پوليتسەيلەرگە قاتىستى تاعى ءبىر جانجال اقمولا وبلىسىن ءدۇر سىلكىندىردى. جوعارى لاۋازىمدى وفيتسەرلەر كىسى ءولىمى فاكتىسىن جاسىرماق بولىپ, ءولى تاكسيشىنىڭ دەنەسىن كومىپ تاستاپتى. ولار مۇنىمەن قويماي, وسى سۇمدىق قىلمىستى كوزىمەن كورگەن ەكى كۋاگەردى ۇرلاپ اكەتكەن. بۇل تۋرالى «ەسكپرەسس-ك» گازەتى جازدى.
وتكەن جىلعى 12 تامىزدا اقمولا وبلىسىنىڭ قوستومار سەلوسىنىڭ تۇرعىنى دالادا جارتىلاي كومىلىپ جاتقان ءبىر ەر كىسىنىڭ ءمايىتى ۇستىنەن تۇسەدى. سول بويدا پوليتسياعا حابار بەرەدى. تەرگەۋ بولجامى بويىنشا, ارشالى اۋداندىق ىشكى ىستەر ءبولىمىنىڭ باسشىسى باقتىباي ساحانوۆ ستاتيستيكانى بۇلدىرمەۋ ءۇشىن وزىنشە جوسپار قۇرادى. وسىعان سايكەس, ءتارتىپ ساقشىلارى قىلمىستى اشۋعا تەز كىرىسۋ بىلاي تۇرسىن, قۇددى ونى بولماعانداي ەتىپ قويۋعا بارىن سالادى. ءسويتىپ, ولار ءمايتتى قاپقا سالىپ الىپ, ورماننىڭ ىشىنە اپارىپ, كومىپ تاستايدى.
بۇدان ءارى پوليتسەيلەر تۇتاس ءبىر سپەكتاكلدى ءبىر وزدەرى ويناپ شىقتى. سونىڭ جەلىسىندە جەرگىلىكتى ءبىر تۇرعىندى قازىلىپ قويىلعان شۇڭقىرعا جاتۋعا ءماجبۇر ەتەدى. سوسىن ونىڭ ۇستىنە ازداپ توپىراق تاستاپ, سۋرەتكە ءتۇسىرىپ الادى. بۇل ولارعا قازىلعان شۇڭقىردا ولگەن كىسىنىڭ ءمايىتى ەمەس, كادىمگى ماس ادامنىڭ جاتقانىن جورتا «دالەلدەۋگە» كەرەك بولىپتى.
بالكىم, اتى-ءجونى بەلگىسىز مارقۇم سول كۇيى تانىلماستان كەتە بەرەر مە ەدى, ەگەر ونى تۋعان-تۋىستارى قايتا-قايتا جار سالىپ ىزدەتە بەرمەگەندە؟ ولاردىڭ ءبىرى – كەنەت ءۇشتى-كۇيلى جوق بولىپ كەتكەن تاكسيشى بازارباەۆتىڭ قارىنداسى استانا قالاسىنىڭ ىشكى ىستەر دەپارتامەنتىنە وسىعان بايلانىستى شاعىم تۇسىرەدى. استانالىق جەدەل ىزدەستىرۋ قىزمەتكەرلەرى, ابىروي بولماعاندا, ونى ءولتىرىپ, قوستومار سەلوسى ماڭىنا كومىپ كەتكەن قىلمىسكەرلەردى تەز تاپتى. بىراق كىسى ولتىرۋشىلەر كورسەتكەن شۇڭقىردا مارقۇمنىڭ ءمايىتى جوق بولىپ شىقتى. بۇل پينكەرتونداردى بىردەن تۇيىققا تىرەپ تاستادى.
وسى كەزدە ءمايىتتىڭ قاتتى ىزدەستىرىلىپ جاتقانىنان حاباردار بولىپ ۇلگەرگەن باقتىباي ساحانوۆ قاراۋىنداعىلارعا ولىكتىڭ جايىن بىلەتىن جوعارىداعى ەكى كۋانى – مايىتكە كەزىگىپ, پوليتسياعا حابار بەرگەن ادام مەن شۇڭقىرعا ءتۇسىپ, ماستىڭ ءرولىن ويناپ شىققان جىگىتتى شۇعىل تىعىپ قويۋدى بۇيىرادى. وسىعان سايكەس, ارشالىلىق ءتارتىپ ساقشىلارى وزدەرىنىڭ استانالىق ارىپتەستەرىنىڭ ىستەرىنە قارسى جۇمىس جاساپ, ايتىلعان ادامداردى جەرگىلىكتى شارۋاشىلىقتىڭ اۋماعىنا اپارىپ قامايدى. بىراق كوپ ۇزاماي قاماۋداعى كۋالاردىڭ ءبىرى قاشىپ شىعىپ, بىردەن استانا پوليتسياسىنا كەلەدى.
سول-اق ەكەن, ىشكى ىستەر سالاسىن دۇربەلەڭگە سالعان الگىندەگى جانجال دۋ ەتىپ كوتەرىلە جونەلەدى. سول بويدا ارشالى اۋداندىق ىشكى ىستەر ءبولىمىنىڭ بارلىق لاۋازىمدى قۇرامى بىردەن قاماۋعا الىنادى. ولاردىڭ اراسىندا باسشىنى قوسا ەسەپتەگەندە, جەتى وفيتسەر بولادى.
«اتالمىش ءىس بويىنشا تەرگەۋدى ارشالى اۋدانىنىڭ پروكۋرورى باۋىرجان قۇسايىنوۆتىڭ ءوزى جۇرگىزدى. قازىرگى ۋاقىتتا تەرگەۋ تولىق اياقتالىپ, ءىس سوتقا وتكىزىلدى. ءىس بويىنشا كۇدىكتى رەتىندە اۋداندىق ىشكى ىستەر ءبولىمىنىڭ باستىعى, ونىڭ ەكى ورىنباسارى جانە تاعى ءتورت قىزمەتكەر جاۋاپقا تارتىلىپ وتىر», - دەگەن تۇسىندىرمە جاسادى اقمولا وبلىسى پروكۋرورىنىڭ ءباسپاسوز حاتشىسى اققۋ ءمۇرسالىموۆا.
قۇرىش نۇرىمبەت.