مىنە, ون ەكى جىلدان اسىپ بارادى, ىشكى ىستەر مينيسترلىگىنىڭ بۇرىنعى قاراعاندى جوعارى مەكتەبى, كەيىن سونىڭ نەگىزىندە قۇرىلعان قاراعاندى زاڭ ينستيتۋتى «ىشكى ىستەر مينيسترلىگىنىڭ بارىمبەك بەيسەنوۆ اتىنداعى زاڭ اكادەمياسى» دەپ اتالادى. وسىناۋ مارتەبەلى وقۋ ورنىنىڭ قابىرعاسىندا وسى ءبىر ازاماتتىڭ جارقىن بەينەسى بەدەرلەنگەن ەسكەرتكىش-تاقتا قويىلعان, ءبىرىنشى قاباتىندا ارداگەر گەنەرال ۇستازدىڭ قولا ءمۇسىنى ورناتىلعان. بۇعان قوسا ب.بەيسەنوۆ تۋعان ەلى قازاقستاننىڭ عانا ەمەس, باۋىرلاس قىرعىزستاننىڭ دا جوعارى پوليتسيالىق ءبىلىمىنىڭ نەگىزىن قالاۋشى دەپ ەسەپتەلەدى. ابىز اكادەميك سالىق زيمانوۆ ونى زاڭ عىلىمدارىنىڭ بىلگىرى رەتىندە باعالاپ, شىنايى ءىلتيپاتىن بىلدىرگەن ەكەن. البەتتە, مۇنداي تاعىلىمدى قۇرمەتكە كىم دە بولسا باي ءومىرباياننىڭ بايتاق ۇلاعاتىمەن عانا يە بولارى انىق.
مىنە, ون ەكى جىلدان اسىپ بارادى, ىشكى ىستەر مينيسترلىگىنىڭ بۇرىنعى قاراعاندى جوعارى مەكتەبى, كەيىن سونىڭ نەگىزىندە قۇرىلعان قاراعاندى زاڭ ينستيتۋتى «ىشكى ىستەر مينيسترلىگىنىڭ بارىمبەك بەيسەنوۆ اتىنداعى زاڭ اكادەمياسى» دەپ اتالادى. وسىناۋ مارتەبەلى وقۋ ورنىنىڭ قابىرعاسىندا وسى ءبىر ازاماتتىڭ جارقىن بەينەسى بەدەرلەنگەن ەسكەرتكىش-تاقتا قويىلعان, ءبىرىنشى قاباتىندا ارداگەر گەنەرال ۇستازدىڭ قولا ءمۇسىنى ورناتىلعان. بۇعان قوسا ب.بەيسەنوۆ تۋعان ەلى قازاقستاننىڭ عانا ەمەس, باۋىرلاس قىرعىزستاننىڭ دا جوعارى پوليتسيالىق ءبىلىمىنىڭ نەگىزىن قالاۋشى دەپ ەسەپتەلەدى. ابىز اكادەميك سالىق زيمانوۆ ونى زاڭ عىلىمدارىنىڭ بىلگىرى رەتىندە باعالاپ, شىنايى ءىلتيپاتىن بىلدىرگەن ەكەن. البەتتە, مۇنداي تاعىلىمدى قۇرمەتكە كىم دە بولسا باي ءومىرباياننىڭ بايتاق ۇلاعاتىمەن عانا يە بولارى انىق.
بۇل ومىردەن وتكەنىنە دە ءبىراز جىلدىڭ ءجۇزى بولىپ قالعان بارىمبەك اعانىڭ سانالى عۇمىرىندا ءجۇرىپ وتكەن جولىنا كوز سالار بولساق, جازۋشى قالامىنا تاپتىرماس باي ءومىربايان كەزىگەدى. باباسى قويشىباي سوناۋ سارىسۋ-جاڭاارقا وڭىرىندە ەلدىڭ ءسوزىن ۇستاعان دۋالى اۋىز بي بولسا, تاعى ءبىر اتاسى تورجان بولىستىققا سايلانىپ, ءوز زامانىنىڭ ادىلەتىن القاعان, قايماعىن شايقاعان بەلگىلى ادامدار بولعان ەكەن. وسى بي-بولىستاردىڭ ۇرپاعى ءجۇز جىل وتكەندە, قازاق ەلىنىڭ جاڭعىرعان جاڭا بەلەسىندە پوليتسيالىق جوعارى ءبىلىمنىڭ نەگىزىن قالاۋشى قايراتكەر دەپ تانىلسا, بۇل دا ءبىر ساباقتاستىق نىشانى شىعار. ونىڭ ۇستىنە زاڭعار زيمانوۆ بۇگىنگى زاڭ مەن قۇقىقتى قازاقتىڭ بۇرىنعى بيلەر سوتىمەن بايلانىستىرا قاراستىرعانىن قايدا قويامىز؟ سول تۇرعىدان كەلگەندە اكادەميك زيمانوۆتىڭ اسقار تاۋداي تۇلعالى شاكىرتتەرىنىڭ ءبىرى بارىمبەك بەيسەنوۆ ەكەنى دە ناق وسى ورايدا ويعا ورالۋى زاڭدى سياقتى.
اكەسى سارسەن اقمولادا ساكەن سەيفۋللينمەن بىرگە وقىعان, اقيىق اقىننىڭ ىقپالىندا بولعان, جاس داۋرەنىن بىرگە وتكىزگەن زامانداسى, جولداسى. رەۆوليۋتسيانىڭ العاشقى جىلدارىندا قاراعاندى ماڭىندا سوت بولىپ ىستەپتى. بىراق اۋقاتتى تۇقىمنىڭ بالاسى بولعاندىقتان كەڭەستىك قىزىل ساياسات بۇعان قىرىنداۋ قاراپ, كۇدىكتى ساناپ, سودان دا ءبىر جەرگە تۇراقتاي الماي, قۋدالاۋدا جۇرگەندەي كۇن كەشەدى. بارىمبەك, مىنە, وسى كىسىنىڭ ۇلكەن ۇلى. كوبىنە اتا-اجەسىنىڭ قولىندا بولادى. ەسى كىرىپ قالعاندا اشارشىلىق جىلداردىڭ ازابىن دا تارتادى. اكە-شەشەسىمەن بىرگە ءجيى-ءجيى قونىس اۋدارىپ تەنتىرەگەن كەزدەر دە از بولماپتى. ءسويتىپ, جاس جەتكىن بارىمبەككە ءبىر جەردە تۇراقتاپ وقۋ دا مۇڭ بولعان كورىنەدى. سوعىستىڭ العاشقى جىلدارىندا اكە مايدانعا اتتانىپ, اتاسى قايتىس بولعاندا سوزاقتاعى اجەسىنىڭ قولىنا كەلىپ, ءبىر اۋلەتتىڭ باس كوتەرەرى رەتىندە اۋداندىق بانكتە جۇمىس تا ىستەيدى. ءسويتىپ جۇرگەندە, كومسومولعا وتەم دەپ جاسىن كوتەرىپ جازعانى بار, ءارى اۋداننىڭ ورازالى دەگەن ەكىنشى حاتشىسىنىڭ بالاسىمەن جولداس بولىپ, ەكەۋى سۇرانىپ سوعىسقا تىم جاس كەتەدى. ءيا, ول زاماندا وتان قورعاۋ ۇلكەن ازاماتتىق مىندەت سانالاتىن, تۇرمىس جۇپىنى بولسا دا جاستاردىڭ بويىندا وتاندى ءسۇيۋ سەزىمى مول بولاتىن. بولاشاق گەنەرال وسىلايشا وتان ءۇشىن وت كەشىپ, كەۋدەسىنە ەرلىگى ءۇشىن العان الدەنەشە وردەن-مەدالداردى تاعىپ كەلىپ, ورتا مەكتەپتى سوعىستان ورالعاسىن, ەسەيگەن شاعىندا تالدىقورعاندا ءتامامداپتى.
وقۋدى اڭساپ, ەڭ باستىسى, قىرعىن مايداننان ءوزى دە, اكەسى سارسەن دە, اعايى سەيىلبەك تە امان-ەسەن ورالعان بارىمبەك الماتىداعى زاڭ ينستيتۋتىنا وقۋعا تۇسەدى. وتباسى جاعدايىمەن بىرەر جىلداي ءۇزىلىس جاساعاننىڭ وزىندە دە ماماندىعىنان الشاقتاماي, جاركەنت وڭىرىندە تەرگەۋشى بولىپ ىستەپتى. وسىلايشا جوعارى ءبىلىم ديپلومىن 1952 جىلى الىپ شىعادى.
ديپلومى قولىنا تيە سالا الماتى قالالىق پروكۋراتۋراسىنا تەرگەۋشى قىزمەتىنە كىرىسەدى. ول جەردە بەس جىل بويى تەرگەۋشى, اعا تەرگەۋشى قىزمەتتەرىندە ءوز ماماندىعىنىڭ قىر-سىرىن تاجىريبەلىك تۇرعىدان تەرەڭىرەك يگەرەدى. ءبىر ايتا كەتەرلىك جاي, سول جىلدارى قازاقستاننىڭ كەيبىر وبلىستارىندا اۋىل شارۋاشىلىعى سالاسىندا قول جەتكەن ناتيجەلەر مەن تابىستاردى ءوسىرىپ جازۋ سياقتى ورەسكەلدىكتەر ورىن الىپ, سول جاعداي زاڭ ورىندارى تاراپىنان تەكسەرىسكە ۇشىرايدى. قۇنىعىپ العان كولحوزداردىڭ باسشىلارى ۇلكەن اۋماقتارعا قىزىلشا, كۇرىش ەگىپ, ونىڭ تاۋداي ءونىمىن توقىمداي جەردەن الدىق دەپ مالىمەت بەرىپ, سول ارقىلى وزدەرىنىڭ جانە ءبىر توپ ەگىنشىلەردىڭ ماراپات-مارتەبەگە جەتۋىن, سوتسياليستىك ەڭبەك ەرى اتاعىن الۋىن ۇيىمداستىرىپتى. مىنە, وسى ماسەلەنى تەرگەۋمەن وداقتىق پروكۋراتۋرا اينالىسىپ, ونىڭ قۇرامىنا تاجىريبەلى تەرگەۋشى ساناتىندا ءبارىمبەكتى دە قوسادى. سول تەكسەرىس-تەرگەۋلەر كەزىندە ايلاپ قىزىلوردا, جامبىل وبلىستارىندا جۇرەدى.
1957 جىلى بارىمبەك سارسەن ۇلى قازاقستان عىلىم اكادەمياسىنىڭ مەملەكەت جانە قۇقىق ينستيتۋتىنىڭ اسپيرانتۋراسىنا تۇسەدى. ونى عىلىمعا تىكەلەي شاقىرىپ العان ءوزىنىڭ ستۋدەنتتىك كەزدەن بەرگى ۇلاعاتتى ۇستازى اكادەميك سالىق زيمانوۆ بولاتىن. بارىمبەكتى جاستايىنان جاقسى بىلەتىن, ونىڭ ۇلكەن قىلمىستاردى اشۋ ورايىنداعى ءتاجىريبەسى مەن العىرلىعىن باعالاعان ءاز-اعا ەندى سونىڭ ءبارىن عىلىمي تۇرعىدان قورىتىپ, تەورياعا اينالدىرۋ كەرەكتىگىن ايتادى. «بىتەر ءىستىڭ باسىنا, جاقسى كەلەر قاسىنا» دەگەندەي, باكەڭنىڭ عىلىمي جەتەكشىسى بولىپ سوعىس كەزىندە قازاقستانعا كەلىپ, وسىندا قالىپ قويعان زاڭ عىلىمىنىڭ ۇلكەن بىلگىرى, تاجىريبەلى قارت پروفەسسور ك.يا.بۋلاتوۆ بەكىتىلەدى. كوپ ماسەلەلەر جونىندە سالىق اعانىڭ وزىمەن دە اقىلداسىپ وتىرادى ەكەن. ءسويتىپ, بارىمبەك سارسەن ۇلى اراق ءىشۋ سالدارىنان, ماس كۇيىندە, ماسكۇنەمدىك جاعدايىندا جاسالعان قىلمىستاردىڭ پروبلەمالارى حاقىنداعى كانديداتتىق ديسسەرتاتسيانى ءساتتى قورعاپ شىعادى. ديسسەرتاتسيا سول كەزدەگى وسى ءبىر كوكەيكەستى ماسەلەنى تەك قازاقستان كولەمىندە ەمەس, وداقتىق ايعاق-دەرەكتەر مەن وي-پىكىرلەردى جيناقتاي وتىرىپ زەرتتەگەن ەلەۋلى ەڭبەك ەدى.
اسپيرانتۋرانى ءبىتىرىپ, عىلىم كانديداتى اتاعىنا يە بولعان باكەڭ ەندى ىشكى ىستەر مينيسترلىگىنىڭ ماسكەۋدەگى جوعارى مەكتەبىنىڭ الماتىداعى فيليالىندا 4 جىل دوتسەنت دارەجەسىندە ساباق بەرەدى. ال 1964 جىلى ونى رەسپۋبليكاداعى بىردەن-ءبىر مارتەبەلى وقۋ ورداسى – قازاق ۋنيۆەرسيتەتىنە پرورەكتور قىزمەتىنە شاقىرادى. ارىپتەستەرىنىڭ ايتۋىنشا, بارىمبەك سارسەن ۇلىنىڭ رەسپۋبليكانىڭ باس وقۋ ورنىنىڭ پرورەكتورى بولىپ تاعايىندالۋى دا بەكەر ەمەس, قيسىنىمەن ورايلاسقان زاڭدىلىق ەدى. سەبەبى, ونىڭ زاڭگەر عالىمداردىڭ اراسىندا وي ءورىسىنىڭ كەڭدىگىمەن, ادامدارمەن ءتىل تابىسا بىلۋىمەن, تاعىلىمدى تالىمگەرلىگىمەن جانە باسشىلىق دارىنىمەن دارالانىپ تۇراتىنى دا شىندىق-تىن. ب.بەيسەنوۆ باس وقۋ ورنىنىڭ قابىرعاسىندا ءجۇرىپ تە زاڭ مەن قۇقىق تاقىرىبىنا كوپتەگەن ماقالالار جازدى. اسىرەسە, بۇزاقىلىقتىڭ قىلمىستىق سيپاتتاماسى بەرىلگەن عىلىمي ەڭبەگى جۇرتشىلىقتىڭ ەسىندە قالدى.
1969 جىلى بارىمبەك سارسەن ۇلى كسرو ىشكى ىستەر مينيسترلىگى ماسكەۋ جوعارى مەكتەبىنىڭ الماتىداعى فاكۋلتەتىنىڭ باستىعى بولىپ تاعايىندالىپ, وعان ىشكى ىستەر پولكوۆنيگى دەگەن اتاق قوسا بەرىلەدى. ناق وسى جىلى ىشكى ىستەر مينيسترلىگىنىڭ جوعارى مەكتەبىن قاراعاندىدا اشۋ جونىندە شەشىم قابىلدانىپ, سول مەكتەپتى اشاتىن, ونىڭ قۇرىلىسىن پارمەندى جىگەرمەن جۇرگىزە الاتىن مامان ىزدەگەندە تاڭداۋ تاعى دا باكەڭە تۇسەدى. ءسويتىپ, وسىناۋ اتپال ازاماتتىڭ قاراعاندى كەزەڭى دەپ اتالاتىن جۇلدىزدى جىلدارى باستالادى.
1969 جىلدىڭ ۇسكىرىك ايازدى, بوراندى جەلتوقسانىندا پولكوۆنيك بەيسەنوۆ ءبىر توپ سەرىكتەرىمەن رەسپۋبليكا استاناسىنان كومىرلى قاراعاندىعا كەلىپ جەتتى. قاراعاندى جوعارى مەكتەبىنىڭ باستىعى قىزمەتىنە ءوزىن لايىقتى دەپ تاپقان ۇكىمەتتەگى, مينيسترلىكتەگى جاۋاپتى تۇلعالاردىڭ, شىراقبەك قابىلباەۆتاي شىراقتى اعالاردىڭ ءۇمىتىن باكەڭ اقتاپ شىقتى. مەكتەپتىڭ وقۋ جۇيەسىن ۇيىمداستىرۋمەن بىرگە جاڭا وقۋ ورنى عيماراتتارىنىڭ قۇرىلىسىن بىلگىرلىكپەن باسقارىپ جۇرگىزدى. قۇرىلىس جوبالارىن قايتا قاراپ, ءتيىستى وزگەرىستەر ەنگىزدى. مەكتەپتىڭ قاز باسىپ قالىپتاسۋىنا سول كەزدەگى قاراعاندى وبلىستىق پارتيا كوميتەتىنىڭ ەكىنشى حاتشىسى نۇرسۇلتان نازارباەۆتىڭ دا تيگىزگەن ىقپال-شاراپاتى از ەمەس-ءتى. الماتىدان, ماسكەۋدەن, تاعى باسقا جەرلەردەن ۇلكەن ماماندار, زاڭگەرلەر شاقىرىلدى. بارىمبەك سارسەن ۇلى ۇيىمداستىرعان سول ءبىر ۇجىم, ونداعى زاڭگەرلەر توبى رەسپۋبليكاداعى سول تۇستاعى ەڭ تاڭداۋلى كادرلاردان قۇرالعان ەدى. ولار ءوز مەكتەپتەرىن عانا كوتەرىپ قويماي, سول كەزدە اشىلىپ, ءالى باستىعا قويماعان قاراعاندى مەملەكەتتىك ۋنيۆەرسيتەتىنىڭ زاڭ فاكۋلتەتىن دە بيىك ورگە جەتكىزدى.
اۋەلى بارىمبەك سارسەن ۇلىنىڭ ۇجىمعا الدىمەن ءوزى ۇلگى كورسەتتى. ول كسرو ىشكى ىستەر مينيسترلىگىنىڭ ەڭبەك سىڭىرگەن قىزمەتكەرى, قىلمىستىق قۇقىق جانە قىلمىستىق پروتسەسس كافەدراسىنىڭ پروفەسسورى بولدى. ال ماسكەۋ وليمپياداسىندا قوعامدىق قاۋىپسىزدىكتى قامتاماسىز ەتۋ جونىندەگى ءمىنسىز قىزمەتى ءۇشىن «حالىقتار دوستىعى» وردەنىمەن ماراپاتتالدى. ول سونىمەن بىرگە, قاراعاندى قالاسىنىڭ حالقى جانە قۇقىق قورعاۋ ورگاندارى قىزمەتكەرلەرى الدىندا تالاي رەت تامىلجىتا ءسوز سويلەگەن تاماشا شەشەن بولاتىن. باكەڭمەن قىزمەتتەس بولعان ونەگەلى تۇلعالار وسىنداي كۋالىك ەتەدى.
بارىمبەك سارسەن ۇلىنىڭ وسىناۋ كەزدەگى زيالىلىعى, زياتكەرلىگى, دەگدارلىعى حاقىنداعى اڭگىمەلەر دە كوپ-اق. بولاشاق گەنەرال وقۋ ورداسىنىڭ نەگىزى كىتاپحانا جانە ۇلاعاتتى ۇستازدار ەكەنىن تاپ باسىپ ءبىلدى. سوندىقتان دا ول ءماجىلىس-جيىنداردا, عىلىمي كەڭەستەردە: «ستانيسلاۆسكي تەاتر كيىم ىلگىشتەن باستالادى دەپ ساناعان عوي, ال مەن سىزدەرگە ايتايىن: جوعارى مەكتەپ كىتاپحانادان باستالادى» دەپ قايتالاۋدان جالىقپايدى ەكەن. سالىستىرۋ ءۇشىن ايتار بولساق, قاراعاندى مەملەكەتتىك ۋنيۆەرسيتەتىندە زاڭ فاكۋلتەتى اشىلعان كەزدە ۋنيۆەرسيتەت ستۋدەنتتەرى وقۋ-ادىستەمەلىك قۇرالدار, وقۋلىقتار الۋ ءۇشىن جوعارى ميليتسيا مەكتەبىنە اسىرەسە, العاشقى جىلدارى جيىرەك كەلىپ ءجۇرىپتى. باسقالارعا دا شاراپاتىن تيگىزگەن باكەڭنىڭ ءبىر ۇلاعاتى وسى بولسا كەرەك.
بارىمبەك سارسەن ۇلىمەن ستۋدەنتتىك شاقتا بىرگە وقىعان, كەيىن قاراعاندى وبلاتكومىنىڭ توراعاسى بولىپ قاناتتاس قىزمەت اتقارعان تاعى ءبىر تاماشا تۇلعا سۇلتان دوسماعامبەتوۆتىڭ ايتۋىنشا, باكەڭنىڭ ادامي قاسيەتتەرى, ۇيىمداستىرۋشىلىق قابىلەتى جاس كەزىنەن-اق بايقالىپتى. ول ميليتسيا جوعارى مەكتەبىنىڭ قۇرىلىس كەشەنىن العاشقى قازىعىنان باستاپ كوتەردى. سول كەزدە قاراعاندى بۇكىل كەڭەستەر وداعىنىڭ ىشكى ىستەر ورگاندارى ءۇشىن كادرلار دايارلادى. مۇندا وقۋعا تۇسۋگە الىپ ەلدىڭ بارلىق الىس تۇكپىرلەرىنەن كەلىپ جاتاتىن. ال بارىمبەك بەيسەنوۆتىڭ قىزمەتى قاراعاندى زاڭ ينستيتۋتى تاريحىنداعى ەڭ باستى جارقىن بەتتەردىڭ ءبىرى بولىپ قالا بەرەدى. جەتپىسىنشى جىلداردىڭ سوڭىنان باستاپ جاس وقىتۋشىلاردى ەلدىڭ جەتەكشى وقۋ ورىندارىنا كۇندىزگى ءبولىمنىڭ اديۋنكتۋراسىنا جىبەرۋىن وسى سالانىڭ بىلگىرلەرى پروفەسسور بەيسەنوۆتىڭ كورەگەندىگى دەپ باعالاۋى بەكەر ەمەس. وسىناۋ ازاماتتىڭ جەر بەتىندەگى ىزگىلىكتى ىزدەرى مەن قالدىرعان مۇراسى, عىلىمي ەڭبەكتەرى وتە اۋقىمدى, ال ونىڭ ەڭ ەلەۋلى پەرزەنتى – قاراعاندى زاڭ ينستيتۋتى ەكەندىگىن قازاقستان رەسپۋبليكاسىنىڭ ىشكى ىستەر ءمينيسترى بولعان ب.ىسقاقوۆ تا قاداپ ايتقان ەكەن. اكادەميك سالىق زيمانوۆ وسى قاراعاندى كەزەڭىن: «بارىمبەك بەيسەنوۆ ءوز ءىسىن تومەننەن باستادى جانە ىشكى ىستەر وفيتسەرلەرىنىڭ تاماشا جوعارى مەكتەبىن جاساقتادى. قازىر ول ءبىزدىڭ رەسپۋبليكامىزدىڭ جوعارى مەكتەبىنىڭ ماقتانىشى سانالادى» دەپ سيپاتتادى. ءيا, قاراعاندى مەكتەبى سول تۇستا وداق بويىنشا قۇرىلعان وسىنداي ءۇشىنشى مەكتەپ ەدى. كەيىن وسى ۇلگىدەگى مەكتەپتەر اشىلعان. بىراق مىنا العاش اشىلعان جاڭا سيپاتتاعى ءىرى مەكتەپكە وداق تاراپىنان دا, رەسپۋبليكالىق مينيسترلىك تە اسا ۇلكەن باعا بەردى. سول ارقىلى قازاقستاننىڭ ىشكى ىستەر مينيسترلىگىنىڭ جۇيەسىندە سىننان وتكەن عىلىمي-پەداگوگيكالىق كادرلار قالىپتاسقانى كوزىقاراقتى قاۋىمعا ابدەن ماعلۇم.
قاراعاندى مەكتەبىنىڭ باستىعى قىزمەتىن بارىمبەك سارسەن ۇلى 16 جىل اتقارىپ, 1985 جىلى زەينەتكە شىقتى. بىراق ول ىستەن قالمايدى. تىنىمسىز ازامات قاراعاندى مەكتەبىنىڭ الماتىداعى فيليالىندا سوڭعى دەمىنە دەيىن پروفەسسورلىق تاعىلىمىن جالعاستىرادى, ىشكى ىستەر مينيسترلىگىنىڭ الماتىداعى جوعارى تەرگەۋ مەكتەبىندە ءدارىستەر وقيدى. سونىمەن بىرگە, 1997 جىلى قازاقستاندا زاڭگەرلەر قاۋىمداستىعى قۇرىلعاندا سونىڭ ۆيتسە-پرەزيدەنتى بولىپ سايلانعان ەدى. زاڭ سالاسىنىڭ ارداگەرى قاۋىمداستىقتىڭ كۇللى ۇيىمداستىرۋ جۇمىستارىن جۇرگىزۋدى ءوز موينىنا الادى. وسى ورايدا وبلىستاردا فيليالدار اشۋ جوسپارلانعان بولاتىن. سول شارۋامەن بارىمبەك سارسەن ۇلى سەمەيگە جۇرمەك بولادى. ءدال وسى ساپار الدىندا جۇرەك تالماسى ۇستاپ, اسىل ازاماتتى ارامىزدان الىپ كەتەدى.
ءيا, زامانداستارىنىڭ باعالاۋىندا بارىمبەك سارسەن ۇلى كەڭ پايىمدى, جان-جاقتى دارىندى, ويشىل دا قايراتكەر ازامات بولعان. عىلىمعا بولەتىن ۋاقىتىنىڭ كوبىن كەرەگەسىن ءوزى كەرىپ, ۋىقتارىن ءبىر-بىرلەپ قاداپ, شاڭىراعىن كوتەرگەن مەكتەپتىڭ ۇيىمداستىرۋ شارالارى جەپ كەتكەن سياقتى كورىنگەنىمەن, ومىردە قالدىرعان ەڭ ۇلكەن ءىزى دە وسى بولدى. وقۋ ورداسىنىڭ جاڭا زامان تالاپتارىنا, ورەلى وركەنيەت دارەجەسىنە ساي بولۋىن قامتاماسىز ەتكەن. شىنىندا دا, بۇل مەكتەپ ونىڭ پەرزەنتى ەدى. قازىردە اتاعى زور اكادەمياعا اينالعان, ەل قورعانى بولار سايىپقىرانداردى باۋليتىن وسىناۋ ءبىلىم ورداسى قاناتتى قازاق ەلىمەن بىرگە جاساي بەرەتىنى كۇمانسىز.
قورعانبەك امانجول,
«ەگەمەن قازاقستان».
الماتى.