اقتاۋدىڭ وليگارحتارى كۇن سايىن باكۋدىڭ رەستوراندارىنان كەشكى اس ءىشىپ قايتۋ ءۇشىن ازەربايجاننىڭ استاناسىنا ۇشىپ باراتىن كورىنەدى. ال سەنبى جانە جەكسەنبى كۇندەرى گرۋزياعا ۇشادى. بۇل تۋرالى ءماجىلىس دەپۋتاتى راۋان شاەكين مالىمدەدى.
«مەنىڭ شۇعىل تۇردە اقتاۋعا ۇشۋىما تۋرا كەلدى. سوندا اۋە كومپانياسىنىڭ قىزمەتكەرلەرى ول جاققا ءبىر اپتا بويى بيلەتتىڭ بولا قويمايتىنىن ايتتى. سەبەبى, اقتاۋداعى ۇلكەن «بوينگ» ۇشاعى كۇن سايىن ارنايى باكۋگە ۇشادى ەكەن. ال سەنبى جانە جەكسەنبى كۇندەرى جەرگىلىكتى تۇرعىندار گرۋزياعا بارىپ قايتاتىنعا ۇقسايدى», – دەيدى ءماجىلىس دەپۋتاتى.
دەپۋتات وسىعان وراي كولىك جانە كوممۋنيكاتسيا ءمينيسترى اسقار جۇماعاليەۆكە: «استانا مەن وبلىس ورتالىقتارى اراسىندا اۋە رەيستەرى جەتىسپەي جاتقاندا, شەتەلدەرگە ۇشاقتار كۇن سايىن قاتىنايتىنى قالاي؟» دەگەن مازمۇندا ءوزىنىڭ رەنىشىن ءبىلدىردى.
مۇرات ايتقوجا.