قازاق كۇي ونەرىنىڭ كەشەلى-بۇگىنگى كورنەكتى وكىلدەرىنىڭ ءبىرى, قازاقستاننىڭ حالىق ءارتىسى, بۇعان دەيىنگى قازاقتىڭ قۇرمانعازى اتىنداعى اكادەميالىق حالىق اسپاپتار وركەسترىنىڭ كوركەمدىك جەتەكشىسى تۇياقبەردى شامەلوۆ وتكەن جىلدىڭ كۇزىندە بەۋ, دۇنيە جالعاننان فانيگە اتتانىپ كەتىپ ەدى. سول كەزدە ول شىعارماشىلىق ساپارمەن ءوزىنىڭ تۋعان جەرى اقجايىقتا جۇرگەن بولاتىن. تەكتى, تالانتتى ونەر يەسىنىڭ ماڭگىلىك دامىلدايتىن ورنى قاي جەردە ورنالاسۋى كەرەك دەگەن ماسەلە الدان شىققان كەزدە, وعان ورال-جاڭاقالا كۇرە جولىنىڭ بويىنداعى مامەن كەسەنەسىنىڭ جانى لايىقتى دەپ تابىلدى.
قازاق كۇي ونەرىنىڭ كەشەلى-بۇگىنگى كورنەكتى وكىلدەرىنىڭ ءبىرى, قازاقستاننىڭ حالىق ءارتىسى, بۇعان دەيىنگى قازاقتىڭ قۇرمانعازى اتىنداعى اكادەميالىق حالىق اسپاپتار وركەسترىنىڭ كوركەمدىك جەتەكشىسى تۇياقبەردى شامەلوۆ وتكەن جىلدىڭ كۇزىندە بەۋ, دۇنيە جالعاننان فانيگە اتتانىپ كەتىپ ەدى. سول كەزدە ول شىعارماشىلىق ساپارمەن ءوزىنىڭ تۋعان جەرى اقجايىقتا جۇرگەن بولاتىن. تەكتى, تالانتتى ونەر يەسىنىڭ ماڭگىلىك دامىلدايتىن ورنى قاي جەردە ورنالاسۋى كەرەك دەگەن ماسەلە الدان شىققان كەزدە, وعان ورال-جاڭاقالا كۇرە جولىنىڭ بويىنداعى مامەن كەسەنەسىنىڭ جانى لايىقتى دەپ تابىلدى.
كەز كەلگەن تالانتتىڭ باس ءيىپ, ءپىر تۇتاتىن ادامى بولۋى تابيعي قۇبىلىس. ايتالىق, جىر الىبى جامبىلدىڭ ءپىرى – ءسۇيىنباي بولسا, تابيعاتى تەك قاراپايىمدىلىقتان جاراتىلعان تۇياقبەردىنىڭ ءپىرى كۇي ءتاڭىرىسى – مامەن بولاتىن. تۇياقبەردى مامەندى كورمەگەن. ويتكەنى, ول ت.شامەلوۆ دۇنيەگە كەلمەستەن كوپ ۋاقىت بۇرىن ءومىردەن وتكەن. ايتسە دە, تۇياقبەردى مامەننىڭ ارتىندا قالدىرعان كۇي مۇراسى تابيعاتىنان وزىنە كەرەمەتتەي ۇندەستىك تاپقان. ونىڭ قازاق كۇي ونەرىنىڭ قوس ءدۇلد ۇلى قالي مەن مامەنگە ارناعان تۋىندىسى دا بار.
ايتىپ-ايتپاي نە كەرەك, كۇي ونەرىنىڭ ەكى بۋىنى مەن ەكى ۇرپاعى وكىلىنىڭ كەسەنەسى قاتار ورنالاستى. الىستان كوز تارتاتىن وسىناۋ قوس اقشاڭقان كەسەنە جوعارىدا ايتىلعانداي ورال-جاڭاقالا كۇرە جولىنىڭ بويىندا ورنالاسقان. ورال وڭىرىندە «جاڭاقالاعا بارىپ كۇيشىمىن دەمە» دەگەن ءسوز بار. ارينە, حالىق ايتسا قالت ايتپايدى عوي. ەگەر جاڭاقالا-وردا توپىراعى قۇرمانعازى مەن دينانىڭ, داۋلەسكەر كۇيشى داۋلەتكەرەيدىڭ, مامەننىڭ, قالي جانتىلەۋوۆتىڭ, وقاپ قابيعوجيننىڭ كىر جۋىپ, كىندىك كەسكەن كىشى وتانى بولسا, وسىلاي دەمەگەندە نە دەۋگە بولادى؟ قازاق كۇي ونەرىنىڭ تاعى ءبىر قايتالانباس تۇلعاسى, قازاقستاننىڭ حالىق ءارتىسى, مارقۇم قارشىعا احمەدياروۆتىڭ سوزىمەن ايتقاندا, وسىنداي توپىراقتان تۇياقبەردىنىڭ دۇنيەگە كەلۋى, كونتسەرتمەيستەر بولۋى كەزدەيسوقتىق ەمەس, زاڭدىلىق.
وسىدان ەكى جىل بۇرىن جاڭاقالا اۋدانىنىڭ اكىمى لاۆر حايرەتدينوۆ مادەنيەت ءۇيىنىڭ الدىنان كۇيشىلەر كەرۋەنىن اشۋعا باستاماشى بولدى. سوعان ساي بۇل ارادان جوعارىدا اتالعان قازاق كۇيىنىڭ پايعامبارلارىنا كەۋدە مۇسىندەر ورناتىلدى. سولاردىڭ قاتارىن الا بۇلتى مەن قارا بۇلتى ارالاسىپ, توبەدەن تونگەن قىركۇيەكتىڭ سوڭعى كۇنى تۇياقبەردى شامەلوۆتىڭ كەۋدە ءمۇسىنى تولىقتىردى.
كيەلى جاڭاقالا توپىراعىندا كورنەكتى كۇيشى تۇياقبەردى شامەلوۆكە ارنالىپ تۇرعىزىلعان اقشاڭقان كەسەنەنىڭ اشىلۋ راسىمىنە جانە ونى ەسكە الۋ شارالارىنا قازاقتىڭ قۇرمانعازى اتىنداعى اكادەميالىق حالىق اسپاپتار وركەسترىنىڭ ۇجىمى ارنايى كەلىپ, ءتاۋ ەتتى, كۇيشى رۋحىنا ارناپ ءۇلكەن كونتسەرت قويدى.
باتىس قازاقستان وبلىسى,
جاڭاقالا اۋدانى.