بيىلعى حالىقارالىق بالالاردى قورعاۋ كۇنى بۇرىنعىدان وزگەرەك بولىپ تۇر. سەبەبى بالالار كارانتين كەزىندە ۇيدەن شىقپاي, دالاداعى اسىر سالاتىن ويىندى, بىرگە كوڭىل كوتەرەتىن دوستارىن ساعىندى. ولاردىڭ ءدال وسى مەرەكەنى اسىعا كۇتكەنى انىق. بۇل ويىمىزدى جازدىڭ العاشقى كۇنىندە كەلەتىن مەيرامدى ەرەكشە تويلاتقان استانالىق وقۋشىلاردىڭ شىعارماشىلىق يدەياسى دالەلدەي تۇسەدى.
حالىقارالىق بالالار كۇنى قارساڭىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ فيليالى «نۇر-سۇلتان قالاسىنداعى حالىقارالىق مەكتەپتىڭ» 7 «س» سىنىپ وقۋشىلارى بۇل مەرەكەنى وزگەشە اتاپ ءوتۋدى ۇيعاردى. وقۋشىلار وتباسىمەن بىرگە اق قاعازعا ارمان-تىلەكتەرىن جازىپ, اۋە شارىمەن بىرگە كوك اسپانعا ۇشىردى. بالالاردىڭ بۇل ويىنا قولداۋ بىلدىرگەن اتا-انالار دا قيالدارىنا ەرىك بەرىپ, بالالىق شاققا ساياحات جاسادى. بۇعان دەيىن ءتۇرلى ناۋقاندار مەن ويىندار الدەنەشە رەت ۇيىمداستىرىلعانىمەن, بۇل جولعى شارانىڭ ءمانى بولەك. وسىلايشا, بالالاردىڭ ارمان-تىلەكتەرىن ارقالاعان جۇزدەگەن اۋە شارى كوككە كوتەرىلىپ, اسپاندا قالىقتادى.
– بيىل بۇكىل الەمدى شارپىعان قاۋىپتى ىندەت ومىرىمىزگە كوپ وزگەرىس اكەلدى. مەكتەپتى قاشىقتان وقۋ فورماتىندا اياقتاپ, سوڭعى قوڭىراۋ شاراسىنا ونلاين قاتىستىق. بىراق بۇگىن اسىعا كۇتكەن مەرەكەمىز بالالار كۇنىن وسىنداي سيپاتتا اتاپ ءوتۋدى دۇرىس دەپ شەشتىك. ەڭ باستىسى, وتباسىمىزبەن, جاقىندارىمىزبەن بىرگە بولۋ ەمەس پە؟! قاز قاتار وتىرىپ, تىلەكتەرىمىزدى قاعازعا تۇسىردىك. ەلىمىزدىڭ قارقىندى دامىپ, قانات جايۋىن بەينەلەيتىن اۋە شارلارىنا ارماندارىمىزدى بايلاپ, اسپانعا ۇشىردىق. كارانتين شىن باقىتتى اتا-انالارىمىز بەن باۋىرلارىمىز, ەڭ جاقىن ادامدارىمىز قۇرايتىنىن ۇعىندىردى. وسى يدەيامىزدى جۇزەگە اسىرۋعا جەتەكشىلىك ەتكەن ۇستازىمىز ينديرا احمەتوۆاعا العىس بىلدىرەمىز, – دەيدى بالالار.
وتباسىمەن دوڭگەلەنە ساپ تۇزەسكەن وقۋشىلاردىڭ كوڭىل-كۇيىنەن وزگەشە مەرەكەلىك لەپ ەسكەندەي بولدى. قولدارىنا ۇستاعان ءتۇرلى-ءتۇستى شاردى قالىقتاتىپ اسپانعا قويا بەرگەندە, ەلوردا اسپانىندا ۇشقان شارلار كوز ۇشىنان بۇلدىراپ بارىپ, ساعىمعا اينالدى.– بۇل كۇندى وسىنداي سيپاتتا اتاپ ءوتۋدى بالالاردىڭ وزدەرى قالادى. ولار شارلارى نەعۇرلىم بيىككە كوتەرىلسە, ارماندارى سوعۇرلىم تەزىرەك ورىندالاتىنىنا كامىل سەنەدى. بالا ارمانىنا قانات ءبىتىرىپ, ءومىردىڭ ەڭ باقىتتى كەزەڭىن ەستەرىندە قالدىرۋ – ءبىزدىڭ پارىزىمىز, – دەيدى قازاق ءتىلى مەن ادەبيەتى ءپانىنىڭ مۇعالىمى ينديرا احمەتوۆا.