تۇركىستان وبلىسىندا ەۆرو - 5 ستاندارتىنا ساي وتاندىق ءونىم, اي-92 ماركالى بەنزين, ديزەل جانارمايى مەن بەنزول, تولۋول, كسيلول جانە ۇلگىلى مازۋت ونىمدەرى شىعاراتىن بىرەگەي جوبا جۇزەگە اسىرىلۋدا. ەرەكشەلىگى سول – تاس كومىردەن مۇناي ونىمدەرى شىعارىلماق. ورداباسى اۋدانى, بادام اۋىل وكرۋگىندەگى «ستاندارت رەسۋرسيس» جشس كومىر - حيميالىق كومبيناتى جىلىنا 30 مىڭ تونناعا دەيىن شيكىزات وندىرۋگە قاۋقارلى.
وبلىس اكىمى ومىرزاق شوكەەۆ ارنايى تانىسىپ قايتقان, 1,5 ملرد تەڭگە ينۆەستيتسيا قۇيىلعان, جوبا اياسىندا 100-گە جۋىق جاڭا جۇمىس ورنى اشىلماق. مەملەكەت تاراپىنان «بيزنەستىڭ جول كارتاسى-2020» باعدارلاماسى اياسىندا ينفراقۇرىلىم جەلىسى جۇرگىزىلىپ, 3 شاقىرىم جەردە تەمىرجول تارتىلعان.
قازىرگى تاڭدا زاۋىتتا قۇرىلىس جۇمىستارى اياقتالىپ, ىسكە قوسىلۋعا دايىندىق ۇستىندە. ءونىم تەك ەل كولەمىندەگى نارىققا عانا ەمەس, تمد ەلدەرىنە ەكسپورتتالماق. نەگىزگى مەردىگەرى-مۇناي حيمياسى سالاسىنداعى نارىق كوشباسشىلارىنىڭ ءبىرى بولىپ تابىلاتىن رەسەيلىك «ەتن تسيكلون» كومپانياسى.
تۇركىستان وبلىسى