جەرگىلىكتى قىزدار قۇراماسى ەل چەمپيوناتىنا قاتىسادى. بۇل كۇنى بۇرىمدى بوكسشىلار قىزۋ دايىندىق ۇستىندە. ايتۋلى باسەكە قىركۇيەك ايىندا الماتى شاھارىندا وتەدى دەپ جوسپارلانعان. 10 سالماق دارەجەسىندە وتەتىن جارىستا وبلىستىڭ نامىسىن 5 بوكسشى قورعايدى.
كارينا يبراگيموۆا بەلگىلى بوكسشى. ول الەمدىك جارىستاردىڭ جۇلدەگەرى. قازاقستان چەمپيوناتىنىڭ دا بىرنەشە دۇركىن جەڭىمپازى. باستى ماقساتى ەل چەمپيوناتىندا جەڭىس تۇعىرىنا كوتەرىلىپ, وليمپيادا ويىندارىنا قاتىسۋ.
–مەن 60 كەلى سالماقتا سىنعا تۇسەم. بۇل وليمپيادالىق سالماق. بىراق تا الدا وتەتىن وليمپيادا ويىندارىنا وسى سالماقتا ءالى ەشكىم جولداما العان جوق. سوندىقتان, وسى ەل چەمپيوناتىندا بارىمدى سالام. سەبەبى, وسى جارىستا جەڭىسكە جەتسەم, وليمپيادا ويىندارىنا جولداما بەرەتىن جارىسقا قاتىسا الام,–دەيدى بوكستان الەم چەمپيوناتىنىڭ قولا جۇلدەگەرى كارينا يبراگيموۆا.
توتەنشە جاعداي رەجيمى كەزىندە دە بوكسشى قىزدار ءوز دايىندىقتارىن توقتاتقان جوق. ولار اشىق اسپان استىنداعى سپورت كەشەندەرىندە جاتتىققان. ال, وسى اپتادان باستاپ سپورتزالدارىنا قايتا ورالدى. ەندى باپكەردىڭ باقىلاۋىمەن دايىندىق جۇمىسارىن پىسىقتاۋدا.
–جارىسقا قاتىساتىن بۇل قىزداردىڭ بارلىعى ۇلتتىق قۇرامانىڭ ساپىندا جۇرگەندەر. تەك اۋىر سالماقتاعى بوكسشىمىز وسىنداي جارىسقا العاشقى رەت قاتىسقالى جاتىر. قىزداردىڭ بارلىعى ارنايى ىرىكتەۋدەن ءوتتى. 8 ماۋسىم كۇنى بوكسشىلار الماتىعا بارىپ, دايىندىق جۇمىستارىن سول جاتقا جالعاستىرادى,–دەيدى بوكستان وبلىستىق قىزدار قۇراماسىنىڭ اعا جاتتىقتىرۋشىسى الەكساندر ۆىسوتسكي.
ءيا, 5 ارۋعا ارتار سەنىم مول. ايتا كەتۋ كەرەك, قازىرگى تاڭدا بوكسقا قىزىققان بۇرىمدىلار قاتارى كوبەيىپ كەلەدى. ونىڭ ايقىن دالەلى, باستاپقى كەزدە قىزدار بوكس كلۋبى تەك وبلىس ورتالىعىندا عانا بولسا, قازىررگى تاڭدا جاقسى, بۋراباي اۋداندارى مەن ستەپنوگورسك قالاسىندا دا اشىلعان. بۇل ورتالىقتار بولاشاق بوكس چەمپيوندارىن تۇلەتۋگە سەپتىگىن تيگىزەدى.