جاڭا ماۋسىمعا ءوڭىر قوناقۇيلەرى, مەيمانحانالارى مەن ساناتوريلەرى ۇلكەن ءۇمىت ارتىپ وتىر. قازىرگى تاڭدا بارلىق تۋريستىك نىساندار ءوڭىردىڭ باس سانيتارلىق دارىگەر بەكىتكەن تالاپتارعا ساي قىزمەت اتقارۋدا.
جاڭا تۋريستىك ماۋسىمعا ازىرلىك اياسىندا وڭىرلىك تۋريزم باسقارماسى جەتەكشىلەرى زەرەندى مەن بۋراباي وڭىرلەرىنىڭ تۋريستىك نىسان يەلەرىمەن كەزدەستى. باسقارمانىڭ جاڭا تاعايىندالعان جەتەكشىسى ءۋاليحان عابدۋللين وڭىردەگى دەمالىس نىساندارى جازعى ماۋسىمعا 100% دايىن دەپ وتىر. باسقارما ماماندارى بيىلعى تۋريستەر اعىمى وتكەن جىلدان كەم بولمايدى دەگەن سەنىمدە. 2019 جىلى بۇل كورسەتكىش ميلليون ءۇش ءجۇز مىڭنان اسقان بولاتىن.
– بارلىق نىسانداردىڭ ازىرلىگى باعالانىپ, ءتيىستى اكتىلەر تولتىرىلادى. ول قۇجاتتا دامالىس ورىندارىنىڭ سانيتارلىق تالاپتارعا ساي بولۋى تىركەلەدى. ءبىز ىشكى تۋريزمگە ءۇمىت ارتىپ وتىرمىز,–دەيدى وبلىستىق تۋريزم باسقارماسىنىڭ باسشىسى ءۋاليحان عابدۋللين.
بيزنەس وكىلدەرى وتكەن ەكى ايداعى شىعىن كولەمىن ەسەپتەپ, وتەۋ جولدارىن ىزدەستىرۋدە. ال, تۋريستەر عالامتور جەلىسىندە ءتيىمدى شارتتار مەن دەمالۋ مۇمكىندىگىن بەلسەندى ىزدەستىرۋدە. وبلىستىق دەمالىس جانە تۋريزم يندۋسترياسى قاۋىمداستىعىنىڭ توراعاسى قازاقستاندىقتار مۇنداي اقپاراتتىق سايتتاردى كەڭىنەن قولدانىپ وتىرعانىن ايتادى. دەمەك, وتاندىق دەمالىس ورىندارىن ىشكى تۋريستىك اعىممەن تولتىرۋعا مۇمكىندىك مول.
– تۋربيزنەس ساندىق ماركەتينگتىڭ مۇمكىندىگىن جاڭاشا باعالاي باستادى. ەكى اي بويى ءبىز ءوز مۇمكىندىكتەرىمىز بەن ۇسىنىلعان دەمالىس ورىندارىنىڭ ارتىقشىلىعىن بارىنشا جارنامالاي بىلدىك. مۇنىڭ ناتيجەسى الداعى ۋاقىتتا كورىنىس بەرەدى. 1 ماۋسىمنان باستاپ, ادامدار ەكى اي بويى ينتەرنەتتەن كورگەن, جوسپارلاعان دەمالىس نىساندارىنا كەلە باستايدى,– دەيدى وبلىستىق دەمالىس جانە تۋريزم يندۋسترياسى قاۋىمداستىعىنىڭ توراعاسى شىناربەك باتىرحانوۆ.
جاڭا ماۋسىم باستالعانعا دەيىن-اق, قازاقستاندىقتار دەمالىس ورىندارىنا الدىن-الا تاپسىرىس بەرگەن. دەمەك, جاڭا ماۋسىمنان ءۇمىت زور. باعاسىنا كەلسەك, ساراپشىلار بيزنەس-قۇرىلىمداردىڭ شىعىندارى مەن نارىقتاعى وزگەرىستەردى ەسكەرىپ, 15 پروتسەنتكە دەيىن قىمباتتاتۋى مۇمكىن دەگەن بولجام ايتىپ وتىر.