«مالدان مالدىڭ نەسى ارتىق, ءبىر-اق اسىم ەتى ارتىق. ەردەن ەردىڭ نەسى ارتىق, ءبىر-اق اۋىز ءسوزى ارتىق» دەيدى بابالارىمىز. بۇل سوزىنە ءىسى ساي كەلەتىن, اۋزىنان شىققاندى مىندەتتى تۇردە ورىندايتىن ادامدى مەڭزەگەنى. ياعني, ەردىڭ ارتىقشىلىعىن ايقىندايتىن باستى قاسيەت – تىندىرعىن ءىسى بولسا كەرەك.
سول سياقتى «ادامنىڭ ءىسى – ءوزى» دەگەن كەيىنگى كەزدە ءجيى ەستىپ جۇرگەن قاعيدانىڭ بابالارىمىز باياعىدا ايتقان سوزبەن ساباقتاس ەكەنى بايقالادى. ياعني كىمنىڭ كىم ەكەنىن جاساعان ءىسى كورسەتەدى. ادامنىڭ ارتىقشىلىعىن دا, كەمشىلىگىن دە كورسەتەتىن باستى ولشەم سول. «بەيىمبەت جاۋ بولسا – مەن دە جاۋمىن» دەپ جيىننان شىعىپ كەتكەن عابەڭ, عابيت مۇسىرەپوۆتىڭ ارەكەتى, قيىن-قىستاۋ كەزەڭدە «بەسەۋدىڭ حاتىن» جازعانداردىڭ ءىسى, ءبارى ولاردىڭ بولمىس-ءبىتىمىن, پوزيتسياسىن, كىم ەكەنىن, قالاي ءومىر سۇرگەنىن ايقىندايدى.
جالپى, ادامزات بالاسىن ءبىر-بىرىنەن ەرەكشەلەيتىن دە ونىڭ ءتۇر-ءتۇسى, ءتىلى, ءدىنى ەمەس, ءىس-ارەكەتى, تىندىرعان ءىسى بولسا كەرەك. ال وسى جۇمىر جەردىڭ بەتىندەگى جۇمىر باستىلاردىڭ ءىس-ارەكەتىنىڭ ءبىر-بىرىنەن ايىرماشىلىعى جەر مەن كوكتەي ەكەنىن بايقايمىز.
جەر مەن كوكتەي دەمەكشى, كۇنى كەشە امەريكالىق ونەرتاپقىش ينجەنەر, ميللياردەر, كاسىپكەر يلون ماسكتىڭ SpaceX دەگەن عارىش تەحنيكالارىن جاسايتىن كومپانياسىنىڭ تىكەلەي ەفيرىن بەس قۇرلىقتاعى ميلليونداعان ادام ءبىر مەزگىلدە تاماشالادى. «ادامزاتتى اسپانعا قاراپ ارمانداۋدى ۇيرەتكەن» گاگاريننىڭ بەينەسى كەيىنگى ۇرپاقتىڭ ساناسىنان بۇلدىراپ, وشۋگە اينالعان ەدى. يلون ماسك وسى ارماندى قايتا جاڭعىرتقانداي بولدى. SpaceX-تىڭ Dragon 2 دەگەن باسقارىلاتىن, كوپ قولدانىلاتىن عارىش كەمەسى وربيتاعا شىقتى. بۇرىن جۇمىسىن دا, يدەولوگياسىن دا بۇكىل يمپەريا بولىپ جۇرگىزەتىن جۇمىستى جەكە كومپانيا جۇزەگە اسىردى. اقش پرەزيدەنتىنىڭ ءوزى عارىش تەحنولوگياسى مەملەكەتتەردىڭ قول استىنان شىعىپ, جەكە كومپانيالاردىڭ يەلىگىنە وتكەنىن مويىنداپ, جەرلەسىن Twitter ارقىلى قۇتتىقتادى.
ماسك بۇرىننان دا ءماشھۇر تۇلعا ەدى. ەپوتاج ارەكەتتەرىن, الەۋمەتتىك جەلىدەگى جارتى اۋىز ايتقانىن باق بىتكەن اڭدىپ وتىراتىن. ەندى ءتىپتى اڭىزعا اينالىپ شىعا كەلدى. ءسوز بەن ءىستىڭ توعىسقان تۇسى وسى بولدى, قىسقاسى.
ءبىر قىزىعى, الەمگە «امەريكالىق ارمان» دەگەن ۇعىمنىڭ ەپيتسەنترى, دەموكراتيانى تاراتۋشى, وزىق تەحنيكالاردىڭ وتانى, تولەرانتتىلىقتى ناسيحاتتاۋشى ەل جەردىڭ تارتىلىس كۇشىن جەڭسە دە, ناسىلشىلدىك كەمسىتۋشىلىكتى ءالى جەڭە الماپتى. ءبىر اپتا بولدى, ەلدىڭ ءبىراز بولىگىندە ناسىلشىلدىككە قارسىلىق ءبىلدىرۋدىڭ سوڭى تارتىپسىزدىككە جالعاسىپ جاتىر. دجوردج فلويد ەسىمدى افروامەريكالىق ازامات اق ءناسىلدى پوليتسەي تۇتقىنداپ جاتقان كەزدە قايتىس بولعانى ادامداردى دىنىنە, ناسىلىنە, جىنىسىنا قاتىستى كەمسىتۋشىلىككە توزبەيتىن ەلدىڭ شامىنا تيسە كەرەك. بۇل وقيعا ۋشىعا كەلە, ەلدىڭ ون شاقتى قالاسىن تارتىپسىزدىك جايلادى, مارودەرلەر كوبەيدى.
تاياۋدا جۇمىر جەردىڭ تاعى ءبىر پۇشپاعىندا وسىنداي كەرەعار قۇبىلىس بولدى. الەمدىك وركەنيەتكە ولشەۋسىز ۇلەس قوسقان لوندوندا ءبىر توپ ازامات 5 G تولقىنىن تاراتاتىن قىمبات قۇرىلعىلار قويىلعان 20 شاقتى مۇنارانى قيراتىپ تاستادى. وزدەرىنىڭ ايتۋىنشا, بۇل مۇنارالار COVID-19 ۆيرۋسىن تاراتادى-مىس. شىندىعىندا, قازىرگى 4 G-دەن 40 ەسە جۇيرىك 5 G ادامزاتتىڭ ءومىرىن قازىرگىدەن دە جاقسارتۋعا وراسان زور كومەگىن تيگىزەدى. مامانداردىڭ ايتۋىنشا, قاشىقتان ءتۇرلى كۇردەلى وپەراتسيالاردى جۇزەگە اسىرۋعا جول اشىلادى. ءسوز جوق, وعان قارسىلىق كورسەتۋ – قاراڭعىلىق, قيراتۋ – ۆانداليزم. يلون ماسكتىڭ كومانداسى اتقارعان ءىس پەن مۇنارا قۇلاتۋشىلاردىڭ ارەكەتىنىڭ اراسىندا شەكسىز الشاقتىق جاتىر.
ءبىزدىڭ ەلگە وتكەن عاسىردىڭ العاشقى شيرەگىندە كەلگەن تراكتوردى ء«شايتاننىڭ كولىگى» دەپ, ۇستىنە ءشوپ ءۇيىپ ورتەپ جىبەرگەندەر تۋرالى ەستىپ ەدىك. اعىلشىنداردىڭ ارەكەتى سونى ەسكە ءتۇسىردى. ءيا, اراسىندا ءبىر عاسىر ۋاقىت جاتىر, قازىر دامىدىق, كوزىمىز اشىلدى. بىراق قازىر دە «بيلل گەيتستىڭ ءچيپى» تۋرالى اڭىز ءورشىپ تۇر ەمەس پە؟
قىسقاسى, ناداندىق قوعام تاڭدامايتىن سياقتى. دامىعان قوعامدا دا, ارتتا قالعاندارىندا دا ول بولادى, بولعان جانە بولا بەرمەك. ال دانىشپاندىق ءۇشىن, ادامزاتتى العا سۇيرەيتىن جەتىستىكتەر ءۇشىن بىلىممەن سۋارىلعان قۇنارلى توپىراق قاجەت. ماعجان ايقىن ايتقان «اسپان-كوككە اساتىن, ونەر-ءبىلىم شاشاتىن» قوعام سونداي قۇنارلى ورتادا قالىپتاسسا كەرەك.