باتىس قازاقستان وبلىسىنىڭ كەيبىر تۇرعىندارى ءالى كۇنگە دەيىن وبلىس اكىمى نۇرلان نوعاەۆتى جۇزبە-ءجۇز بىلمەيتىن بولىپ شىقتى. ءتىپتى سۇرالعاندار اراسىندا ايماقتىڭ ءنومىرى ءبىرىنشى ازاماتىنىڭ اتىن ەستەرىنە تۇسىرە الماعاندار بار. بۇل تۋرالى NUR.KZ سايتى حابارلادى.
«دەگەنمەن, ەلدىڭ كەيبىرى اكىمنىڭ اتى-ءجونىن بىلمەسە دە, ونىڭ سيلۋەتىن جاقسى تانيدى ەكەن. ال ەلىمىزدەگى ايماق اكىمدەرىنىڭ جۇمىس بارىسىنا باعا بەرگەن ۇيىم رەيتينگىسىنىڭ سوڭعى مالىمدەمەسى بويىنشا, نۇرلان اسكار ۇلى 16 اكىمنىڭ ىشىندە 14-ورىننان توبە كورسەتكەن», - دەلىنگەن وندا..
«نوعاەۆتىڭ ءجۇزىن كورۋدى ارمانداعان» جۋرناليستەر اكىمنىڭ قاعاز بەينەسىن (سۋرەتتە) قالاعا الىپ شىعىپ, حالىقپەن كەزدەسۋ وتكىزبەك بولعانى كوپشىلىكتىڭ ءالى ەسىندە. جەرگىلىكتى بۇقارالىق اقپارات قۇرالدارىنىڭ وكىلدەرى سول كەزگە دەيىن وزدەرىمەن ءبىر رەت تە كەزدەسپەگەن وبلىس اكىمىن وسىلايشا سىلكىندىرمەك بولىپتى. ولاردىڭ مۇنىسىنان اقىرى ناتيجە دە شىقتى. اكىم نۇرلان نوعاەۆ اقىرى قالام ۇستاعان اعايىننىڭ الدىنا كەلدى. قايتا. وسى وقيعادان كەيىن جۇرت ءوز اكىمدەرىنە نازار اۋدارا باستاعان سياقتى.
ال «ساياسات مونيتورينگ» ۇيىمى جۇرگىزگەن وبلىستار اكىمدەرىنىڭ رەيتينگىندە باتىس قازاقستان وبلىسىنىڭ اكىمىنە تانىمالدىعى مەن بەدەلى جاعىنان 14-ءشى ورىن بەرىلدى. «بىراق ون التى اكىمنىڭ ون ءتورتىنشىسى بولعانىنا نوعاەۆ مىرزا رەنجىمەيدى», - دەپ جازادى وسىعان وراي سايت ءتىلشىسى.
«مەن ەندى تاڭەرتەڭ تۇرىپ الىپ, «ساياسات.kz» نەمەسە باسقاسىن قاراپ, «اناۋ نە دەدى ەكەن, مىناۋ نە دەدى ەكەن» دەپ بىرەۋدىڭ مازاسىن الىپ وتىراتىن بولسام, وندا مەندە جۇمىس جۇرمەيدى», - دەيدى باتىس قازاقستان وبلىسىنىڭ اكىمى نۇرلان نوعاەۆ.
جانە ونىسى دا راس.
قۇرىش نۇرىمبەت.