ۇلتتىق اكادەميالىق كىتاپحانانىڭ قورجىنى سيرەك كەزدەسەتىن ەرەكشە مازمۇندى كىتاپپەن تولىقتى. قازاقستاننىڭ مەملەكەت جانە قوعام قايراتكەرى ءاليحان بايمەنوۆ كىتاپحانا قورىنا قۇندى كىتاپ سىيلادى. جانۋارلار الەمى تۋرالى بۇل ەنتسيكلوپەديانى («حاياتۋ حاياۆان») 14-عاسىردا مىسىر عالىمى ابۋ باكا كامالۋددين مۋحاممەد يبن مۇسا يسا يبن الي «ناسح» كالليگرافيالىق جازۋمەن جازعان.
1900 جىلى ەنتسيكلوپەديا قازاننىڭ يمپەراتورلىق ۋنيۆەرسيتەت باسپاسىندا قايتا باسىلعان. وسى باسىلىمنىڭ ءبىر داناسى 2018 جىلى كىتاپحاناعا ۇسىنىلعان بولاتىن. ونى قالپىنا كەلتىرۋدى قازاقستان رەسپۋبليكاسىنىڭ ۇلتتىق قولجازبالار مەن سيرەك كىتاپتار ورتالىعى جۇرگىزدى.
وسىعان وراي, ءاليحان بايمەنوۆپەن ونلاين رەجىمدە كەزدەسۋ ءوتىپ, ەنتسيكلوپەديانىڭ تۇساۋكەسەرى ءوتتى. كورەرمەندەرگە كىتاپتى تانىستىرىپ عانا قويماي, ءاليحان مۇحامەدي ۇلى تىكەلەي ەفيردە وزگە دە وزەكتى ماسەلەلەردى كوتەردى. قىزىقتى, مازمۇندى اڭگىمەلەر ايتىلىپ, بارلىق سۇراقتارعا جاۋاپ بەردى.