الەمنىڭ ءار الۋان ەلىنەن جينالعان عالىمدار وڭتۇستىك امەريكانىڭ سولتۇستىك-شىعىس قاپتالىنداعى سۋرينام رەسپۋبليكاسىنىڭ دجۋنگليىندەگى سۋ جولدارىنىڭ تاباندارىن زەرتتەي ءجۇرىپ, بۇرىن عىلىمعا بەلگىسىز بولىپ كەلگەن جان-جانۋاردىڭ 60-تان استام جاڭا ءتۇرىن تاپتى. بۇل تۋرالى Tut.By سايتى حابارلادى.
وقىمىستىلاردىڭ بۇل جولعى ولجالارى 6 ءتۇرلى باقا, 11 ءتۇرلى بالىق جانە بۇرىن جۇرت بىلمەگەن تاعى بىرنەشە جانۋارلار مەن جاندىكتەر بولدى.
Conservation International اتتى كوممەرتسيالىق ەمەس زەرتتەۋ ۇيىمىنىڭ باسشىسى تروند لارسەن ار اگەنتتىگىنىڭ تىلشىسىنە تەلەفونمەن بەرگەن اقپارىندا عالىمدار كومانداسىنىڭ ءۇش اپتاعا سوزىلعان ەكسپەديتسيا كەزىندە برازيليا شەكاراسىنا جاقىن جەردەگى, ەلدىڭ وڭتۇستىك-شىعىسىنداعى ەجەلگى ورماندار القابىنداعى فاۋنانىڭ , ياعني جان-جانۋاردىڭ ەسەبىن جۇرگىزىپ, تازا سۋدىڭ زاپاسىن زەرتتەۋمەن اينالىسقانىن ايتقان.
پالۋمەۋ وزەنىنىڭ جوعارعى اعىسى باسسەينىندەگى دجۋنگلي الاپتارى پلانەتاداعى ەڭ قالىڭ جانە مەيلىنشە از زەرتتەلگەن اۋماق بولىپ تابىلادى. Arlington عالىمدار توبى جالپى اۋدانى 162 مىڭ شارشى شاقىرىمدى قۇرايتىن سۋرينامدا وسى ولقىلىقتاردىڭ ورنىن تۇگەلدەۋ ءۇشىن جۇمىس جاسادى.
عالىمدار تاپقان باقالار عىلىم ءۇشىن ناعىز جاڭالىق بولعالى تۇر. قوڭىر ءتۇستى اعاش قۇباقالارى سونىمەن بىرگە, ۋلى باقالاردىڭ قاتارىن تۇزەدى. جەرگىلىكتى تۇرعىندار ونىڭ توكسيندەرىن اڭعا شىققاندا ساداق جەبەسىنىڭ باسىنا جاعىپ, ۋلاۋ قۇرالى رەتىندە پايدالانادى ەكەن. عالىمدار سونداي-اق پيگمەنتتەلگەن جايىننىڭ جاڭا تۇرىنە دە كەزىگىپتى. بالىقتىڭ بۇدان باسقا تاعى ونداعان وزگەشە ءتۇرى تابىلعان. مۇندا ۇشىراسقان كولەمى 2,3 مم بولاتىن قوڭىزدىڭ سارعىش ءتۇرىن دە عىلىم بۇرىن بىلمەگەن.
زەرتتەۋشىلەر كومانداسى بارلىعى 1378 وسىمدىكتىڭ, قۇستىڭ, ءسۇت قورەكتىلەردىڭ, جاندىكتىڭ, بالىق پەن مەن امفيبيانىڭ تۇرلەرى تۋرالى مالىمەتتەردى جيناپ الىپتى. بۇل جۇمىسقا جەرگىلىكتى تۇرعىنداردان 30 ادام كومەكتەسكەن.
وتكەن عاسىرداعى 1970 جىلداردىڭ باسىنا دەيىن گوللانديانىڭ وتارى بولىپ كەلگەن سۋرينام تۇرعىندارى ءوز دجۋنگليلەرىن سىرت كوزدەن قورعاپ, ساقتاپ قالۋعا تىرىسادى.
بالكىم, «سۋرينام دەگەن قانداي ەل؟» سۇراققا مىناداي ءبىر اۋىز جاۋاپ بەرسەك, وقىرمان قاۋىم جاقسى ۇعىناتىن شىعار: وسى رەسپۋبليكادان شىققان كوپتەگەن اسا تالانتتى فۋتبولشىلار ءار جىلدارى گوللانديا قۇراماسى ساپىندا وينادى. ولاردىڭ قاتارىندا رويستون درەنتە, رۋد گۋلليت, فرانك رايكاارد, ەدگار داۆيدس, كلارەنس زەەدورف, پاتريك كليۋيۆەرت, رايان بابەل, ارون ۆينتەر, اندۆەلە سلوري, رومەو كاستەلەن, دجيممي فلويد حاسسەلباينك, دجەرمەين لەنس, ميحاەل رايزيگەر, ۆينستون بوگارد, گاستون تاۋمەنت, رەدجي بلينكەر سىندى ويىنشىلار بولدى.
سۋرينام دەگەن وسىنداي ەل.
مۇرات ايتقوجا.