قازىر عانا ماسكەۋدەگى «وليمپيسكي» سپورت كەشەنىندە اۋىر سالماقتاعى بوكسشىلار رەسەيلىك الەكساندر پوۆەتكين مەن ۋكراينالىق ۆلاديمير كليچكونىڭ اراسىنداعى الەم چەمپيوندىعى ءۇشىن جەكپە-جەك باستالدى.
رەسەيدىڭ «ءبىرىنشى ارناسىنان» كورسەتىلىپ جاتقان حابار ءبىر مەزگىلدە الەمنىڭ 20 ەلىنە تاراۋدا.
ۆلاديمير كليچكو سەمەي جەرىندە تۋعان. كەيىن, ۆولوديانىڭ ءالى بالا شاعىندا اسكەري قىزمەتتەگى اكەسى ۋكرايناعا قىزمەتكە اۋىسقان.
بۇل ۇرىستىڭ جالپى جۇلدە قورى 26 ملن. دوللار بولىپ وتىر.
37 جاستاعى ۆلاديمير كليچكو WBA (بۇكىلالەمدىك بوكس قاۋىمداستىعى) نۇسقاسى بويىنشا «سۋپەرچەمپيون» اتاعىن, سونداي-اق WBO (بۇكىلالەمدىك بوكس ۇيىمى) جانە IBF (حالىقارالىق بوكس فەدەراتسياسى) چەمپيوندارى اتاعىن قورعايدى. 34 جاستاعى الەكساندر پوۆەتكين WBA چەمپيونى بەلبەۋىنىڭ يەگەرى. بۇعان قوسا, ەكۋى دە اۋەسقويلار رينگىندە وليمپيادا چەمپيونى اتانىپ ۇلگەرگەن.
ال كاسىپقويلار اراسىندا ۆلاديمير كليچكو 63 ۇرىس وتكىزىپ, سونىڭ 60-ىندا جەڭىسكە جەتتى. بۇلاردىڭ 51-ءىن نوكاۋتپەن ءبىتىردى. بىراق سوڭعى 9 جىلدا جەڭىلىپ كورگەن جوق. سونىمەن بىرگە, 3 ۇرىستا جەڭىلىستىڭ اششى ءدامىن تاتتى. الەكساندر پوۆەتكين بارلىق وتكىزگەن 26 جەكپە-جەگىندە مەرەيى ۇستەم بولدى. سولاردىڭ 18-ءى نوكاۋتپەن ءبىتتى.
شايقاستىڭ الدىندا الدىمەن ۋكراينانىڭ, سوسىن رەسەيدىڭ گيمندەرى وينالدى. بۇدان كەيىن ەكى الىپتىڭ تالاسىنا كەزەك بەرىلدى.
ءبىرىنشى قاراعاندا, ەكى بوكسشىنىڭ ءتۇرى دە قوبالجۋلى كورىندى. ءتىپتى كليچكو شارشاۋلى سياقتى.
سونىمەن, 1-راۋند. ازىرگە الەكساندر ەركىندەۋ قيمىلداپ ءجۇر. ال ۆلاديمير وتە ساق. سالدەن كەيىن ونىڭ ارتىقشىلىعى بايقالا باستادى. جالپى العاندا, بۇل راۋندتا بوكسشىلاردىڭ سوققى جاساعاننان گورى قۇشاقتاسۋى, ياعني كلينچكە ءتۇسۋى كوپتەۋ بولدى.
2-راۋند. بويى الاسا پوۆەتكين قارسىلاسىنا بارىنشا جاقىن كەلگىسى كەلىپ ۇمتىلادى. ال كليچكو وعان قاتتى سوققى جاساۋعا مۇمكىندىك بەرەر ەمەس. بىراق ءوزى دە ايرىقشا سوققى جاساي قويعان جوق. كەنەت... ول سول قولىمەن قاتتى ۇرىپ, ساشانى قۇلاتىپ ءتۇسىردى. نوكداۋن! اربيتر ەسەپتى ساناۋعا كوشتى. وسىمەن راۋند ءبىتتى.
3-راۋند. بۇل كەزەڭدە الەكساندر ءوزىنىڭ وسىنىڭ الدىنداعى ساتسىزدىگىن قايتارعىسى كەلىپ, شابۋىلعا شىقتى. ونىڭ ەكى سوققىسى جاقسى ءتيدى. دەگەنمەن, ءۆلاديميردىڭ قورعانىسى كۇشتى. ول قارسىلاسىنىڭ قاتتى سوققى جاساۋىنا ەرىك بەرمەي ءجۇر.
4-راۋند. پوۆەتكيننىڭ قيمىلى تىم جاداعاي. ونىڭ كەلەسى كەزەكتە نە ىستەيتىنىن كليچكو ۇدايى ءبىلىپ قويادى. سوندىقتان ونى ماڭىنا جاقىنداتپايدى. كليچكونىڭ شايقاستا ەسەپتى وتە جاقسى قۇراتىنىن بۇرىن دا ماماندار ايتاتىن. ول سونى وسى جەردە تاعى دالەلدەپ بەردى. بۇل راۋند تا ەشكىمنىڭ ارتىقشىلىعىن بايقاتپادى. بىراق كليچكونىڭ ءبىر نوكداۋنى بار.
5-راۋند. سپورت كەشەنىندەگى جانكۇيەرلەر ساشانى جەلپىندىرۋگە تىرىسىپ-اق جاتىر. بىراق رەسەيلىك بوكسشى بۇرىنعى قالپىنان تانار ەمەس. ونىڭ قيمىلىندا جاڭالىق جوق. ءبارى جاتتاندى. تاپتاۋرىن. بۇل كليچكو ءۇشىن وتە دۇرىس بولىپ تۇر. ەگەر شايقاس بۇدان ارى دا سولاي بولا بەرسە, كليچكونىڭ ۇپاي سانىمەن جەڭىپ كەتۋى مۇمكىن. مىنە, ول قورعانىپ ءجۇرىپ-اق دجەبپەن ەكى سوققى جاساپ ۇلگەردى.
6-راۋند. ۇرىس قيمىلىندا وزگەرىس جوق. پوۆەتكين بۇرىنعىسىنشا تانك سەكىلدى تۋرالاپ العا ۇمتىلۋدا. ونىڭ بۇل ارەكەتى ازىرگە ءوزىن اقتاي الماي ءجۇر. قايتا سولاي ءجۇرىپ, سوققى الىپ قالىپ جاتىر. ول قايتا-قايتا قارسىلاسىنىڭ دجەبىنە ءتۇسىپ قالۋدا.
7-راۋند. ۇرىستا ءالى وزگەرىس جوق. مىنە, پوۆەتكين تاعى دا كليچكونىڭ دجەبىنە ءتۇسىپ قالدى. نوكداۋن! كوپ وتكەن جوق, ۆلاديمير تاعى دا ۇرىپ ءتۇسىردى. تاعى نوكداۋن! ءۇشىنشى مارتە! جوق, ەندى ءبىتتى. مىنە, تاعى بىر سوققى! تاعى نوكداۋن! ءتورتىنشى مارتە. بىراق اربيتر شايقاستى توقتاتار ەمەس. نەگىزىندە ءبىر راۋندتا 3 نوكداۋن العان ادامعا جەڭىلىس بەرىلۋى كەرەك. شاماسى, پوۆەتكين الاڭ يەسى بولعاسىن, ونى شىعارىپ تاستاۋعا باتىلى بارماعان شىعار.
8-راۋند. بوكسشىلار تاعى دا رينگ ورتاسىندا توقايلاستى. تاعى دا كلينچ. سەبەبى, پوۆەتكيننىڭ سوققى جاساۋىنا مۇمكىندىك بەرگىسى كەلمەگەن كليچكو تەز ونىڭ قارۋىن پايدالاندىرماي تاستايدى. وسىلاي ءجۇرىپ-اق ۆولوديا ۇپاي جيناپ قالۋدا. ونىڭ جەكەلەگەن سوققىلارى ءدال تيۋدە. ايتكەنمەن, ەكى بوكسشىنىڭ دا شارشاپ قالعاندارى بايقالادى. بۇكىل ۇرىس كۇشكە سالىپ وتۋدە. بۇعان ءبىرىنشى كەزەكتە پوۆەتكين كىنالى.
9-راۋند. تاعى باياعى كورىنىس. تاعى تا كۇشكە سالۋ. سونداي تەكەتىرەس كەزىندە كليچكو قارسىلاسىن يتەرىپ قۇلاتتى. سودان سوڭ ەكى رەت جاقسى دجەب وتكىزدى. مۇندا ونىڭ ۇستانعان تاكتيكاسى وتە ءتيىمدى بولىپ تۇر. سونىڭ نەگىزىندە پوۆەتكين تاعى ەكى رەت ونىڭ دجەبىن جىبەرىپ الدى. ۇرىستىڭ سيپاتى بوكسشىلاردىڭ ءبىر-بىرىنە حۋك پەن اپپەركوت جاساۋلارىنا جاقىنداتپاي تۇر.
10-راۋند. مىنە, چەمپيوندىق راۋند تا باستالدى. سوڭعى ءۇش راۋندتى ماماندار وسىلاي اتايدى. سەبەبى, ۇرىستىڭ تاعدىرى وسى كەزدەرى شەشىلەدى. دەگەنمەن, ۋكراين تارلانىنىڭ ەندى جەڭىستى بەرە قويمايتىنىنا كوڭىل سەنىپ قالعانداي. وعان پوۆەتكيننىڭ ءبىر جاقتى قيمىلعا قۇرالعان تاكتيكاسى دا سەبەپ بولىپ وتىر. ول وسى راۋندتا دا ءۆلاديميردىڭ وتە كوپ سوققىسىن الىپ قالدى.
11-راۋند. وسى ۋاقىتقا دەيىن پوۆەتكين قارسىلاسىنا ۇقساتىپ ءبىر سوققى بەرە العان جوق. بۇل راۋندتا دا ۋكراين بوكسشىسىنىڭ ارتىقشىلىعى بايقالىپ تۇر. بىراق ول جاعدايدى ۋشىقتىرماي, اقىرىن عانا جەڭىسكە جەتۋگە بەكىنگەن سياقتى.
12-راۋند. ۆلاديمير كليچكونىڭ سوققىلارى جويقىن. ونىڭ الەكساندر پوۆەتكين اشىق قالعان كەزدە ۇرعاندارى قاتتى ءتيىپ جاتىر. الايدا, شارشاعاندىكى شىعار, ۋكراين جىگىتى دە قاتەلەسىپ كەتۋدە. ەندى شايقاستىڭ اياقتالۋىنا ءبىر مينۋتتاي عانا قالدى. وسى تۇستا كەرەمەت ءبىر سوققى بەرىپ, نوكاۋتقا تۇسىرمەسە, پوۆەتكيننىڭ جەڭە قويۋى ەكىتالاي. سوڭعى ساتتەر ەكى جاقتىڭ بىردەي تالماي ۇرىس سالۋىمەن ءوتتى.
گونگ! شايقاس اياقتالدى. كىمنىڭ جەڭگەنى ايتپاسا دا تۇسىنىكتى. ول, ارينە, ۆلاديمير كليچكونىڭ ۋىسىندا كەتتى. ال پوۆەتكينگە تالماي, شارشاماي شايقاسقا ءۇشىن عانا رازى بولۋعا بولادى. ال كليچكو سىندى ۇلى بوكسشىنى جەڭۋ ونىڭ وڭ جامباسىنا كەلمەيتىن شارۋا بولىپ شىقتى.
مىنە, تورەشىنىڭ ۇشەۋى دە جەڭىستى ۆلاديمير كليچكوعا بەردى. تازا جەڭىس! تالاسسىز جەڭىس! وسى ۇرىستىڭ الدىندا ابدەن بورىككەن رەسەيلىك كوممەنتاتورلاردىڭ كومەيلەرىن بىتەدى بۇل جەڭىس!
ءبىز جەرلەسىمىز ۆلاديمير كليچكونى وسى ۇلى جەڭىسىمەن قۇتتىقتايمىز. سەمەي توپىراعىنا قانى تامعان تارلان تاعى دا ءوزىنىڭ مىقتى ەكەنىن تانىتتى.
ال پوۆەتكين كاسىپقويلار رينگىندە ءوزىنىڭ ءبىرىنشى جەڭىلىسىنە ۇشىرادى.
ۆلاديمير كليچكو 9 جىلدان بەرى ۇزىلمەي كەلە جاتقان جەڭىستى جولىن جالعادى. ءبىزدىڭ وسى شايقاس الدىندا ايتقان بولجامىمىز تۋرا كەلدى.
رۋسلان يگىلىك.