باتىس قازاقستان وبلىسى اقجايىق اۋدانىنا قاراستى بازارشولان اۋىلدىق وكرۋگىندە اۋىل جاستارى باس قوسىپ, از قامتىلعان, مۇمكىندىگى شەكتەۋلى جان جاردەم شارىپوۆكە تۇرعىن ءۇي الىپ بەردى.
تۇرعىندار سانى 100-دەن ءسال عانا اساتىن شاعىن عانا بايانتوبە اۋىلىندا ەرەكشە وقيعا بولدى. وسى اۋىلدىڭ تۇرعىنى, بۇعان دەيىن اپاتتى ۇيدە تۇرىپ كەلگەن جاردەم ءشارىپوۆتىڭ وتباسى ءىشى-سىرتى جوندەۋدەن وتكەن باسقا پاتەرگە يە بولدى.
- جاردەم اعايدى بالا كۇنىمىزدەن بىلەمىز. وسى بايانتوبە اۋىلىندا ءومىر بويى تۇرىپ كەلەدى. ءوزى قازىر اۋىر ناۋقاس, ءۇش بالاسى بار. ەشبىر ەتجاقىن تۋىسى جوق, كومەككە شىن مۇقتاج ادام ەدى. بالالىعى وسى اياداي عانا بايانتوبە اۋىلىندا وتكەن جەرلەستەر جينالىپ, بيىل كوكتەمدە الەۋمەتتىك جەلىدە ارنايى توپ قۇردىق. ماقساتىمىز – تۋعان جەردە باس قوسىپ, يگىلىكتى شارالارعا مۇرىندىق بولۋ ەدى. مىنە, كوپشىلىكتىڭ شەشىمى بويىنشا الدىمەن جاردەم اعايعا قول ۇشىن بەرەمىز دەپ شەشتىك, - دەيدى ارتۋر ورىنعالي ۇلى.
ارتۋر بۇگىندە اقجايىق اۋداندىق مادەنيەت, تىلدەردى دامىتۋ, دەنەشىنىقتىرۋ جانە سپورت ءبولىمىنىڭ باسشىسى بولىپ قىزمەت ەتەدى. جالپى بۇل ىسكە الماتىدا, اتىراۋدا, ورال قالاسىندا, تاعى باسقا ايماقتاردا تۇراتىن بۇرىنعى بايانتوبەلىكتەر ءبىر كىسىدەي جۇمىلىپتى. ءسويتىپ, از ۋاقىت ىشىندە 400 مىڭ تەڭگەدەن استام قاراجات جينالعان. بۇل اقشاعا ءۇي الىنىپ, وعان شاعىن جوندەۋ جۇمىستارى دا جۇرگىزىلگەن.
جاردەم اعايعا جاڭا باسپاناسىن تابىس ەتۋ شاراسى شاعىن تويعا اينالىپ كەتتى. الىس-جقىننان وسى ىسكە ۇلەس قوسقان جەرلەستەرمەن بىرگە اۋىل اكىمى ەرلان تەمىرعاليەۆ, مەكتەپ ديرەكتورى, اقجايىق اۋداندىق ءماسليحاتىنىڭ دەپۋتاتى قاناپيا تاسپاي ارنايى كەلدى. جاڭا شاڭىراقتا داستارحان جايىلىپ, ايات وقىلىپ, ومىردەن وتكەن اۋىل ازاماتتارىنا دۇعا باعىشتالدى. ايتا كەتەرلىگى, بۇل جيىننىڭ دا سالماعىن باستاماشىل توپ وزدەرى كوتەرىپ الىپتى.
«كوپ تۇكىرسە كول» دەگەن راس قوي. بازارشولان اۋىل اكىمدىگى مۇقتاج جاننىڭ جاڭا شاڭىراعىنا اۋىز سۋ قۇبىرىن تارتىپ بەردى. جاستار ەندى قىستىق وتىنىن دا جيناپ بەرۋگە ۋادە ەتىپ وتىر.