى دا وزىنە ەشكىمدى شاق كەلتىرمەدى. ءبىزدىڭ اسا اۋىر سالماقتاعى قىزىمىز فينالدا موڭعول جاۆزماا ودكحۋمەن بەلدەستى. وعان تازا جەڭىسكە جەتۋ ءۇشىن ءبىر مينۋتقا دا تولمايتىن ۋاقىت جەتكىلىكتى بولدى.
قازاقستان ايەلدەر قۇراماسى وزبەك استاناسىندا بارلىعى 5 مەدال الدى. كۇمىس مەدال 48 كيلوعا دەيىنگى سالماقتاعى الەكساندرا پودريادوۆاعا, قولا مەدالدار 57 كيلوداعى نازگۇل قۇباشەۆاعا, 63 كيلوداعى ماريان ورداباەۆاعا جانە 78 كيلوعا دەيىنگى البينا امانگەلديەۆاعا بۇيىردى.
دامير قوجامقۇل.