وبلىس اكىمى ماحامبەت دوسمۇحامبەتوۆ وتكىزگەن جيىندا "ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان "ەڭبەك" مەملەكەتتىك باعدارلاماسىنىڭ ورىندالۋ بارىسى مەن ەڭبەكاقى بەرەشەگىن بولدىرماۋ, سونداي-اق, ەلەكتروندىق ەڭبەك شارتتارى تالقىلاندى", دەپ حابارلايدى ەgemen.kz
بىلتىر اتىراۋدا اتالعان باعدارلاما شەڭبەرىندە 28 344 ادام جۇمىسپەن قامتىلىپ, 5 ملرد تەڭگە قارجى يگەرىلدى. جوسپارلانعان شارالار تولىعىمەن ورىندالدى. ال, بيىل باعدارلاما اياسىندا 23 566 ادامدى جۇمىسپەن قامتۋ كوزدەلىپتى.
"جىل باسىنان بەرى جۇمىسپەن قامتۋ ورتالىقتارىنا حابارلاسقان 11 410 ادامنىڭ ىشىنەن 6 217-ءى ياعني 54,5 پايىزى جۇمىسپەن قامتىلدى. قازىر جۇمىسسىزدار سانى 9 805 ادامدى قۇراپ وتىر", - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى سەرىك قاميدوللا.
الايدا, مەكەمەلەر ۇسىنعان تۇراقتى جۇمىس ورىندارىنا 2 344 ادام ورنالاستىرىلىپ, جوسپار 19,5% عانا ورىندالىپتى. بۇدان دا تومەن كورسەتكىشتەر اتىراۋ قالاسىندا (9,8%), جىلىوي جانە يساتاي اۋداندارىندا (14,8%) بايقالىپ وتىر.
وسىعان وراي وبلىس اكىمى ماحامبەت دوسمۇحامبەتوۆ مەملەكەتتىك باعدارلاما اياسىندا جۇزەگە اسۋى ءتيىس جۇمىستاردى ۇيىمداستىرا الماي وتىرعان اۋدان اكىمدەرىنىڭ جۇمىسىن سىنعا الدى.
"جۇمىستارىڭىزدا كەمشىلىك كوپ. ءبارىن كارانتينگە سىلتەيسىزدەر. ماعان جوسپاردى قاي ۋاقىتتا تولىق ورىندايتىندارىڭىز كەرەك. كەلەسى ايدا جۇكتەلگەن مىندەتتى قانشالىقتى ورىنداپ, كورسەتكىشتەردى جاقسارتا الاسىزدار؟ ناقتى جوسپارلارىڭىزدى ايتىڭىزدار. كارانتيندى سىلتاۋراتۋدى قويۋ كەرەك. جۇمىس ىستەيتىندەرگە ءاردايىم جول اشىق. توتەنشە جاعداي, ءتىپتى كارانتين كەزىندە دە جۇمىس ىستەۋگە ارنايى رۇقسات بەردىك. وبلىستىق ارنايى شتاب سول ءۇشىن كۇنى-ءتۇنى جۇمىس ىستەدى" - دەدى ايماق باسشىسى.
وبلىس اكىمى قۇزىرلى ورگاندارمەن بىرلەسىپ, مەكەمەلەر مەن كاسىپورىنداردا ەڭبەكاقىنىڭ ۋاقىتىلى جانە تولىق كولەمدە تولەنۋىنە مونيتورينگ جاساۋدى تاپسىردى.