بۇگىن, 5 قازان كۇنى ەلىمىزدىڭ 5 قالاسىندا پرەمەر-ليگا كوماندالارىنىڭ 29-تۋرى ويىندارى بولىپ ءوتتى. بۇل كۇنى تەك كەشە ەۋروپا ليگاسىنىڭ 2-تۋرى ماتچىن وتكەرگەن قاراعاندىنىڭ «شاحتەرى» مەن شىمكەنتتىڭ «ورداباسى» كومانداسى اراسىنداعى ويىن عانا وينالعان جوق.
تۋرداعى ەڭ ماڭىزدى ماتچتاردىڭ ءبىرى اقتوبەدە كەرۋەن كەردى. وندا قالا اتتاس جەرگىلىكتى كوماندا پاۆلوداردىڭ «ەرتىسىن» قابىلداپ, 3:1 ەسەبىمەن جەڭىسكە جەتتى. كەزدەسۋدەگى العاشقى دوپتى, بىراق, قوناقتار سوقتى. ونى 17-مينۋتتا قازاقستان قۇراماسىنىڭ مۇشەسى دميتري شومكو ءتۇسىردى. الاڭ يەلەرى ۇزىلىسكە دەيىن ەسەپتى تەڭەستىرە ءبىلدى. ولار مۇنى 45-مينۋتتا سەرگەي داۆىدوۆتىڭ كۇش سالۋىمەن جاسادى. ال ەكىنشى تايم باستالا بەرگەن شاقتا (47-مينۋت) ارمەنيا قۇراماسىنىڭ شابۋىلشىسى روبەرت ارزۋمانيان اقتوبەلىكتەردى العا شىعاردى. ءبىرازدان كەيىن مارات حايرۋللين الاڭ يەلەرىنىڭ باسىمدىعىن ەكى دوپقا دەيىن جەتكىزدى.
بۇل جەڭىس «اقتوبەنىڭ» رەسمي تۇردە چەمپيون اتاناتىن شاعىن جاقىنداتا ءتۇستى. سەبەبى, وسى كۇنگى تاعى ءبىر اسا ماڭىزدى سانالعان كەزدەسۋدە ءبىرىنشى ورىننان ءۇمىتى بار استانانىڭ «استاناسى» ءوز الاڭىندا الماتىنىڭ «قايراتىنان» 1:2 ەسەبىمەن ۇتىلىپ قالدى. وندا دا جەڭىلگەن جاق ءبىرىنشى بولىپ ەسەپ اشتى. ونى 45-مينۋتتا استانالىق پاتريك تۆۋماسي ءتۇسىردى. ەكىنشى تايمدا قوناقتار ۆيتالي ءليدىڭ 77 جانە 80-مينۋتتاردا سالعان ەكى گولىنىڭ ارقاسىندا العا شىقتى. وسىدان كەيىن «اقتوبە» مەن «استانا» اراسىنداعى ايىرماشىلىق 6 ۇپايعا دەيىن جەتتى.
بۇل تۋردا تاپ وسىنداي 2:1 دەگەن ەسەپ تاعى ەكى ويىندا تىركەلدى. سولاردىڭ بىرىندە قوستانايدىڭ «توبىلى» وسكەمەننىڭ «ۆوستوگىن» جەڭدى. مۇندا دا جەڭىلگەن كوماندا ءبىرىنشى بولىپ گول سوقتى. مەيماندار ساپىنداعى ترينيداد پەن توباگو قۇراماسىنىڭ ويىنشىسى رادانراح ابۋ باكردىڭ اياعىنان ۇشقان دوپ 34-مينۋتتا الاڭ يەلەرىنىڭ قاقپاسىندا تۋلاپ جاتتى. قوستانايلىقتار دا گولدىڭ ەسەسىن قايتارۋ مەن العا شىعۋدىڭ اراسىن كوپ سوزبادى. ولار العاشقى گولدارىن 71-مينۋتتا (الەكساندر شكوت) تۇسىرسە, ەكىنشى رەت قاقپانى الۋدى 75-مينۋتتا (الەكساندر الۋمون) جۇزەگە اسىردى.
كەلەسى 2:1 دەگەن ەسەپتى جانكۇيەرلەر ورالدا كوردى. جەرگىلىكتى «اقجايىق» تاپ وسىنداي ناتيجەمەن «تارازدى» ءسۇرىندىردى. ال تالدىقورعاندا جەرگىلىكتى «جەتىسۋ» مەن اتىراۋدىڭ «اتىراۋ» كوماندالارى اراسىنداعى ويىندا ەسەپ اشىلعان جوق.
وسى تۋردان كەيىن ءبىرىنشى ورىنداعى «اقتوبەنىڭ» ۇپايى 39-عا جەتتى.
دامير قوجامقۇل.
Cۋرەتتە: «اقتوبە» كومانداسىنىڭ ويىنشىلارى ءبىر-ءبىرىن جەڭىسپەن قۇتتىقتاپ جاتىر.